Isa. 55 - Yus Papí: Shuarja̱i̱ Yus Yamaram Chicham Najanamu

Uunt Yus winí̱ winiarat tusa untsumkamu

¹ “Kame ashí kitiamatirmeka entsá winittiarum tura kuit takakchakrumsha winirum sumakrum yurumáitiarum. Nuyá̱ wíniusha tura muntsusha peṉké ántrarmek kuítchaja̱i̱ sumaktarum.

² ¿Urukamtai kuitcha yurumkachunmasha ájapearum? Tura atumsha shiir nekapeachiatrumsha ¿urukamtai takakmarum? Péṉker anturtuktarum túrakrumka péṉker yurumáttarme núnisaṉ atumí enentái̱sha tí peṉker yurumkan yuá shiir enentáimprattawai.

³ Tura péṉker antukrum Winí̱ winitiárum. Ántakrumni̱ṉkia atumí enentái̱sha iwiaaku ajastatui. Nuyá̱ Tawitian waitnentramiaj núnisnak amukashtin chichaman Wikia atumji̱a̱i̱sha najanattajai.

⁴ Nekaatarum. Niṉkia nekasaiti wisha wáinkiaitjiai tití tusan péprun apujtusuitjiai. Núnisaṉ uuntri̱ tura suntara uuntri̱ ati tusan ashí péprun apujtusuitjiai.

⁵ Nekaatarum. Ame nékashtai̱ nuṉkanmaya̱sha untsukartatme. Tura ame Yúsrum Uunt Yus Israernumia̱ Tunaarincha nu ti shiir awajtámsa asamtai yajaya̱ aents amincha nekarmainiachiat kautramkartatui” tawai Uunt Yus.

⁶ Tuma asamtai wainkiamnia ju̱i̱k Uunt Yus e̱a̱ktárum. Tíjiu̱ch pujana ju̱i̱k untsuktarum.

⁷ Yusan umircha ainia nusha ni túrutairi̱n iniaisarti núnisaṉ yajauch enentáimin ainia nusha ni enentáimtairi̱nkia iniaisarti. Tura ti waitnenkartin asamtai Uunt Yusai̱ni̱ṉ waketkiarti. Núnisaṉ tsaṉkurkartutai̱ri̱sha tí uunt asamtai ii Yusri̱ni̱ṉ waketkiarti.

⁸ “Winia enentáimtairka atumí enentáimtairi̱ya̱ núninchaiti núnisaṉ atumí jinti̱ṉkia Winia jintiarua núninchaiti” tawai Uunt Yus.

⁹ “Kame nuṉkaja̱i̱ṉkia nayaimpisha ti yakinchukait. Núnisaṉ atumí jinti̱ji̱a̱i̱ṉkia Winia jintiarka tura atumí enentáimtairi̱ji̱a̱i̱ṉkia Winia enentáimtairka imiá nushaachuk ainia.

¹⁰ Warí yumisha tura yuraṉmisha nayaimpinmaya̱ yutuk nuṉkan ejamper araknasha tsapamtikiar neremtikiui. Túrunamtai arakmatniunka arakan tura yurumátniunka yurumkan suíniawai. Nuna túrutskeka atakka yakiṉkia wákettsui.

¹¹ Núnisaṉ Wina chichamur wenuruí̱ya̱ jíiniuka Wi wakeraj nuna umintskeka Winí̱ waketkiṉkia atakka táchattawai. Antsu Wi chichakma nuka ashí uminkiattawai.

¹² Ti nekas warasrum jíintrattarme tura aṉkant awajsar yaruakma átatrume. Tura naintcha núnisaṉ naintiar naintiar ainia nusha atumín kantamprútmainiak charaatum ajartatui. Tura ashí kampunniunmaya̱ numisha pákeer awajtámiartatui.

¹³ Jaṉki irunniuya nui̱ṉkia sepris numi tsapakartatui. Nara irunniuya nui̱ṉkia mirtu tsapakartatui. Nu túrunamtai Uunt Yus tí paantin ajastatui tura nuja̱i̱ nekanattana nuka ukunmasha peṉké japintrashtatui” tawai Uunt Yus.