Isa. 47 - Yus Papí: Shuarja̱i̱ Yus Yamaram Chicham Najanamu

Papirúnia sumamtikma

¹ Papirúnia nawantri̱ áishmaṉja̱i̱ tsaniṉcha akaikim nuṉká ju̱yu̱ri̱n pujusta. Kartíunmaya̱ aentsu nawantri̱yá akupkur pujutái̱ram atsá asamtai nuṉká pujusta. Warí, kuirchia áiniuch wáitnenmaich atakka peṉké tunashtatme.

² Neketai̱ kaya achiktá túram nekeṉkam arinia najanata. Mámush yapi nukutai̱sha jusata túram natamakam mákumka misú awajsarta túrunam entsá katiṉta.

³ Ame misuwaitmena nusha paant ajastatui tura nantsanmisha paant wainniaktatui. Yamaikia Wi yapajmiáktatjai túrasha yáakesh péṉker tsaṉkurashtatjai.»

⁴ Iin akikmatramak uwemtikramniu náari̱ṉkia Israernumia̱ Tunaari̱ncha Nayaimpinmaya̱ Suntara Uuntri̱ Jiuwá nuiti.

⁵ Kartíunmaya̱ aentsu nawantri̱yá tee ajasam pujusam mitia ajasta túram kiritin téenam waya̱ta. Warí, yamaikia ashí nuṉkanam uuntri̱ nuwa̱ peṉké tunashtatme.

⁶ Winia shuaruncha kajerkamjai. Tura Winia nuṉkarnasha mui̱jmiai̱ awajsámjai túran ámin íktusan iniaitiusmajme. Amesha peṉké waitnentracharmame. Úuntach ainia nusha tí waitkiasarmame.

⁷ Tura chichaakum “Tuke nuwa̱ akupniu uuntri̱ átatjai” tímiame. Túrasha ju̱ka peṉké enentáimtuschaitme núnismek ukunam túrunattana nusha enentáimturchaitme.

⁸ Túrasha aya tí kuit ainia nunak wakerin nuwa̱ akupkur pujatirmin pujusam áutsuk nusha ainti tusha enentáimtsuk eketmena nu ame ju̱ antukta. Amek enentáimtumasam chichaakum “Wikia wíkitjiai. Wini̱ya̱ṉka yaaksha chíkichkia peṉké atsawai. Waje̱mtancha waje̱mastiniaitjiai tura mitiaikiamatniusha wariṉkit nunasha nekaashtatjai” tame.

⁹ Túrasha ámeka wawekrattairmiji̱a̱i̱ tura uwishniu takatri̱ṉkia tura túramni̱ṉᵏ nu tsawantini̱ṉᵏ nuka mái̱ tarutrámartatui mitiaikiamatniusha tura wa̱je̱matniusha ti itiurchat katsuntrachmin arutmattawai.

¹⁰ Áme yajauchirmiji̱a̱i̱ṉ nekas péṉker pujustatjai tu enentáimsam chichaakum “Yaaksha waittsui” tiniu asaakmin áme nékamuk tura áme nekatairmek anaṉkramawaruiti. Warí, áme enentáimsamek chichaakum “Aya wíkitjiai nuyá̱ wini̱ya̱ṉka chíkichkia atsawai” tíchamkam.

¹¹ Túrasha itiurchatka amiin tátatui túmamtai áme yajauch papirmi̱ji̱a̱i̱ tsuriṉtaj tukamamesh tujinkiattame. Ti itiurchat iniantramprattui túrasha tsuriṉtaj takumesh peṉké tujinkiattame. Itiurchatka aya neachma áminkia tarutmattui.

¹² Ámeka nátsa asamek uwishniumam tura ti wawekratniuyamna nuke pujursata. Wats, warinmaṉsha yaintmaktimpiash tura aentscha nuja̱i̱ ashampramkartimpiash.

¹³ Áme chichammek yawe̱trame. Antsu yamaikia nayaimpin unuimiátin tura yaancha unuimiátin ainia nu káutramkar ayamprutmakarti.

¹⁴ Tura ju̱ nekaata, chiruntka núnis ásarmatai ji aeskartatui. Jinia kakarmari̱ya̱ṉka ni iwiaakmari̱nkia uwemtikrachartatui. Kaí̱ri̱ṉsha juakcha asa anamtash anamáchmin tura ishichkisha kapaachuncha wariniak téntaksha pujursarti.

¹⁵ Ame ti yaiṉkiaruitmena nuka áminkia núnis túrutmawartatui. Natsa ámini̱ṉᵏ ámiji̱a̱i̱ takakmasarua nuka aṉkant aṉkant wéartatui. Túrunawarmatai ámin uwemtikrampratniuka atsuttawai.