Isk. 11 - Yus Papí: Shuarja̱i̱ Yus Yamaram Chicham Najanamu

Uuntri̱ ainia nu asutniáwartin

^1-4 Nuya̱ṉka ataksha Yusa Wakaní̱ Yusa Je̱e̱n waiti etsa̱ tatainmaani̱ ana nuní̱ jurukmiayi. Nui̱ paintiséṉku áishmaṉ pujuinian wainkiamjai. Tura pepru uuntri̱ Asura uchirí̱ Jasanías nuyá̱ Piniayása uchirí̱ Piratías nui̱ páchitkia armai.

^5-12 Tura Uunt Yus chichartak “Jerusaréṉnum yajauch túrawarat tusa iwiarainia núnisaṉ chicharainia nuka ju̱ áiniawai tusa ujatkámai. Túrasha Yuska átum enentáimmiancha nékawai tura aentssha péprunam tí nukap kajeṉkuitrume túramprume tiartá tusa akuptúkmai. Tura átum ashamarmena nú puya̱ja̱i̱ péprunmaya̱ṉka Yus ji̱i̱rmartatrume. Tura ju̱ nuṉka tesamu náṉkatkana nui̱ átum túraitrumna nuja̱i̱ métek asutiámattarme. Túrunamtai átum chíkich nuṉkanmaya̱ túramkurmin Ni akupkámuri̱sha nakitramarumna nú Yussha yait nuka nekaattarme” tímiayi.

¹³ Tura Yúsnan etserniuka chicháa wajai̱ṉ Piniayása uchirí̱ Piratíaska jakamiayi. Nuya̱ṉka Yúsnan etserin tikishmar Yusan chichareak “¿Israer shuar juákarua nusha amú amustatmek?” tímiayi.

Israer shuarnaka ní nuṉke̱ni̱ṉ awaiṉki̱ ataksha Yus itiattawai

^14-21 Nuyá̱ Uunt Yus chichaak “Jerusaréṉnum matsatainia nuka núṉkaka íktusma nuní̱ enentáimiá matsatainiawai. Túrasha Israer shuaran chíkich nuṉkanam tsakiṉmakma matsatainia núnaka ataksha ni nuṉke̱ni̱ṉ awaiṉkin ikiankartatjai. Tura awaiṉkin ikianainiaknaka yamaram enentáin súsartatjai. Núnisaṉ mui̱jmiai̱ tura peṉké yajauch ainia núnaka ashí iniaisartatui. Nuya̱ṉka Wi akupkámuja̱i̱ métek túrawartatui. Túrunawarka Wi shuar ártatui tura Wisha ni Yusri̱ átatjai. Núnisnak Wi akupkámuja̱i̱ métek wekainiachuka niṉki makumarartatui” tu aimkiamiayi Uunt Yus Ashí Aentsu Uuntri̱.

Uunt Yusa winchari̱ Jerusaréṉkan ikiukmia

^22-25 Kame kirupín tenté ayantáin armia nusha tura Israera Yusri̱ winchari̱ kirupínnium yakini̱ pujumia nuja̱i̱ métek péprunmaya̱ṉka jíinkiar etsa̱ tatainmaani̱ naint amia nui̱ wakamiayi. Nuya̱ṉka Yusa Wakaní̱ ímiaja̱i̱k wáinmanum jurukí̱ aents achirar yajá yaruakma Kartíanam matsamárma nui̱ ejetimiayi. Nuya̱ṉka ímiaja̱i̱k wáinmaaka meṉkakamai. Túrunamtai Uunt Yus iniaktursama nuna achirar yaruakma yajá matsamárma nuna ashí ujakármajai.