Isa. 4 - Yus Papí: Shuarja̱i̱ Yus Yamaram Chicham Najanamu

¹ Nu tsawantiṉkia chikichik áishmaṉnak siati nuwa̱ chicharainiak “Iikia ii yurumkari̱ṉ yurumtiaji tura entsartincha iik imiastaji antsu natsan ajajnia ju̱ nakitkiartutsuk ame nuatkartukam náaram sukartusta” tiártatui.

Ukunmaṉka Seun páantin ajastatui

² Kame nu tsawantinkia Úunt Yusai̱ya̱ jé̱e̱rtatna nuka ti shíiram núnisaṉ tí paantin wararsamu átatui. Tura nu nuṉka arakri̱ nere̱ja̱i̱ ti wararsamu nuyá̱ Israer shuar iwiaaku pujuartatna nuna iwiarmamke átatui.

³ Tura Jerusaréṉnum juákaru ainia nuka kame Seúnnum ikiukmia tunaarincha áiniawai tunartatui. Kame Jerusaréṉnum pujuinia nu ashí ni naari̱ papinium anujkamu áiniawai.

⁴ Tura Uunt Yus sumamtiktai̱ tura asutkiartutai̱ wakanja̱i̱ asutiá Seuna nawantri̱ mui̱jmiai̱ntri̱n tura Jerusaréṉnum numpa upuramun japirartatui.

⁵ Nuiṉkia ashí Seun nainnium tura iruntai̱nmasha Uunt Yus tsawai̱kia yuraṉmin tura káshikia ji kean ikiustatui. Warí ashí nui̱ Ni kakarmari̱ tarach ayapá̱rar nukukma núnis átatui.

⁶ Kame tsawai̱kia tsue̱r asamtai ejamkatniun mikintra awajsat tusa nuyá̱ yumi, naseja̱i̱, chárimp, peemja̱i̱ ajakui áreṉkat tusa núnaka túrattawai.