Isa. 35 - Yus Papí: Shuarja̱i̱ Yus Yamaram Chicham Najanamu

Seun ukunam páantin awajsamu

¹ Kampuntin atsá ajasusha kame peṉké tsapachusha warana núnis ataksha tsapaktatui. Warí kampuntin atsuwa nuka kuku̱jia núnis kuku̱jruktatui.

² Kampuntin atsú nuṉka núkap kuku̱jruk warastatui. Núnisaṉ tí waras kantamáttui. Ríwianu páantniuri̱ṉkia núnin atsú nuṉka sunastatui. Tura Karmiriu nuṉka núnisan Saruna shíirmari̱ya̱ núnin atsú nuṉka sunastatui. Tura Jiuwá winchari̱n tura ii Yusri̱ shíirmari̱n wáinkiartatui.

³ Uwej kakarmachu ikiaká̱rarta. Núnisaṉ chíkich pimpiruka wewe awajsarta.

⁴ Tura natsaamak arantin pachimiachu ainia nu chicharkuram “Sapijmiatsuk kakaram ajastarum. Pai, yamaikia atumí Yusri̱ yapajmiátramkataj tusa winiawai. Timia Yusak winiawai tura Niṉki uwemtikramprattarme” titiarum.

⁵ Nuiṉkia ji̱ kusuru ainia nusha wainmakartatui. Tura empekárusha antukartatui.

⁶ Núnisaṉ shutuapsha japa nuke nanten nanten ajartatui tura muutcha kantamáwartatui. Warí kampuntin atsunumsha entsa pajamkat tusa táunkattawai tura mitia ainia nui̱sha éntsaka shaka ajartatui. Mat. 11:5

⁷ Nuṉka ju̱ju̱ptinia nui̱sha entsa pajamtai̱ ajastatui. Núnisaṉ kukach ainia nusha púkuni saar jiintrattawai. Tura kampuniunmaya̱ rúpu matsamin armia nui̱sha pintiu nuyá̱ antumiaṉnum tsapáu nupa̱a̱ tsapakartatui.

⁸ Tura nui̱sha jintia kayaja̱i̱ péṉker iwiarkamu átatui Nuka “Yusna Akantúkma Wekaatai̱ Jintia” tama átatui. Tunamka ainia nuka nuniṉkia naṉkaamakchartatui. Yusak Niṉki ni shuari̱ji̱a̱i̱ pujustatui. Tura aents wárik ántichu ainia nusha nú jintianam wáatsuk wekaasartatui.

⁹ Uwempraru ainia nuke nu jintianam wekaasartatui. Nuiṉkia úunt ya̱wa̱sha atsuttawai tura kajen yajasma ainia nuka nuniṉkia wekaicha ártatui.

¹⁰ Tura Jiuwá uwemtikrarma ainia nuka waketrar kantamkiar Seúnnum káunkartatui. Nuiṉkia etseṉkruktinia ántsaṉ amukashtin warartai takusartatui. Tura imiá shiir waratai̱n wáinkiar kúntuts pujakur wáittiakur úttaiṉkia emeṉkákartatui.