Isk. 12 - Yus Papí: Shuarja̱i̱ Yus Yamaram Chicham Najanamu

Israer shuar túrunawartinian Isekiár nakumma

¹ Nuyá̱ ataksha Uunt Yusa chichame̱ taruti chichartak

² “Aentsu uchiri̱yá ámeka umichu ainia nu matsatmanum pujame. Nuka iimiainiaksha wáinmainiatsui tura kuíshtin áiniayataṉ ántuiniatsui. Warí tuke umichu áiniawai.

³ Tuma asamtai aentsu uchiri̱yá, chumpimiam ame pujamna nuyá̱ jiinkim chíkich nuṉkanam achikia júamua áintsamek tsawái̱ ashí aents iimiainiamunam ame je̱e̱minia̱ jiinkim chíkich nuṉkanam wetá. Núja̱i̱ṉkia ‘iikia ántichu shuarapitjia’ tu enentáimtumarchartimpiash.

⁴ Kame tsawái̱ ashí aents iimiainiamunam achikiar chíkich nuṉkanam júamua núnikiam ame achíakmena nu jukim jiinkitia. Tura yajá nuṉkanam achikia júamua núnikiam kí̱arai̱ ashí aents iimiainiamunam wetá.

⁵ Túram ashí shuar iimiainiamunam pepru tanishri̱ táuram chiṉkiam jíinkium ame warirumsha nuní̱ ji̱i̱rta.

⁶ Tura kirit ajá tesmanum ame warirum yakaimin awaṉkam tura ame yápim nukukam nuṉkasha wáinkiachminia ajasam ashí iimiainiamunam jiinkitia. Warí, nuna iisar Israer shuar enentáimprarti tusan áminkia aant áitkiajme” tímiayi Uunt Yus.

⁷ Kame turutmia núnisnak iwiarnaran shuar ni nuṉke̱ya̱ achikiar chíkich nuṉkanam júamua núnisnak winia warirun jukin tsawái̱ jiinkimjiai. Tura kí̱arai̱ṉkia tanishan winia uwejruja̱i̱ chiṉkian kirit ajá tesainia ai̱ ashí shuar iimiainiamunam winia takakmarun yakai̱rui̱ awantkan wémajai.

⁸ Nuyá̱ Uunt Yus kashin tsawa̱r chichartak

⁹ “Aentsu uchiri̱yá, Israer shuar umichu ainia nu ame túrimiamna nuna iisar urukamtia ausha áiniam tusa ¿aninmascharmaka?

¹⁰ Kame Uunt Yus Ashí Aentsu Uuntri̱ chichaak ‘Wi túrajna ju̱ka Jerusaréṉnumia̱ akupin tura ashí Israer shuar nui̱ pujuinia nu ánis túrunattawai tusa nakummaiti’ tiartá.

¹¹ Tura chicharainiakum ‘Wikia átum túrunatin asakrumin atumín nakumeakun wi túrunamaj núnisrumek atumsha chíkich nuṉkanam achintkiarum junaktiatrume tawai’ tiartá” tímiayi Uunt Yus.

^12-16 Tura úuntri̱nkia ni waririṉ entsakí̱ tanishnum wa̱a̱ najanamua nuní̱ nuṉkan wáinki̱a̱i̱j tusa yapin nukuk jiinkittiawai. Túrasha Yusai̱ya̱ṉka uwemprashtatui antsu achikiar Papirúnianam jukimiu átatui. Túrasha nú nuṉkanka wáintsuk nuiṉ jakattawai. Kame ni yáintri̱sha tura ashí ni suntarí̱sha tsakiṉmakar puya̱ja̱i̱ apapékma ártatui. Túrasha tui̱ jeawartata nui̱sha ni mui̱jmiai̱ túrawarman etserkarat tusan ishichik aentsun uwemtikrartatjai. Nuya̱ṉka Wikia Úunt Yusaitiaj nuna nekaawartatui.

^17-20 Núnisaṉ Uunt Yus ataksha chichartak “Aentsu uchiri̱yá kurashim yurumáta tura sapijmiakum tákeer ajashim umarta. Túram Jerusaréṉnumia̱ aents chicharainiakum ‘Aents ju̱i̱ matsatainia tí yajauch ajasáru asamtai nuṉkasha emesnak aya jú̱nik awajnástatui tuma asamtai jakamnia enentáimiatrumek yurumátarum ántsarmek sapijmiashim umartarum’ tiartá” túrutui Uunt Yus Ashí Aentsu Uuntri̱.

^21-25 Nuyá̱ ataksha Uunt Yus chichartak “Aentsu uchiri̱yá ¿warí tuíniakua? tsawant esaaki̱ wéakui ímiaja̱i̱k wáinmaaka aya méṉkawai tuinia nuna tuinia asamtai Uunt Yus Ashí Aentsu Uuntri̱ chichaak nú timiaṉka emeṉkáktatjai. Tura Israernumka atakka peṉké tunashtatui. Antsu yamaikia nekaawarti ímiaja̱i̱k wainkiamu uminkiatin tsawant jeayi. Tuma asamtai Wi chichakmaka ashí uminkiattawai. Núnisaṉ átum túramusha tuke meṉkakattawai tiartá” tawai Uunt Yus Ashí Aentsu Uuntri̱.

^26-28 “Ímiaja̱i̱k wainkiamu uminkiatniuka tsawant jeayi tiartá. Aya kajen shuara Wi chichaktatjana nuka átum pujarmena ju̱ tsawantini̱ṉ uminkiattawai” tawai Uunt Yus Ashí Aentsu Uuntri̱.