Isa. 5 - Yus Papí: Shuarja̱i̱ Yus Yamaram Chicham Najanamu

Métektaku chichamja̱i̱ uwa aja páchiamu

¹ Wi aneamu amikrun kantamprakun ni ajarí̱n pachisan kantampruáttajai. Tí peṉker nuṉka ayantánmanum winia amikiur uwa ajan takakuyi.

² Tura meekmi ipiantar kayarí̱n júrak utsantak ashí péṉker iwiaramai. Nuyá̱ uwa arakri̱n péṉkernak juuk arakmamai. Tura nui̱ uwa ajanam ajapén kumpin je̱a̱n je̱a̱mmai. Núnisaṉ winiu neketai̱ncha iwiaramai. Kame uwa péṉker nerekchartimpiash tusa nákasmai túrasha uwa churuin nerekarmai.

³ Tura yamaikia Jerusaréṉnumia̱tiram tura Jutanmaya̱ áishmaṉtirmesha Winiasha uwa ajarja̱i̱ métek sumamtikruatarum.

⁴ Warí winia uwa ajarnasha nu arantcha ti itiurkamniakitiaj ¿wariṉ taattsa? Túrasha ¿urukamtaitsuk uwa péṉker nerekchartimpiash tusa nákamaitiat uwa churuinian nerekara?

⁵ Wats yamaikia Winia uwa ajarun warí itiurkattaja nuna ujaktatjarme. Yamaikia wenuke̱ncha sa̱a̱rkittiajai túram amukma átatui. Tura tanishri̱ncha sa̱a̱rkittiajai túramtai yajasma naja̱trartatui.

⁶ Núnisnak kanawencha puruntrashtatjai. Nuiṉkia aya kampuntin atsú awajsattajai. Túram mashiak arakmachmin narasha tura jaṉkisha tsapakartatui. Núnisnak yumi yuturkai tusan yuraṉmincha akuptúkchattajai.

⁷ Nekasaiti, Israer shuarka Ashí Akupin Uunt Yusa uwa ajarí̱nti. Tura Jutá shuarka ni arake̱ yu ajataiti. Kame Nisha nekasa nuja̱i̱ péṉker sumamtikiawarat tusa nákamai túramaitiat aya chikichnan wakerutiarmai. Túrasha péṉker túrawarat tusa nákainiamaitiat áyatik wáitkiainiam untsumma antuimiai.

Yajauch ainia nu wáitkiastin

⁸ Chíkichkia pujuschamnia átumka iik matsamsatai tusarum je̱a̱sha tura nuṉkasha ishichik kuitji̱a̱i̱ sumarmamprarum mash anetearmena nútirmeka aneartarum tí waitsattarme.

^9-10 Uunt Yus nekas túrattajai tusa winia chichartak “Uunt je̱a̱sha péṉker iwiarkamu áiniayataṉ pujuschamu ártatui. Tura uunt aja ajamprumsha nuyá̱ núkap arakmarmesha peṉké ishichik juurmattarme.

^11-17 Nekaska aya námpetnak enentáimtin ainia nu timiá wáitsartatui. Kame nampermak tí peṉker iwiarkamun yurumáiniak Yusa túramuri̱ncha peṉké enentáimtuiniatsui. Túmainiakui ni úuntri̱sha tsukái tura kitiakai kajinkiartatui tura chíkichkia enentáimcha ásar achirar yajá yaruakma ártatui. Túrasha ashí ni peṉkeri̱ṉkia takamtsuk emestunkattawai. Kame Uunt Yuska Tunaarincha Yus asa ni túramusha shiir awajnástatui. Túrunamtai muriksha tura chípiusha pepru emeskamu ainia nui̱ yurumáwartatui” Isayas tu ujakármiayi.

¹⁸ Átum najanamu yus enentáimtakrum ii túrajnia nu túratarum tusarum chikitcha chapikji̱a̱i̱ jiṉkiá japía nútikniutirmesha núnisaṉ tunáa túrumtikiattsarum kawainium japiki̱ jua núnis túrintirmesha aneartarum, tí waitsattarme.

¹⁹ Tura Yus wíshikiakrum “Wats Yus tara túratta nuna wárik túrakui íisarmi. Kame Israer shuarna Tunaarincha Yus umiktinia nuna wárik túrakui nekaawarmi” tárumna nútiram aneartarum.

²⁰ Átum yajauchia nuka péṉkeraiti tura péṉkera nuka íksarmek yajauchiti tíniutirmeka tura kiritniusha tsáapninia ánis nuyá̱ tsáapnikia íksarmek kiritniua núnis enentáimtintirmesha núnisaṉ yapasha yuminia núnis tura yumiṉkia íksarmek yapá áinis nekapniutirmeka aneartarum, tí waitsattarme.

²¹ Atumek enentáimtumasrum neka ímianu enentáimtumatirmesha núnisaṉ atumek íimiasrum ti enentáimniua ánis nekapmamniutirmesha aneartarum, tí waitsattarme.

²² Átum karía tura nu arant awartiuja̱i̱ pachimpra umaarum ti nampekrum kakarmaitjiai tíniutirmesha, maa aneartarum tí waitsattarme.

²³ Tura umitmaku nékayatrum kuit akikmatkarum yajauch túrachai tusarum nuja̱i̱ péṉkeran tura yajauch awajniútirmeka, maa aneartarum tí waitsattarme.

Uunt Yus chíkich nuṉkanmaya̱n ikiatak asuttiawai

^24-25 Kame Ashí Akupin Uuntri̱ Uunt Yus akupkámun antukcharu ásarmatai tura Israernumia̱ Tunaarincha chichame̱ncha mui̱jmiai̱ awajsaru ásar chírichri áeskam kaṉkapé̱sha mamúatsuk tura chirunkasha ji keakui aya méṉkatsuk núnisaraṉ Israer shuarka túrunawartatui. Tuma asamtai Uunt Yuska Ni aentsri̱n tí kajerak asutiáwartatui. Naintcha muchitrartatui tura aents kaji̱ṉkiáruka jintiaṉka tsuata tímiatrus wáinkiartatui túrasha núja̱i̱sha Uunt Yuska peṉké tsaṉkurchattawai.

^26-30 Tura yajaya̱ aentsun Yus ikiatkattawai. Yajaya̱ áiniayataṉ pimpichartatui tura iwiarnakaru ásar kaya ukamua tímiatmartatui. Nuyá̱ úunt ya̱wa̱ yukartak itiura núnis atantkichmin ajasártatui. Kame nui̱ káunkar nayants téter ajana tímiatmartatui. Núnisaṉ nuṉká iimsamsha kúntuts tura tsáapnincha kiritin ajastatui tusa Isayas etserkamiayi.