Isa. 56 - Yus Papí: Shuarja̱i̱ Yus Yamaram Chicham Najanamu

Yusna ajasártin ashí aents tsaṉkatkámu

¹ Uunt Yus jú̱nis tíniuiti “Naka wekasatniunmaya̱ kanakiirap tura naka túrutai̱ túratarum. Warí, winia uwemtikkiartutai̱rka winittsa pujawai tura Wi péṉker naka túrutairja̱i̱ wárik paant awajnástatui.

² Áishmaṉ ju̱na tura nuka tura ju̱na umiruka warasti. Kame aents ayamtai̱ tsawantnasha Yúsnachua núnis yajauch awajsa̱i̱j tusa umíana nuka tura ashí yajauch túrutainmaya̱ kanakí̱ wekáa nuka warasti.”

³ Tura chíkich nuṉkanmaya̱ aents Uunt Yusan umirak chichaak “Uunt Yus winia peṉké akantúktiatui” tícharti. Tura uchin yajutmachusha chichaak “Wikia numi kukarua núniniaitjiai” tícharti.

⁴ Warí Uunt Yus jú̱nis tawai “yajutmachu ainia nu ayamtai̱ tsawant winia tsawantrun umirainia nuna Wi wakeraj nu achiktarum tura Wi chícham najanamu miniakkatarum.

⁵ Wi Winia je̱a̱rui̱ susattajme tura Winia tanishrui̱ initiaani̱ enentáimtustatme tura ame uchiram tura nawantrumi náari̱ji̱a̱i̱ naṉkaamas péṉker átatui. Ni naari̱ tuke átinian amastatjai peṉké japintrashtatui.

⁶ Israer shuarcha uchirí̱sha Uunt Yusa takarniúri̱ átaj tusa pachinkiaru ásar Uunt Yusa náari̱n anenak umirkar Ni takarniúri̱ ajasárunka tura ayampratin tsawantnasha yajauch awajtsuk wi chícham aentsja̱i̱ najanamuncha umirainianka

⁷ Winia akantúkma naintrui̱ ikiankaran Winia áujtin ainia nu je̱a̱nam awayá̱waran ti waramtiksartatjai. Nuiṉkia taṉkun takamtsuk áesturainiakuisha tura taṉku maa Yus áestutai̱niam súruiniakuisha shiir enentáimtusartatjai. Tura Winia je̱a̱rka ashí aents Yus aujtai̱ je̱a̱ tutai átatui.” Mar. 11:17

⁸ Tura Ashí Uuntri̱ Uunt Yus Israer shuar ji̱i̱rar yajá ishiakman írumeana nu chichaak “Nu arant chikichnasha irurarjana ju̱ja̱i̱ métek irurartatjai” tawai. Jṉ. 10:16

⁹ Ashí nuṉkanmaya̱ yajasma tura kampunniunmaya̱ yukartin árumna nu winirum yuitiarum.

¹⁰ Jintia iincha kusuru nékachu ainia. Ashí nuikia ya̱wá̱ takamtinia núnis áiniawai tuma asa jiainiatsui. Tepes tí kanin kanú ajat nekapin áiniawai.

¹¹ Tuna ju̱ ya̱wá̱ yuruma ejemachu áiniawai, murikiu wainniusha nékachu áiniawai. Ashí niṉkia ní jinti̱ni̱ṉ werenawai aṉkant aṉkant ni wakeramuri̱n wénawai.

¹² Chichainiak winitiárum winiu umarmi tura awartiuja̱i̱ nampektai, tura kashincha jú̱nisan átatui nuíchuka je̱e̱ péṉker áchanpiash.