Isa. 50 - Yus Papí: Shuarja̱i̱ Yus Yamaram Chicham Najanamu

Uunt Yuska Nin enentáimtuinia nuna yayawai

¹ Uunt Yus chichaak “Atumí nukurí̱ nakitra ajapamu papisha ¿tui̱ aa? ¿Tura yana tumash asana surukuitjiarum? Nekaatarum, átumka atumí tunaari̱ni̱ṉ surunkamarme núnisaṉ átum nakitrakrumin atumí nukurí̱sha nakitniar ajapnamai.

² Wi támaj nui̱ṉkia ¿urukamtia chikichkisha atsuma. Untsumkuisha urukamtia chikichkisha ái̱rkachma. Antsu winia kuntursha peṉké sútarchikiait átum ata̱i̱tniun jeashtinia. Wikia átum aṉkant awajsatniunka kakarman takaktsujak? Nekaatarum, Wi chicharmaka nayantsasha kukach ajastatui tura entsasha ku̱yu̱kar kampuntin atsú ajasármatai namaksha kitiakai̱ kajinkiar kaukartatui.

³ Wi nayaimpin kiritniun áentsrattajai túran kúntuts pujakur entsatái̱ pushiji̱a̱i̱ nukuktatjai.”

⁴ Pimpikin ainia nu jintintiakur péṉker chichaktinniaka ii Uunt Yusri̱ surusuiti. Tuke káshik ishintiátui. Unuimiáru áiniana tímiatrus anturtukat tusa tuke káshik wíniaka ishintiátui.

⁵ Ii Uunt Yusri̱ antuktinniaka surusuiti tura kajenka ajaschaitjiai núnisnak úkumprusha waketkichuitjiai.

⁶ Winia asuttiuáwarma nunasha tuntupmatran wajattsarmajai. Túran winia susurnasha uwerturarti tusan tsaṉkatkarmajai. Núnisnak wishikruiniak yapirui̱sha usukruawarti tusan iniaitiusarmajai.

⁷ Warí ii Uunt Yusri̱ winia yaintiu asamtai natsanmai̱ awajkámu áchattajai tura winia yapirnasha kayaja̱i̱ métek ikiatsuármajai. Warí nékajai iniatsá̱rma áchattajai.

⁸ Núnisaṉ winia ayamprutna nusha winí̱ ayaam pujawai. ¿Yaki wíji̱a̱i̱sha mánikiat? Métek iruntrartai. ¿Yait winia nemasrusha? Weantúrkata.

⁹ Nekaatarum kame ii Uuntri̱ Uunt Yus yaintkiattawai. ¿Yaki sumamtikruat? Nekaatarum niṉkia pushiya núnisar ashí mamukármatai ka̱ya̱ yuáwartatui.

¹⁰ Atumíya̱sha ¿ya Uunt Yusan ashama? Núnisaṉ ni takarniúri̱ chichame̱n ¿ánturusha aa? Tura kiritniunam wekaakrum nu tsáapnin atsumamna nuka aya Uunt Yusak enentáimtusam Nini̱ṉ kaka̱rtarum.

¹¹ Túrasha nekaatarum ji ashí akarume tura shiripkisha ekemarme. Tura atumí ji̱rí̱ tsáapnintri̱ji̱a̱i̱ṉ núnisrumek atumí shiripkiri̱ ekemákmaja̱i̱ṉ wekaarme. Túrasha Uunt Yuska nunak íkturmaki̱ akuptúrmaktatrume. Túrutmamtai waitsa pujutai̱niam matsamsattarme.