Isa. 27 - Yus Papí: Shuarja̱i̱ Yus Yamaram Chicham Najanamu

Uunt Yus ni shuari̱n tsaṉkur ataksha awakearma

¹ Nu tsawantinkia Uunt Yus uunt ainia nú nuṉkaya̱n kakarmaja̱i̱ akupin ainia nunasha puyá̱ esarmaja̱i̱ tura péṉker atsakamuja̱i̱ kakaram asutiáwartatui.

^2-5 Uunt Yus Israer shuaran nakumkamu chichamja̱i̱ tawai “Wi, Uunt Yus uwa aja Winia shíiram ajarun tsawai̱sha tura káshisha yáakesh emeska̱i̱ tusan wainjiai. Yáakesh emeskattsa taaṉka emesrattajai. Túrasha Wi wainma núnis Winia yáinkrattairun tura Wiji̱a̱i̱ aṉkant pujustinian wakerakka Wiji̱a̱i̱ aṉkant pujusti” tawai.

^6-8 Israer shuar ukunmaṉka kaṉkaprurtatui túruna ni nere̱ja̱i̱ nuṉká piáktatui. Uunt Yus eteṉmas Israernaka asutiáttawai. Chíkich nuṉka mátsatkamun asutiáwarma nuni̱ṉkia asutiáshtatui.

^9-11 Najanamu yusan tikishmátratniun iniaisarmatainkia Israer shuara tunaari̱nkia tsaṉkuramu átatui. Tí nekas Jerusaréṉka ajapa ikiukmia átatui. Tuma asamtai waakasha nui̱ yurumáiniawai núnisaṉ nuwa̱sha nuya̱nak jinia júukar juíniawai. Nu aentska peṉké enentáimcha áiniawai. Tuma asamtai ní najanasha Yus waitnentrachartatui.

^12-13 Nu tsawantiṉkia Yúpratis entsa nuyá̱ naṉkama Ejiptu ashintsa ímianai Israer shuarnaka chikichkimias Uunt Yus júukartatui. Nuya̱ṉka kachun umpuartatui túramtai chíkich nuṉkanmaya̱ meṉkaka áiniana nusha káunkartatui. Nuya̱ṉka Yusna akantúkma naintia nui̱ Jerusaréṉnum Uunt Yusan tikishmátrartatui.