Isa. 39 - Yus Papí: Shuarja̱i̱ Yus Yamaram Chicham Najanamu

Esekías Papirúnianmaya̱ akuprámun awayá̱warma

¹ Kame nu tsawantin Paratána uchirí̱ Mirutak-paratán Papirúnia nuṉka úunt akupniuri̱ Esekías jaawai táman antuku asa tura yamaikia ayaprayi táman antuk papí áarman tura ántar súsatniun chichaman etserniuja̱i̱ akuptúrmiayi.

² Nuyá̱ Esekías ti warasmaja̱i̱ ni je̱e̱n awayá̱war ashí ni wariri̱ shíirmach ainia nu émamkesar u̱u̱kar ikiutai̱niam awayá̱war kuítniasha, kurincha, kuṉkuinniasha, tsuámatai̱ asuitincha núnisaṉ mesetnum mánitiai ikiutai̱ncha tura niniu ashí armia núnaka ashí iniaktusmiayi. Chikichkinkesha iniaktutskeka iniaisachmiayi.

³ Tura Yúsnan etserin Isayas úunt akupniun Esekíasan werí iniak “¿Tuyá̱ shuara káunkara tura amincha waritia turamainiawa?” Tutai Esekías aya̱k “Papirúnia yajá nuṉká ímiania̱ taarai” tímiayi.

⁴ Takui̱ Isayas chichaak “¿Warinia ame je̱e̱mincha iisara?” tutai Esekías aya̱k “Irunainia nuna ashí iniaktusarjai iniaktuschamuka juákchayi.”

⁵ Takui̱ Isayassha Esekíasan chicharuk “Nayaimpinmaya̱ Suntara Uuntri̱ Jiuwáa chichame̱ antukta.

⁶ Pai, antukta. Jiuwá chichartamuk ‘Nu tsawant átatna nui̱ṉkia ame je̱e̱min írunna nuna núnisaṉ ame we̱a̱trum warinia yamaisha tura yáunchusha ikiurtámkiarmia núnaka Papirúnianam ashí yarutramkartatui. Túrutmawarmatai ámeka aya jú̱nik juáktatme.

⁷ Tura amé shuarumin Papirúnianam yaruakar uchi yajutmachu awajsar péṉkeri̱ṉkia júurar Papirúnianmaya̱ akupniu takarniúri̱ awajsártatui’ túramui” tímiayi.

⁸ Tura nuyá̱ Esekíassha Isayasan chicharuk “Jiuwáa chichame̱ ujatkámna nuka péṉkeraiti.” Nu arantcha tímiayi “Warí, wi akupniunam pujuttajna nui̱ṉkia ashí aṉkant áchatjash” tímiayi.