Isa. 52 - Yus Papí: Shuarja̱i̱ Yus Yamaram Chicham Najanamu

Jerusaréṉ aṉkant átin ujakma

¹ Maa Seuná shintiarta, shintiaram kakaram ajasta. Kame Yusna akantúkma pepru Jerusaréṉka ti péṉker pushiram entsarta. Warí, tsupirnakchaka tura yajauch shuar ainia nuka atakka aminí̱ṉkia peṉké waya̱chartatui.

² Maa, wajakím nuṉká ju̱yu̱ri̱ peamaram Jerusaréṉká pujusta. Túram Seuna nawantri̱ya̱ achirmak yajá juramainiak jiruja̱i̱ kuntujmin jiṉkiatmáwarmia nusha atimiarta.

³ Warí Uunt Yus chichaak “Peṉké antra surunkamiarme núnisrumek kuítchaja̱i̱ awakentrattarme” tíniuiti.

⁴ Warí ii Uuntri̱ Uunt Yus chichaak “Yaunchu Israer shuarka Ejiptunam pujustai tusar wéarmiayi. Nuyá̱ Asirianmaya̱ peṉké ántar wáitkiasaruiti” tíniuiti.

⁵ Tura yamaikia Uunt Yus chichaak “Wi shuar antra achirar yaruakma ai̱sha ¿warinia ju̱i̱sha pujuraj? Warí nuyá̱ akupniúsha niṉkia wishikiainiawai tura Winia náarnasha iniaṉnatsuk peṉké yajauch chicharainiawai” tawai.

⁶ Kame tsawant jeattana nui̱ Wi shuarka Winia náarun nekaawartatui. Warí Wikia Ju̱i̱ Pujajai tana Nuitjiai.

⁷ ¡Kame yamaram chicham tura aṉkant pujustin chichamnasha nuyá̱ péṉker chichaman núnisaṉ uwempratin chichamnasha etserkattsa naintia naṉkaraktak winiana nu timiá péṉkerchakait! Tura Seúnnasha chicharuk “¡Ame Yúsrum akupeawai!” tana nu timiá shiiraiti.

⁸ Atumí jintiá iin awajsamu ainia nuna chichame̱ anturkatarum. Nisha ti shiir warainiak métekrak untsumáiniawai. Warí Uunt Yus Seúnnum waketki̱ iwiarataj tusa taakui nekas ni jí̱ji̱a̱i̱ṉ wáinkiartatui.

⁹ Jerusaréṉka emeskar jú̱nik ikiukmiaitiatrumek ti shiir warakrum untsumkatarum. Warí Uunt Yuska ni shuari̱n atsaṉkrachukait. Tura Jerusaréṉnasha akikmatak awaiṉkin asamtai warastarum.

¹⁰ Ashí nuṉkanam pujuinia nu aents iimmiainiamunam Uunt Yus ni kakaram kunturi̱n iniakmasuiti. Tuma asamtai ashí nuṉka náṉkata ímianai pujuinia nu shuarsha uwempratniun wáinkiartatui.

¹¹ ¡Kanaktiarum! ¡Kanaktiarum! Nuya̱ṉka jíinkitiarum. Tura mui̱jmiai̱ya̱ nusha antiṉkiairap. Tura ni matsatainia nuya̱sha jíinkitiarum. Tura Uunt Yusna takarkur takakmatai juármena nútirmeka imiatkincha ajastarum.

¹² Jíinkiurmesha wárik jíinkishtiniaitrume tura pisatcha pisarchatniuitrume. Warí Uunt Yus atumíya̱ eem wétatui. Tura Israera Yusri̱ṉkia atumí úkuri̱n winittiawai.

Uunt Yusa Takarniúri̱ wáitsamuja̱i̱ nupetmakar páantin ajasma

¹³ Nekaatarum, Winia takartin nupetmaktatui. Kame uunt awajsar tura páantin awajsamu núnisaṉ ti náakam awajnástatui.

¹⁴ Tura untsurí aents “¡tsej ausha! ¿urukamtai áitkiawara?” tiármiayi. Warí ni yapi̱sha nekaachmin awajtúsma asa ashí shuarja̱i̱ naṉkaamas shuarcha núnikmiayi.

¹⁵ Núnisaṉ untsurí uunt matsatkamu nuṉkan “¡áyawa!” tumamtikiartatui. Nin wáinkiar akupin ainia nusha múutmarartatui. Warí yáunchusha áujmatchatai̱n wáinkiartatui. Túrawar yaunchu antushtai̱ncha nekaawartatui.