Isa. 36 - Yus Papí: Shuarja̱i̱ Yus Yamaram Chicham Najanamu

Senakiríp jatekratma

¹ Esekías úunt akupin ajasma katurse uwí ámanum Asirianmaya̱ úunt akupin Senakiríp ashí peprun jatekar Jutanmaya̱ wenuke̱ kayaja̱i̱ téntakar je̱a̱mkamu armia nuna akintrukarmiayi.

² Asirianmaya̱ úunt akupin Rapsasés Rákisnum pujus suntara úuntri̱n untsurí suntarja̱i̱ úunt akupin Esekíasja̱i̱ chichasat tusa Jerusaréṉnum akupkarmiayi. Túra náintchinmaya̱ entsa epentkar kayaja̱i̱ najanar entsa akakmianum Entsatái̱n Nijiakmau Nuṉken jintia wéamunam suntara úuntri̱sha seturmiayi.

³ Tura Irkíasa uchirí̱ Iriakím akupniu je̱e̱n wáinin tura Sepna papí aakmau nuyá̱ Asapa uchirí̱ Juaj ni nuṉken naṉkaamana nuna chichama aain nin weriarmiayi.

⁴ Nuya̱ṉka suntara uuntri̱ Rapsasés akupénak “Yamaikia Esekías jú̱nis túramui titiarum. ‘Asirianmaya̱ úunt akupin tí uunt akupniua nu chichartamuk ¿Urukamtaik timia péṉkersha pujam?

⁵ Warí, meset awakmaktai tákurkia aya chichaschatniuiti antsu untsurí suntari̱ntin tura péṉker jatektin jurusma átiniaiti.’ Yamaisha amesha ¿ya enentáimtakmea timiajú̱ ai̱sha atsaantam?

⁶ Pai, ámeka ushukrutai̱ pintiu kupí kupiniata núnis Ejiptu timiá enentáimtame. Warí yaaksha nui̱ achimkiuṉka uwejnum meseak pana jíimittiui. Núniniaiti Ejiptunmaya̱ úunt akupin Parauṉ. Ashí nin enentáimtuinia nuka túrunamnia áiniawai.

⁷ Atumsha ‘Ii Yusri̱ Jiuwak enentáimtaji’ turutchattarmeash. Túrasha Esekías murá yakí̱ enentáimtutai̱n aestutai̱ncha utsaṉkiat Jutá shuaran Jerusaréṉ shuarnasha ‘ju̱i̱ṉ tikishmátratarum’ timia nu ¿nú nuṉkakchak enentáimtutai̱ tura áestutai̱ nú Yúsnakchak armia?

⁸ Antsu yamaikia winia úuntur Asirianmaya̱ úunt akupin aents achiram akuptúrkata tusan seajme. Tura amé aents nui̱ ekemin amaakminkia wikia jimiará mir kawain amastatjai.

⁹ Kame Ejiptunmaya̱ kárusha tura kawainium ekemtan unuimiátra timiá enentáimtakmesha uuntru kapitiántri̱ iniatai̱ imiá nuṉkachia núkesha ¿itiurak wajatratam?

¹⁰ ¿Antsu wi yamái ju̱ nuṉkan Jiuwaja̱i̱nchu emeskataj tusanak taja? Warí Jiuwá winia chichartak ‘Ju̱ nuṉkanam wakata túram emeskata’ túruttsuk” Rapsakés tímiayi.

¹¹ Nuyá̱ Iriakím, Sepna, Juaj suntara úuntri̱n chicharainiak “Waitneasam Aram aentsu chichamja̱i̱ áujkartusta. Iisha nu chichamka ántaji. Antsu aents yakí̱ wenuknum eketainia au ántuiniawai. Ipríu chichamja̱i̱ áujkartusaip” tiármiayi.

¹² Tutai suntara uuntri̱ chichaak “¿Antsu aminkik tura ame úuntrumniakek jú̱ chicham ujuaktá tusa winia úunt akupniur akuptúkuit? Antsu aents yakí̱ wénuimiunam wajainia nusha ántuiniamunam etserkatniun ¿akuptúkchaik? Warí nisha atumji̱a̱i̱ métek ní iji̱niak yúatniunam tura ní shikiniak umartinnium pujuschartatuak” tímiayi.

¹³ Nuya̱ṉka Rapsasés wajaki̱ kakantar Ipríu chichamja̱i̱ chichaak “Asirianmaya̱ úunt akupin tí uunt akupniua nuna chichame̱ antuktarum.

¹⁴ Tura úunt akupin jú̱nis chichaak ‘Esekías anaṉkramawairap warí niṉkia uwemtikramprachminiaitrume.

¹⁵ Esekías chichaak “Jiuwá weriartai” túramkurmin anturkairap. “Warí ju̱ péprunka Asiria akupniuri̱ṉkia Jiuwaka peṉké surutmakchattaji antsu nekas aṉkant awajtámsattaji” turamtatrume.

¹⁶ Esekías peṉké anturkairap. Warí Asirianmaya̱ úunt akupin jú̱nis túramui Antsu wiji̱a̱i̱ nawamnaikiatarum tura wini̱n tarum aṉkant aṉkant atumí araamuri̱ṉ úwasha tura íkiusha yuámniuram. Ántsarmek aṉkant aṉkant atumí yumirmatri̱ya̱ṉ entsasha umarmintrum.

¹⁷ Nuya̱ṉka wi tana atumí nuṉke̱ya̱ núninnium tí peṉker nuṉkanam árak tsapaunum tura wíniusha yurumkasha ámanum jukittiajrume.

¹⁸ Aneartarum. “Iinkia Jiuwá aṉkant awajtámsattaji” tusa Esekías anaṉkramawairap. Antsu uunt nuṉka mátsatka ainia nuyá̱ yus aṉkant aṉkant ni nuṉke̱n ¿aṉkant awajsarukait Asirianmaya̱ úunt akupniu uwejé̱ya̱na?

¹⁹ Wats Amatnumia̱ tura Arjatnumia̱ yussha ¿tui̱ pujá? Núnisaṉ Separwáimnumia̱ yussha ¿tui̱ pujá? Winia uwejruí̱ya̱ Samarian ¿aṉkant awajsarmaka?

²⁰ ¿Tuyá̱ nuṉkanmaya̱ yusa winia kakarmarui̱ya̱sha uunt matsatkamu uwemtikramusha ainia? ¿Nu yus uwemtikrachmancha itiurá Jiuwasha winia kakarmarui̱ya̱sha Jerusaréṉnasha ayamprúktata?’”

²¹ Túrasha úunt akupin “aimkiairap” tiri akupkámu ásar niṉkia ái̱kcharmiayi.

²² Nuya̱ṉka Iriakím Irkíasa uchirí̱ úunt akupniu je̱e̱n wáinin nuyá̱ Sepna papí aakmau tura Juaj Asapa uchirí̱ chíkich nuṉkanmaya̱ chichaman etserin yajauch nekaprar pushiri̱n já̱a̱rar entsaru Esekíasai̱ táarmiayi tura suntara úuntri̱n chichame̱n ujakármiayi.