Isa. 6 - Yus Papí: Shuarja̱i̱ Yus Yamaram Chicham Najanamu

Isayasan ímiaja̱i̱k wantintiuk untsuamu

¹ Uunt akupin Usías jakamia nú uwitin Uunt Yus yakí̱ ashí naṉkamantu úunt akupin pujutai̱niam pujan wi ímiaja̱i̱k wáinmiajai. Tura ni pushirísha nuntuaru asa Yusa Je̱e̱n anetak pujumai.

² Nuyá̱ Ni pujamunam yakini̱ Yusa suntari̱ serapín pujuriarmai. Tura nusha aṉkant aṉkant sais nanaptin armai. Tuma ásar ni yapi̱nkia jimiará nanape̱ja̱i̱ ejaarmai. Tura chíkich jimiará nanape̱ja̱i̱ṉkia nawe̱n ejaarmai. Nuyá̱ chíkich jimiará nanape̱ja̱i̱ṉkia nanamiarmai.

³ Tura nisha kakantar chichainiak “Ju̱ka peṉké tunaarincha, peṉké tunaarincha Ashí Akupin Uunt Yus peṉké tunaarinchaiti. Ashí nuṉkanam Ni winchari̱ timiá tsáapninia nuja̱i̱ piákuiti” tiarmai.

⁴ Tímiatainiakui Yus Je̱a̱ wáitiri̱ pauri̱ muchitrarmai. Tura Yusa Je̱e̱n yuraṉkim piakmai.

⁵ Nuya̱ṉka chichaakun “¡Chuwa jákashtatjak! Warí wikia nekas yajauchin chicháu tunáa túrin áishmaṉkaitiatan tura núnisaṉ yajauchin chicháu matsatainiamunam pujayatan Úunt Akupniun Ashí Akupin Uunt Yusan wainkiajai” tímiajai. Ruk. 5:8

⁶ Nuya̱ṉka Yusa suntari̱ chikichik Yus áestutai̱nmaya̱n jinia kaí̱ri̱ kean jiruja̱i̱ shikik jukí̱ nanaaki̱ tarutmiai.

⁷ Tura nuja̱i̱ wenuruí̱ sukuta chichartak “Wenumíin sukuajam ju̱ja̱i̱ sumamatniunmaya̱sha tura yajauch túramurminia̱sha mash tsaṉkuramuitme” turutmiai.

⁸ Nuna túruta ai̱ Uunt Yus chicháa antimjiai “¿Yanak akupkataj tura yaki iiniu akupkatajⁱ?” takui̱ wi ayakun “Wi pujajai, winia akuptukta” tímiajai.

⁹ Tutai Ni chichartak “Ayu, wetá tura ju̱ aents chicharainiakum jú̱nisam tiartá ‘Péṉker ántayatrumek antukchattarme tura péṉker wáiniatrumek nekaashtatrume’ tiartá.

¹⁰ Tura ju̱ aentsu enentáimtairi̱sha ikiatsuátrarta. Tura antukara̱i̱ṉ tusam empemtikiarta. Núnisaṉ íimsara̱i̱ṉ tusam ji̱sha ukusturarta enentáimsar nekarawar Winí̱ táarmatai tsuarara̱i̱j” turutmiayi. Mat. 13:14-15; Jṉ. 12:40; Tur. 28:26-27

¹¹ Nuna takui̱ wi chicharkun “Uuntá, urutáik etsertancha iniaisataj” tímiajai. Tutai chichartak “Péprusha amukar áentsri̱ncha ajasártatna tura je̱a̱sha itiarak ajasár nuṉkasha núṉkak juákartatna

¹² tura núnisaṉ Uunt Yus aentsun ji̱i̱r yajá ishiakartatna nuyá̱ nuṉkasha áentsri̱ncha aya núṉkak juákartatna tímianai etserkattame.

¹³ Núnisaṉ tias írutkamunmaya̱ chikichik juáktatna nusha amukma ártatui. Túrasha ensena numi ajakam aya ájiṉkiari̱ṉ juákiat jeana núnisaṉ nuna ajiṉkiári̱ya̱ peṉké tunaarincha jé̱e̱rtatui” turutmiayi.