Isa. 42 - Yus Papí: Shuarja̱i̱ Yus Yamaram Chicham Najanamu

Uunt Yúsnan takarin

¹ Ju̱i̱ti Winia takartin anaikiamu yáiṉtatjana nu. Wi anaikiamu asamtai wakantrusha shiir enentáimtawai. Winia wakantrun nin súsaitjiai. Túramu asa nekasa nuja̱i̱ ashí nuṉkan sumamtikiawartatui.

² Tura chichaaksha kakantar chichakchattawai. Núnisaṉ páasanmasha ántumtikiashtatui.

³ Tura pintiu punuancha kupikchattawai. Núnisaṉ ji kaji̱niuncha ikiajniákchattawai. Antsu nekasa nuja̱i̱ métek sumamtikiattawai.

⁴ Ju̱ nuṉkanam métek sumamtikiatniuri̱ umiimiam pimpikchattawai núnisaṉ yawe̱tnasha yawe̱rchattawai. Tura nayants yantam pujuinia nuka umiktin chicham Ni akupkámun nákasartatui. Mat. 12:18-21

⁵ Kame nayaimpin najana ayapá̱ru asa nuṉkancha najana neremtikna núnisaṉ ju̱ nuṉkanam matsatainian mayatkatniun tura iwiaakmancha súana nu Uunt Yus chichaak jú̱nis tawai.

⁶ “Wi Uunt Yus nekasa nuja̱i̱ métek túrakun untsukmajme. Tuma asan eṉkesan ewekámsattajme. Núnisnak péṉker wainkian ashí aentsja̱i̱ chícham najanamua núnisan apujsattajme ántsamek ashí nuṉká tsáapnintri̱ átatme. Ruk. 2:32; Tur. 13:47

⁷ Tura nuja̱i̱ kusuru ainia nusha paant íimtikiartatme nuyá̱ sepunam pujuiniasha ji̱i̱rartatme núnisaṉ kiritniunam sepunam pujuiniasha aṉkant awajsartatme. Ruk. 4:18-19

⁸ Wikia Uunt Yusaitjiai, Winia Naarka nuiti. Tura Winia péṉkeruncha chikichan súsashtatjai núnisaṉ Winia shiir awajtutai̱rja̱i̱ nakumka najanamu yusa nuna shiir enentáimtusara̱i̱ṉ tusan peṉké tsaṉkatkachartatjai.

⁹ Kame nekaatarum. Emka uminkiatniuya̱ nuka uminkiaiti antsu Wikia yamaram uminkiattana nuna ujajrume. Nusha jeatsa̱i̱ṉ atumniaka emka nékamtikiajrume” túramui Uunt Yus.