Isa. 49 - Yus Papí: Shuarja̱i̱ Yus Yamaram Chicham Najanamu

Uunt Yusa takarniúri̱

¹ Ashí nayantsa yantamén tura nuṉka náṉkatkamunam matsatrumna nú aentstirmesha antuktarum. Wikia akiiniatniuka atsa̱i̱ṉ Uunt Yus untsurkaiti. Tura winia nukurui̱ eṉketai̱n winia náarun pachis anaitiukuyayi.

² Túruta winia wenuruí̱ puyá̱ mái̱ erea nútikruamai tura uwejé̱ja̱i̱ ejatak núnisaṉ tséntsak atsakar tuntanam eṉkestinia nútikruamai.

³ Túruta chichartak “Israerá ámeka winia takarniúruitme tuma asakmin ámiji̱a̱i̱ ti shiir awajmámsattajai.”

⁴ Túrutkui nuiṉkia peṉké ántranak ti takasuitiaj túran peṉké ántrantkek winia kakarmarun amukuitiaj tu enentáimsamjai. Túrasha wi túramunka Yusak nékawai tura surustatna nuka Yúskete tu enentáimjiai.

⁵ Tura Uunt Yuska winia nukurui̱ eṉketai̱n winia takartin atí tusa najatamai. Kame Jakupa shuari̱ Yusai̱ waketkiar Israer shuar Yusai̱ iruntrarti tusa Uunt Yus íimmianum shiir awajnásmajai. Tura winia Yúsruka winia kakarmar ajasuíti.

⁶ Nu Yus chichartak “Winia takartin ajasam Israer wea iniantkiaram tura Israer shuar iwiaaku juákaru ainia nu ataksha Yusai̱ni̱ awakearam irurartiniaitmena nuka aya ishichik takataiti. Antsu Wikia ashí nuṉkanmaya̱ aents tsáapninium wekasarat tusan akupkámajme. Túran ashí nuṉka náṉkata ímianai uwempratin chicham ejettame” turutmiai. Ruk. 2:32; Tur. 13:47

⁷ Tura Uunt Yus, Israera uuntri̱ uwemtikkiartinia nu tura ame Tunaarincha Yúsrum imiancha tura nakitrámua nu núnisaṉ chikichan takarniúri̱ya nu chichaak jú̱nis tawai “Uunt akupin ainia nusha ámin waitmakar wajakiar Uunt Yus péṉker túrin asamtai tura Israera Yusri̱ peṉké tunaarincha ámin anaikiamka asamtai tikishmáttramprar tsuntsumprútmawartatui” tímiayi.

Jerusaréṉ ataksha iwiarnartin etserkamu

⁸ Uunt Yus chichaak “Péṉker tsawantin ái̱kmajme tura uwempratin tsawantincha yáiṉmajme. Péṉker wainkiattajme nuyá̱ ámiji̱a̱i̱ chícham najanamusha ashí nuṉkaja̱i̱ najanamua núnis átatui. Kame nuṉka emeskamu iwiarkam ame núṉkem meṉkara ainia nu ataksha nérentin ajasminiam tusa tíniuiti.

⁹ Núnisaṉ sepunam pujuiniasha jíinkitiarum tura kiritniunam pujuiniasha wantintiuktarum títiatme. Nuyá̱ jintiasha tura ashí naintia nui̱ṉkia ni sa̱a̱kri̱ iruniartatui. Ruk. 4:18

¹⁰ Nuiṉkia tsukaja̱i̱sha kitiakja̱i̱sha wáitsachartatui tura etsa̱sha sukuiniak wáitkiaschartatui. Warí nin waitnentainia nu juinia asa púkuni entsa írunmanumaani̱ júkiartatui.

¹¹ Ashí Winia naintrui̱ jintian jí̱i̱rtatjai tura chauna áiniakuisha Winia jintiarka yakin jintiamkamu ártatui.

¹² Nekaata, niṉkia yajaya̱ káunkartatui. Tura araki̱a̱sha nuyá̱ etsa̱ akatainmaani̱ya̱ tura chíkichkia Seweni nuṉkanmaya̱sha káunkartatui” tímiayi.

¹³ Nayaimpⁱ ti warakum charáa charáa ajata, áintsamek nuṉkáa ti warasta. Núnisaṉ náintirmesha warakrum charaatum ajatarum. Warí Uunt Yus ni shuari̱n atsaṉkar ni wáitiamuri̱ncha waitnentraruiti.

