Isk. 13 - Yus Papí: Shuarja̱i̱ Yus Yamaram Chicham Najanamu

Wáitrak Yúsnan etserniuitjiai tuinia nu túrunawartin

¹ Uunt Yus chichartak

² “Maa aentsu uchiri̱yá, Israernumia̱ etserin niṉki enentáimias chichainia nu ame chicharainiakum Uunt Yusa chichame̱ anturkatarum.

³ Uunt Yus Ashí Aentsu Uuntri̱ chichaak etserin enentáincha netse áiniana nusha aneararti. Warí peṉké wainkiachariat ní enentái̱ya̱nak ántar etserainiawai.

⁴ Tuma asar Israerá, atumí etserniuri̱ṉkia nekasa nuna etserainiachu ásar ku̱jancham je̱a̱ sanakmianum pujuwa núnikiarai.

⁵ Israer shuartirmeka Uunt Yusa tsawantri̱ jeamtai uwemprarmi tusarmeksha iwiarnakchaitrume. Waitruá etserin ainia nuna chichame̱ ánturkuram Uunt Yusa chichame̱ṉka anturkachu asarum pepru wenuke̱ najatkachma tura wenuke̱n wa̱a̱ írunusha akirkachma núniniaitrume.

⁶ Mesekranam ímiaja̱i̱k wainkiamusha ántar áiniawai. Túrasha nekas túrunattui tuinia nusha wáitiaiti. ‘Uunt Yus jú̱nis tawai’ turutainiawai túrasha Wikia etserkata tusan akupkacharuitjiai. Túmaitiat ni chichakma nuna umikiat tusa nákarainiawai.

⁷ Tura átum ímiaja̱i̱k wáinmasha núnisaṉ nekamniuitjiai tusarum nekaarum étserumna nusha ¿wáitchak ainia? Warí Wikia chichakcha ai̱ṉ átumka ‘Uunt Yus tawai’ túruttsurmek” tímiayi.

⁸ Tuma asakrumin Uunt Yus Ashí Aentsu Uuntri̱ jú̱nis tíniuiti. “Ántrarum etserka tura nekascha nusha wainkia asakrumin Uunt Yus Ashí Aentsu Uuntri̱ chichaak, yamaikia Wi atumín kajerkajrume.

⁹ Tura ántar ímiaja̱i̱k wainiainiana nuna nuyá̱ ‘nekamniuitjiai’ tusar wáitian etserainiana nunasha yamaikia asutiáwartatjai. Tuma ásar nu shuarka Israer shuara úuntri̱ṉkia áchartatui. Núnisaṉ Israer shuara naari̱ aarma áiniana nú papiniumsha ni náari̱nkia áantrachartatui tura Israer shuara nuṉke̱ncha atakka waketkichartatui. Nu túrunamtai Wikia Uunt Yus Ashí Aentsun Úuntri̱ntiaj nuna paant nekarawartatui.

¹⁰ Warí aṉkant pujustin atsa̱i̱ṉ ántar etserin aṉkant pujustin awai tusar Wi shuarnaka anaṉkawar emeṉkátruraruiti. Núnisaṉ pepru wenuke̱n najatainiakuisha péṉker iwiartutsuk niṉkia aya nuwe̱ja̱i̱ṉ yakainiawai.

¹¹ Kame nuwe̱ja̱i̱ yakainia nu chicharainiakum ‘Wenuksha sanakiartatui’ tiartá. Tura yumisha naṉkaamas yútakui michasha kaya tímianu kakekattawai túmakui̱ nasesha tí kakaram iniartatui.

¹² Túmakui̱ wénukka sanakiartatui. Túrunamtai chichartamainiak ¡Nuweja̱i̱ yakarmarumna nusha urukaya! turamchartatuak.

^13-16 Tura tanish yakarma ainia nuna núnisnak yakararua nunasha emeskartaj tusan yumin nuyá̱ michancha nase tí kakarmaja̱i̱ akupkáttajai. Túrunamtai Wikia Úunt Yusaitjiana nu nekaattarme. Nuna túran ántar yúsnan etserin aṉkant pujustin atsamunam aṉkant pujustinian wainiainia nuna kajerkaruitiaj núnaka mikirtatjai” tawai Uunt Yus Ashí Aentsu Uuntri̱.

Nuwa̱ ántar yúsnan etserin asutniáwartin

^17-23 “Nuwa̱ ántar yúsnan etserin niṉki enentáimsar chichainia nunasha Uunt Yus chichaman akuptuiniawai. Kame aentsu wakaní̱n achirkatai tusar sentan najanawar uwejnum jiṉkiamainiawai tura muuknum jiṉkiamátniuncha mamushan aparainiawai. Túruiniak aents jákashtinia nuna máiniak aents jákatniua núnaka iwiaaku ikiuiniawai. Kame sentari̱nkia tsurintraran tura mamushri̱ncha já̱a̱raran Wí shuarnaka ni uwejé̱ya̱ṉka aṉkant awajsartatjai. Túramtaikia ántrarum ímiaja̱i̱k wáintrumna nuka atakka peṉké wáinkiashtatrume ántsarmek nékamearmena nusha túrashtatrume. Nuna túramtai Wikia Úunt Yusaitjiana nu nekaattarme” tímiayi.