Isa. 66 - Yus Papí: Shuarja̱i̱ Yus Yamaram Chicham Najanamu

Ni antushtai̱ri̱ji̱a̱i̱ṉ sumamtikiamu

¹ Uunt Yus chichaak “Nayaimpikia Winia akuptai̱ pujutái̱ruiti tura núṉkaka Wi tarimsar pujutái̱ruiti. Winia je̱a̱rtitiai tárumna nu je̱a̱sha ¿tui̱ aa? tura Wi ayampratniusha ¿tui̱ aa?” tawai. Tur. 7:49

² “Ashí ju̱i̱ írunna núnaka Winia uwejruja̱i̱ najankamiajai. Túramu ásar irunainiawai tawai Uunt Yus. Antsu Wíji̱a̱i̱ṉkia péejchach áiniana nu ni tunáa túramun enentáimtusar wakaní̱ji̱a̱i̱sha kúntuts enentáimtumainiak Winia chichamprun antukar kurainiana nuna péṉker enentáimtusartatjai. YKan. 34:18; Tur. 7:50

³ Tura taṉkun maana nuka aentsun maana núniniaiti núnisaṉ murikiu maa áeseana nusha ya̱wá̱ kuntuje̱n tsupirea núniniaiti. Tura araka súana nuka kuchí numpé̱ súana núniniaiti. Núnisaṉ kuṉkuinian áeseana nuka najanamu yusan shiir awajea núniniaiti. Ni wakeramuri̱n túruiniak mui̱jmiainian túrawar ni enentái̱ncha shiir enentáimtiksaru ásarmatai

⁴ Wisha núnisnak wáitkiasartatjai. Túran ni ashamainiana nuna iniaktusartatjai. Warí untsuamsha peṉké ái̱rkachmarme tura chicharmasha peṉké anturtukchamarme. Antsu Wi iismasha áyatik yajauch túrakrum Wi nakitiajna nu túramarme. Isa. 65:12

⁵ Átum Uunt Yusa chichame̱ ántakrum sapijmiatirmeka Uunt Yusa chichame̱ antuktarum. Atumí yachi̱ Winia enentáimturkurmin muí̱jramainiak ji̱i̱ki̱ akuptámainiana nu chichainiak ‘Uunt Yus naṉkamantu awajsatarum. Túrakrumin atumí waramuri̱ wainkiartai’ tuíniawai túrasha niṉkia natsanmai̱ awajkámu ártatui.

⁶ Aents péprunam irunar charaatum ajainiamua núnin ántuwawai. Túrasha nuka Uunt Yusa Je̱e̱n túmawai. Kame núnaka Uunt Yus ni nemasri̱n asutíniamu tu ántuwawai.

⁷ Kame tsawantri̱ṉkia jeatsa̱i̱ṉ uchinkia takusmai. Núnisaṉ jatémátnasha jatémátsuk uchi áishmaṉchin takusmai.

⁸ ¿Yaki nu túman antukuit. Ya túrunancha wáinkiait. Chikichik tsawantini̱ṉ úunt matsatkamu ajasminkiait. Maa, ishichkisha árutsuk úunt matsatkamu najanarminkiait? Antsu Seunka ajapruku asa uchin takusarmai.

⁹ Warí uchí takuchuncha takumtiksatniun jeajai ¿túrayatnakek takumtiksashtataj? tawai Uunt Yus. Wikia ajaprumtikiatniuncha jeajai ¿túrayatnakek ajapruktinniasha suritkiattaj? tawai ame Yúsrum.

¹⁰ Tuma asamtai Jerusaréṉja̱i̱ warastarum núnisrumek ashí ni anearmena nútirmesha niji̱a̱i̱ shiir enentáimsatarum. Tura ashí ni enentáimtusrum kúntuts pujatirmesha shiir enentáimsatarum.

¹¹ Nuku tsaṉkutai̱ muntsun amuntsá ejemamtikna núnisrum muntsúarum shiir tsaṉkurmintrum” tawai Uunt Yus.

¹² Warí Uunt Yus chichaak “Nekaatarum, nui̱ṉkia aṉkant pujustinian entsa akaana nútiksan tura uunt matsamkamu páantniuri̱ncha ashints ama̱a̱rak náṉkamas akaana nútiksan Jerusaréṉnum akupkáttajai. Tuma asamtai átumka muntsúattarme núnisrumek weṉkusar itiamú tura naṉkasá pujursar shiir awajsamu átatrume” tawai Uunt Yus.

