Isa. 3 - Yus Papí: Shuarja̱i̱ Yus Yamaram Chicham Najanamu

Jutan tura Jerusaréṉkan Uunt Yus asutiámu

^1-5 Warí Uunt Yus Jutanmaya̱ shuarnaka tura Israernumia̱ncha yurumak ikiusma tura entsa ainia nunasha mash amutkattawai. Núnisaṉ suntarnasha tura Yúsnan takarniuncha nuyá̱ ashí uuntri̱ ainia nunasha ashí amukártatui. Tura atumín súmamtikniuncha uchin apujsartatui. Núnisaṉ nuamtak shuarak itiurchat awajnáiyakrum natsa úuntach ainia nuna arantúkchartatui tura aents netse ainia nu péṉker aentsun itit awajiártatui.

^6-9 Tura yaaksha ni shuari̱n chicharuk “¿Ámeka wariṉkish takurmaktsumek? Tuma asam yamaikia ii uuntri̱ atá” tutaisha peṉké nakitrartatui. Warí Israerka tura Jutasha ni túramuri̱ji̱a̱i̱ nuyá̱ ni chichame̱ja̱i̱ṉ Yusa yajauch awajénak Uunt Yusan chicharainiak “Wátskea nekapnaisatai” tuinia ásar emesramu áiniawai. Núnisaṉ Sutumaja̱i̱ métek ni yajauch túrutairi̱ncha ú̱tsuk paant awajénawai. Warí urukawartin niṉki yajauch awajmámsarusha tiártatui tusa ju̱nasha Isayas etserkamiayi.

Chikichan waitkia armia nu asutniáwartin

^10-11 Aents péṉker ainia nuka péṉker pujusártatui tu ujaktarum. Antsu netse ainia nuka ní túramuri̱ji̱a̱i̱ṉ wáitkiasma ártatui.

¹² Maa, Wí shuartirmeka nekaatarum. Atumí itit awajtámainiaka uchi áiniawai tura nua̱rí̱ nuna úuntri̱ṉkia ajainiawai. Tuma ásar yajauch jintianmaani̱ juramkiar awajimtikramprume.

^13-15 Yamaikia Uunt Yuska ni shuari̱n asutiáttawai. Warí átum yajauch túrakrum peṉké takurmakcha ainia nu kasarkarum atumí je̱e̱n íruarme. Ausha, úuntri̱tirmesha tura chícham iwiarniutirmesha ausha ¿urukamtai wi shuarsha peṉké takurmakcha ainia nusha áitkiarum? Uunt Yus tawai.

Nuwa̱ eseer enentáimcha ainia nu asutniátin

^16-17 Seúnnumia̱ núwa̱ka eseer enentáimcha ásarmatai Uunt Yus suṉkuran akuptúkartatui túram pakakartatui.

^18-24 Tura iwiarmamtairi̱ncha ashí emeṉkátrattawai. Tura kuṉkuintri̱sha emeṉkátramu ásar meje̱niartatui. Túmainiak timiá shiirmach iwiarmamin áiniayataṉ aya nátsamiartatui.

^25-26 Áishmaṉsha tura suntarsha kakaram áiniayataṉ mesetnum amuukartatui. Túrunamtai tí kuntuts átatui tusa Isayas etserkamiayi.