Isa. 54 - Yus Papí: Shuarja̱i̱ Yus Yamaram Chicham Najanamu

Yusa aneṉkrattai̱ri̱ tuke awai

¹ “Kaa ajasu nuwá̱ uchi takuchu asam maa ¡warasta! Núnisaṉ uchi takakum najaimiachuitiatmek warakum kakaram kantamáta. Warí nuwa̱ uchirí̱ atantrar kúntuts ikiukmia nu áishri̱nniuja̱i̱ṉkia naṉkaamas untsurí uchin takustatui, tawai Uunt Yus.

² Tuma asamtai ame nuap je̱e̱m nekapmatsuk iwiaṉkártin iwiarata. Túram tanishri̱sha ékekarta núnismek naikri̱ japirkim tee nenantarum ni numiri̱ kaki ajintruawarta.

³ Warí ame untsuurumsha tura menaarmesha takuittiame. Túrawakmin ame tiraṉkim ukunam akiiniawartatna nu, untsurí nuṉkan akinkiartatui tura uunt pepru ainia nuna aents atsuinia nui̱ matsamkartatui.

⁴ Ashamkaip warí, natsa̱a̱rchattame. Tura ¿warí urukatjak? tiip. Katsekramkachartatui. Kame natsa asam natsamataiṉkia kajinmátkittiame tura waje̱mar natsamataisha peṉké enentáimtuschattame.

⁵ Warí ame áishrumka ámin Najatma Nuiti. Tura ni náari̱sha Ashí Akupin Úunt Yusaiti. Ame Akikmatramin Israer shuara Yusri̱ Peṉké Tunaarincha nu, Ashí Nuṉkanmaya̱ Yúsaiti tu anaikiamu átatui.

⁶ Warí nuwa̱ ajapamu kúntuts enentáimiar pujana núnisam pujamin tura natsa asaṉ nuatramak ajaprama núnis ámiṉkia untsurmakuiti túramui ame Yúsrum.

⁷ Kame ishichik tsawantchik iniaisámiajme túrasha ti waitnentran awaiṉkittiajme.

⁸ Kame ti kajekan yapirun waitruka̱i̱ṉ tusan ishichik u̱rkamajme. Túrasha amukashtin waitnenkartutairja̱i̱ weantúktatjame tawai Uunt Yus ámin Uwemtikramniua nu.

⁹ Ju̱ka Nuwái pujumia nu tsawantin túrunamia núnis Wíji̱a̱i̱ṉkia átatui. Nuwái tsawantin ti nekas tajai tákun ama̱a̱ja̱i̱ nuṉkan amukmiaj nútikiashtatjai. Tura ti nekas tímiajna núnisnak yamaikia amincha peṉké kajerkashtatjame tura chicharkashtatjame nekas tájame.

¹⁰ Kame naint yajá junakiarmatai tura naintiar naintra nu muchitrarmatai̱sha Winia waitnenkartutairka amiya̱ṉka peṉké kanakchattawai. Tura Wi shiir pujustin chichaman najanaitjiana nuka peṉké yapajniáshtatui, tawai Uunt Yus ámin waitnentrama nu.

Yamaram Jerusaréṉ

¹¹ Waitnenmainiach yumi nasé naseja̱i̱ ajak ipimprámuitme túrasha atsaṉkrachmaitme. Tuma asam nekaata, Wi yamaikia tanishnasha jaspi kayaja̱i̱ najanattajai tura aeprukmari̱nkia shíirmach kaya sapiruja̱i̱ najatattajai.

¹² Tura wenuken kaya najankar nuya̱shá ekentramuriṉkia ruwí kayaja̱i̱ najatkartatjai núnisnak wáitiri̱ncha piriru kayaja̱i̱ najatkattajai túrakun ashí wenukminkia tí kuit shíirmach kayaja̱i̱ṉ wenuittiajme.

¹³ Tura ashí ame uchirmeka Uunt Yus jintintiámu ártatui tura ni aṉkant pujustinkia ti núkap átatui. Jṉ. 6:45

¹⁴ Nekas tuke péṉker túramuja̱i̱ umuchkiachmin matsastatme tura emetamunmaya̱ akankámu asam ashamkashtatme. Tura sapijmiaktin ashammainkia amiya̱ṉka yajá pujá asa jeartámchattawai.

¹⁵ Kame yaaksha ti kajek jatetmainiaksha Wi akupkachma ártatui antsu ámin jatetmainia nuka ame tumá nupetkattame.

¹⁶ Wats jirú najanin jinia umpuí ekemak jirú iminiak takakmatain nájanui nu aentsnasha wiki najanaitjiai. Áintsanak emeskartinniasha emeskarturat tusan wikia najanaitjiai

¹⁷ Nuyá̱ jiru ame mantamnatin najanamuka mantamashtatui. Tura sumamtikiatin tsawant jeattana nu tsawantinkia náṉkamas aents ámin aushá chichartamainia nuka íksamek ashí sumamtikiawartatme. Ju̱ka Uunt Yusan takarin ainia nu sunasartin iwiarturma nuiti tura Wini̱i̱ni̱ṉ ni péṉker túramu paant awajtúsma átatui” tawai Uunt Yus.