Isa. 9 - Yus Papí: Shuarja̱i̱ Yus Yamaram Chicham Najanamu

Misías akiiniatin etserkamu

¹ Túmaitiat kiritniunam wáitias pujú arma nuka núniskeka pujuschartatui. Tura yáunchuka Sapurún tura Neptarí nuṉké̱ wáitkiasma ásarmatai ukunmaṉka tsawant jeattana nui̱ṉkia nayantsanam wetai jintianmaani̱ tura Jurtan entsa amaini̱ ashí Kariréanam Israer shuarcha pujuinia ímianaisha páantin awajnástatui.

² Tura shuar kiritniunam wekainiarma nusha tí tsaapninian wáinkiarmai. Núnisaṉ kiritin nuṉkanam jákatniunam pujuinian tsáapin ajattsamiayi. Mat. 4:16; Ipi. 5:8,14

³ Ti untsurí shuar awajsaram warainia nú naṉkaamas waramtiksarume. Ame pujamunam warainia nuka arakan wará waraja̱i̱ juíniak tura mesetnum ata̱rman akantúnainiak warainia ímiatrus warartamsartatui.

⁴ Warí Matiannum itiurkamiam nútiksam wáitkiainiamunmaya̱ tura kijin áentskur wáitkiainiamusha aṉkant awajsattame. Warí wáitkiatai̱ numiri̱sha kupiratniua nútikiam aṉkant awajsattame.

⁵ Kame nupa̱ jiji̱a̱i̱ áesatniua núnisar mesetnum wéakur sapat awerar tásaar ajataiṉkia núnisaṉ mesetnum entsatái̱ pushí numpamkamusha áesnakartatui.

⁶ Warí nu Úchikia iin akiintiurmaitji, chikichik Uchin suramsaitji. Nisha ti kakaram akupin átatui. Ni náari̱ṉkia “Aentsja̱i̱ Naṉkaamas Chicharkartin”, “Kakaram Yus”, “Tuke Pujú Apa”, “Aṉkant Pujustinnia Uuntri̱” tu anaikiamu átatui.

⁷ Tura Ni akuptáiri̱ncha nuyá̱ Tawitia pujutái̱ri̱ncha Ni akupeamuri̱ṉkia tí naṉkamantu kakaram ajas núnisaṉ aṉkant pujustincha náṉkatkachu átatui. Núnaka yamaiya̱ ju̱yá̱ tura tuke átinian nekasa nuja̱i̱ métek péṉker túrattawai. Kame Ashí Akupin Uunt Yusa nu tí akasmatak núnaka túrattawai.

Israer shuar naṉkamantu enentáimtuma ásar wáinkiarma

^8-10 Uunt Yus Israer shuaran chichaman akuptúkarmia nunasha ashí antukarmiayi. Túmaitiat Epraincha tura Samarianmaya̱ aentssha naṉkamantu enentáimtumasar chichainiak “Nuwe iniarkámu tsainiakarmataisha kaya iwiarkamuja̱i̱ je̱a̱mkartai tura kampunniunmaya̱ íkiun ajararmataisha sétruja̱i̱ je̱a̱mkatai” tiármiayi.

^11-12 Tura Israer shuarnaka ni nemasri̱n íktusu asa Sírianmaya̱ tura Jiristíu aents Israer shuaran amuiniakuisha Uunt Yuska peṉké tsaṉkurachuiti.

^13-17 Túmainiayataṉ Israerka peṉké pachimiascharmiayi tura Úunt Yusnasha peṉké enentáimtuscharmiayi. Tuma asamtai Uunt Yussha nu tsawantai̱k pepru úuntri̱ncha tura Yúsnan etserin armia nunasha nuyá̱ jintinkiartin armia nunasha aentsun awajimtikiainia ásarmatai núnisaraṉ natsancha mitiaikiancha tura waje̱ armia nunasha peṉké waitnentsuk ashí asutiáwartatui.

^18-21 Kame tunaaka ji tsuátan áeseak itiurawa núnis múkun múkun ajamiayi. Uunt Yus kajekú asamtai nuṉkasha tura aentsush asutniáwartatui. Tura aentsush nuamtak mai̱ maanai ajainiak nú arant ajainiawai. Túmainiakuisha Uunt Yusa kajetáiri̱ṉkia naṉkaamatsui antsu nu arant awajiártajtsa aya ajatás Ni uwejé̱ṉka takuri̱ araawai.