Isa. 61 - Yus Papí: Shuarja̱i̱ Yus Yamaram Chicham Najanamu

Israer shuarnum uwempratin chicham etserkamu

¹ Uunt Yus anaitiuku asamtai Yusa Wakaní̱ winí̱ pujurtawai. Wáitiainia nu péṉker chicham ujakárta tura enentáiji̱a̱i̱ jáiniana nusha tsuárarta núnismek achira yaruakma ainia nusha aṉkant ajastatrume tura sepusha uraniartatui tu etserkata tusa akuptúkuiti. Ruk. 4:18

² Uunt Yus ti shiir enentáimmia uwí jeayi. Ruk. 4:19 Tura ii Yusri̱ yapajmiatramkatniusha núnisaṉ ashí kúntuts pujuinia atsaṉkratin tsawantcha jeayi tu etserkatniun akuptúkuiti.

³ Nu arantcha Seúnan enentáimtusar kúntuts pujuinia nuna atsumamuri̱n súsatniun tura yuṉkunminkia juruiniak akupin etseṉkrutai̱n súsarat tusa nuyá̱ kúntuts pujamuncha emeṉkátuk waratai̱ asuiti súsatniun núnisaṉ itiurchat nekapenancha emeṉkátuk warakur Yus shiir enentáimtutai̱ awaṉkéman súsarat tusa akuptúkuiti. Tuma asamtai nekasa nuja̱i̱ métek túrutai̱ rupri numin Uunt Yus Ni winchari̱n iniakmastaj tusa arakuiti tutai ártatui.

⁴ Yaunchu emeskamu ainia nuna iwiarkar ataksha je̱a̱mkartatui tura we̱a̱t matsamtai̱ meṉkara armia nunasha ataksha iwiarkartatui. Núnisaṉ untsurí weanmaya̱ tí yaunchu matsamtai̱ pepru emeskamu ainia nunasha iwiarkartatui.

⁵ Tura yajaya̱ shuar nui̱ pujusár atumí murikrí̱n wáinkiartatui tura yajaya̱ aentsu uchirí̱ takartámin tura úwarmincha juurtamin ártatui.

⁶ Tura átumka Uunt Yúsnan takarin timia átatrume. Tura ii Yusri̱n pujurnuiti tunattarme. Chíkich nuṉkanmaya̱ kuitji̱a̱i̱ yurumáttarme tura nuna páantniuri̱ji̱a̱i̱ naṉkamantu ajastatrume.

⁷ Tura átumka natsanmai̱ ajamuka iniaisarum tí nukap patakma takustatrume. Núnisaraṉ wishikmai ajamunka iniaisar niniu átinia nuna wáinkiar tí warasartatui. Tuma asamtai ni nuṉke̱nka núna nukap patakman takusartatui tura ni waratáiri̱sha peṉké náṉkatkachu ártatui.

⁸ Warí Wikia Uunt Yus asan péṉker túrinia núnaka anenaitjiai. Tura chíkich kasarmancha nuyá̱ yajauch túramuncha muí̱jiajai núnisnak péṉker túramua nuja̱i̱ métek akikiártatjai. Túran peṉké amukashtin chichaman niji̱a̱i̱ najanawartatjai.

⁹ Tura ni shuarka ashí nuṉkanam nekaamu ártatui tura nuna uchirí̱sha ashí péprunam nekanawartatui. Núnisaṉ ashí shuar nu aentsun wainiainiakka Uunt Yus ni shuar awajsar péṉker pujutnum yumiṉkrarmia nu shuar ainia nuna paant nekaawartatui.

¹⁰ Kame wikia Uunt Yusai̱ tí shiir warastatjai tura winia Yusruí̱ tí shiir enentáimsattawai. Warí pushincha Ni áentsturua núnis uwempratniun surusuiti tura nekasa nuja̱i̱ métek túrutai̱ awaṉkémnasha ikiurtusuiti. Nuyá̱ áishmaṉ nuatua núnis akupin etseṉkrutai̱n ikiurtus nuwa̱ nuatnak kuri najankamuja̱i̱ iwiarmamna tímiatrus iwiarmamtikruruiti.

¹¹ Warí núṉkaka warinkísh tsapamtiktsuk tura jiṉkiaisha ajanam arakám tsapainia núnisaṉ Uunt Yuska nekasa nuja̱i̱ métek túrutai̱n tura Uunt Yus shiir awajsatniuncha ashí nuṉkanam nékamtikiawartatui.