Isa. 46 - Yus Papí: Shuarja̱i̱ Yus Yamaram Chicham Najanamu

¹ Piirka tekem iniantuiti núnisaṉ Nepusha túrunaiti. Nu yus nakumkar najanawarma núnaka entsauyarmena nu yamái kijin aentstai̱ yajasma entsáu áiniawai. Tura káruja̱i̱ kijinian juíniakui yajasman ipimpikiainiawai.

² Mái̱ metek natsanmai̱ awajnákararmai. Túmainiak ayamprumaktinniasha tujintkiar imia niṉki yajá júkiarma armai.

³ Maa, Jakup shuartirmesha kame Israer shuara nu iwiaaku juákutirmesha akiintsurmini̱ṉ nukuí̱ eṉketrumni̱ṉ Wi achikma asarun antuktarum.

⁴ Átum weampra jempée puju ajasákrumnisha Wiki átatjai tura Wiki wainkiattajrume. Wikia núnisan túraitjiai tura Wiki ewekámsattajrume. Wiki wainkian aṉkant awajsattarujme.

⁵ ¿Yája̱i̱ṉ méteksha awajtústarum tura métekeashit tusarmesha yája̱i̱ṉ apatka íirsatarum?

⁶ Pitiakrí̱ya̱n kurin júsar kuit jiruncha kijin nekapmatai̱niam nekapmainiawai. Nuyá̱ kuít jiruja̱i̱ najanin ainia nuna nakumak yusan najatrukat tusar suíniawai. ¡Tura najanamtai tikishmátrar shiir enentáimtuiniawai!

⁷ Nuyá̱ yanak juíniawai tura pujutái̱ri̱n apujainiawai. Tura ni pujamunmaya̱nka peṉké muchitiatsui. Yáakesh untsuamash peṉké ántichuiti núnisaṉ wáitsatniunmaya̱sha aṉkant awajkartichuiti.

⁸ Ántichutirmesha nu nekaatarum tura kakaram ajasrum ujakmarumna nu atak enentáimpratarum.

⁹ Ti yaunchu túramu naṉkaamasu ainia nusha enentáimturtarum. Warí Wikia Yúsaitjiai tura chíkichkia atsawai. Witjiai Yúsnaka tura chíkichkia Wiji̱a̱i̱ métekka peṉké atsawai.

¹⁰ Tura ukunam túrunattana nunasha tí yaunchuya̱ṉ yama naṉkammanumia̱ṉ juárkin etserkin winiajai. Wi iwiaramua núnaka Wi itiurkatniuna wakeraj tímiatrusnak umiktatjai.

¹¹ Ántsaṉ etsa̱ tatainmaya̱n yukartin nanamtin tura yajaya̱ aentsun Wi iwiaramun umikiat tusan Wi untsúajai. Wi chichaku asan núnaka tímiatrusnak túrattajai. Kame Wi iwiaramuiti tuma asan núnaka núnisnak umiktatjai.

¹² Atumí enentái̱ kátsuram asamtai nekasa nuja̱i̱ métek túrichutirmesha antuktarum.

¹³ Wi nekasa nuja̱i̱ métek túrutair atumín weantúrmaktatrume. Winia uwemtikkiartutai̱rka naṉkankashtatui. Seúnnumsha uwempratniunka ejettajai tura Israer shuarnaka Winia páantniur átatui.