¹³ Tura nuku ni uchirí̱n átsaṉkea áitkiasnak Wi atumniaka atsaṉkrattajrume. Tura Jerusaréṉnum atsaṉnartatrume.

¹⁴ Kame atumsha nu túramu wainkiarum atumí enentái̱ warastatui tura atumí ukunchi̱sha chírichriya núnis je̱e̱rartatui. Nuiṉkia Uunt Yus ni takarniúri̱ ainia núnaka ni kakarmari̱n nekamtikiawartatui antsu ni nemasri̱nkia kajerkartatui.

¹⁵ Warí nekaatarum Uunt Yuska jiji̱a̱i̱ tura ni káruri̱sha uunt naseya ímiatrus téter winittiawai. Tura naṉkaamas kajek ni kajetáiri̱ji̱a̱i̱ núnisaṉ ji keaja̱i̱ asutkiartuattsa tátatui.

¹⁶ Warí Uunt Yuska jiji̱a̱i̱ tura puya̱ja̱i̱ ashí aentsun sumamtikiawartatui. Tuma asamtai Uunt Yus túramuja̱i̱ ti untsurí kajinkiartatui.

¹⁷ “Uunt Yusan shiir awajsatniua núnis mátrachu tura imiatkincha awajmamsar najankamu yusan tikishmátratai tusar kuku̱j ajanam wéar nui̱ iruntramu ajapéri̱n chikichik aents kuchi namaṉke̱n yúakka tura katipi namaṉké̱ncha mui̱jmiai̱ ainia nuna yúaka métekrak mantamnawartatui” tawai Uunt Yus.

¹⁸ “Túrasha Wikia ni túramuri̱ncha núnisaṉ ni enentáimmiari̱ncha nekarainiajai túrasha tsawant jeamtai ashí uunt mátsatkamuncha núnisaṉ aents chíkich chíkich chichamtin ainia núnasha ashí irurartatjai. Nuya̱ṉka nisha káunkar antsu nui̱ṉkia Winia winchar ti kakarma nuna paant wáinkiartatui.

¹⁹ Nuya̱ṉka nekanawarat tusan iwiaaku juákaru ainia nui̱ṉ Wi túrattajna nuja̱i̱ awajsartatjai. Juákaru ainia nuya̱n úunt matsatkamu Társesnum tura Pútnumsha núnisaṉ Rúutnum akupkartatjai. Nútiksanak Tuparnumsha tura Krésianmasha nuyá̱ yajá nuṉkanam nayants ayamach pujuinia Winia kakarmar aújmatmancha antukcharu tura Wina wincharnasha wáinkiacharu áiniana nui̱ akupkartatjai. Nui̱ Winia wincharun áujmatas etserkartatui.

²⁰ Tura Yus súsatniun piniṉ péṉkernum chumpíawar Israer shuar Uunt Yusa Je̱e̱n ikianainia nútiksaraṉ atumí yachi̱ ashí uunt mátsatkamu ainia nui̱ pujuinian Winia akantúkma naintrui̱ Jerusaréṉnum Yus súsatniua núnis ikianainiak kawainiumsha núnisaṉ kárunmasha tura umpurunmasha nútiksaraṉ peaknumsha nuyá̱ kamiyunmasha ikiankartatui tawai Uunt Yus.

²¹ Tura nuya̱nak Yúsnan pujurin núnisaṉ Riwí shuarnasha anaikiartatjai” tawai Uunt Yus.

²² “Warí nayaimpincha tura nuṉkancha yamarman najankattajna nuka Wini̱ya̱ṉka tuke ártatna núnisaraṉ atumí shuari̱sha tura atumí náari̱sha tuke ártatui tawai Uunt Yus.

²³ Tura nantur nantur nuyá̱ tuke ayamtai̱ tsawantin ashí aents Winia tikishmátrurtai tusar kauniartatui tawai Uunt Yus.

²⁴ Tura jíintrar Winia umirtukcharu kaji̱nkiar tepetar ajainian wáinkiartatui. Ni akarí̱sha peṉké jákachartatui núnisaṉ ni ji̱ri̱sha peṉké kajintiúkchartatui. Tura ashí shuar iismasha peṉké mui̱jmiai̱ ártatui” tawai Uunt Yus. Mar. 9:48