¹⁴ Túrasha Seunka chichaak “Wíniaka Uunt Yuska kajinmatki̱ initiúsuiti” tawai.

¹⁵ “Túrasha ¿nuku ni uchirí̱n muntsúakun kajinmatuak tura ni uchirí̱n takusma nuna waitnentsuk kajinmatki̱ iniaisattuak? Kame nuwa̱ uchirí̱n kajinmatainiakuisha Wikia áminkia peṉké kajinmátkishtatjame.

¹⁶ Nekaata, Winia uwejru pakari̱n ame náarminkia anujkan takakjai núnisan ame wenukrumnia̱sha Wi tuke wainjiai.

¹⁷ Ámin iwiartampratta nusha wárik táartatui. Túmainiakui ámin emestamprar amutmainia nuka jíintrartatui.

¹⁸ Paṉkaim wajasam ashí íimsata. Ashí iruntrar niṉkia aminí̱ṉ waketainiawai. Wi ti nekas iwiaaku asamtai amesha núnismek ashí nu aents iwiarmamtaiya̱ nútikiam ti shiir iwiarmamprattame. Tura núja̱i̱ṉ nuwa̱ nuatnaiyak iwiarmamna tímiatrusam iwiarmamprattame” tawai Uunt Yus.

¹⁹ “Tura áminiun emeskar jú̱nik ikiukiarmasha nuyá̱ áme nuṉkemsha emeskamu arma nu nuṉkanmaṉka piákrum ashí aents matsamsachmin awajsattarme. Tura ámin emestamkaruka yajá pujusártatui.

²⁰ Kame uchiram ataṉkiarma ainia nusha chichartamainiak ‘Jú̱ nuṉkaka ti uchichiti tuma asamtai wi pujustin nuṉka surusta’ turamartatui.

²¹ Tura amek enentáimsam ¿yaki ju̱ uchincha surusaruit? Warí wikia wiki pujuyajai tura kaa ajasuyajai. Núnisaṉ yajá jukir akankámu pujuyajai. Nekaata, wíniaka winiak ikiurkiarmiayi. Tuma ai̱sha ju̱sha ¿tuyá̱ káunkara. Yaki tsakatmakaruit?” títiatme.

²² Nuyá̱ ii Uunt Yusri̱ chichaak “Nekaata, Wi uwejrun uunt nuṉka mátsatka ainia nuní̱ takuimtai tura pepru irunainia nuní̱ Winia tarachrun nenan takuimtai nu nuṉkanmaya̱ aents ame uchirmin miniakearu nuyá̱ ame nawantrumniasha yakainium ekentra káunkartatui.

²³ Kame úunt akupniuka ame uchirmin wáinin ártatui tura ni nawantri̱ ainia nusha ame uchirmin tsakatma ártatui. Núnisaṉ tikishmar ámin tsuntsumprútmawar nawemíya̱ nuṉka ju̱yu̱ri̱n nukarartatui. Nuja̱i̱ Wi Úunt Yusaitjiana nu nekaattame. Tura winia nákarainia nuka peṉké natsa̱a̱rchartatui” tawai.

²⁴ “¿Aents kakaram mesetnum awakmak kuitia ata̱i̱nia nu atankímniakait. Aents kakaram chíkich aentsun achik jua nú ata̱i̱r aṉkant awajsámniakait?”

²⁵ Kame Uunt Yus chichaak “Kakaram mesetan unuimiátra ainia nu aentsun achirar yajá yarumainia nuka nekas atannártatui núnisaṉ kuitcha aṉkant juákartatui. Ámiji̱a̱i̱ máninia núja̱i̱ṉkia Wi mániktatjai túran ame uchirmíncha Wi uwemtikrartatjai.

²⁶ Nuyá̱ ámin wáitkiarmainia núnaka ni namaṉke̱nak ayurawartatjai túran ni numpe̱ja̱i̱ṉ winiu umar nampeana núnikiartatui. Nuyá̱ ashí nuṉkanmaya̱ aents Wikia Uunt Yus ámin Uwemtikin, ame Tumashrumin Akikmakua nu tura Jakupa shuari̱ Yusri̱ kakarmaitjiana nuna nekarawartatui” tawai.