Isa. 22 - Yus Papí: Shuarja̱i̱ Yus Yamaram Chicham Najanamu

Ímiaja̱i̱k Waintiai̱ Paka túrunatin étserma

^1-11 Jerusaréṉnumka antukchamnia tétete ajainiawai. Atumnia jákarma nuka mesetnumka núnisaṉ puya̱ja̱i̱sha jákacharuiti. Atumí suntari̱ uuntri̱ métekrak pisainian tura puya̱ncha takakchainian métekrak achirármai. Iirsairap tí kuntuts enentáimpran úteakuisha túrasha wi shuar emesnakarmanum atsaṉkrataj turutirap. Ju̱ka Ímiaja̱i̱k Waintiai̱ Pakanam tétete ajatin tsawant Ashí Uuntri̱ Uunt Yus akupkámuiti. Nu tsawantiṉkia Kampunniu Je̱e̱ tamanum mesetnum mánitiai ikiusárma enentaímturmame núnismek tanisha wenuke̱ iwiartukar utúachmin awajsatin enentaímturmame túrasha nuna najana nuka peṉké enentáimtuschamame.

¹² Tuma asamtai nu tsawantinkia Ashí Akupin Uunt Yusa nu ajakmárua nuní̱ enentáimprar úttinian tura piniu awamártinian nuyá̱ kúntuts pujakur entsatái̱ pushí entsartinian untsumkattawai

¹³ Tuma ai̱ṉ shiir warainiak waakan tura murikiun máwar yurumá wíniun umarar chichainiak “¡Yurumár umarartai! Warí kashin jákashtatjik” tiártatui.

¹⁴ Tura Ashí Akupin Uunt Yus paant antumtikruk chichartak “Átum jaká amuumam ju̱ tunaaka peṉké tsaṉkurnarchattarme” tusa ujatkayi. Kame Ashí Akupin Uunt Yus nuna tíniuiti.

Iriakím Sépnan akía apujsamu átatui

¹⁵ Ashí Akupin Uunt Yus jú̱nis chichaak “Sepna kuitia juu úuntri̱ya nui̱ weme chicharkum

¹⁶ ‘¿Amesha ju̱i̱sha warí pujuram tura ya ame ikiumastin najanatniuncha tsaṉkatramkama? ¿Tura yakí̱ wa̱a̱ sáisaintnium táuram nuíchuka kátsuram kayanam jakam iwiartumastin najatmamachumek?

¹⁷ Anearta, Uunt Yus achirmak wereṉká ajaprama yarurmaktatui. Maaj kakaram áishmaṉká nekas yapimin nukurmáktatui.

¹⁸ Aepramas umuchtámak akaṉkétmak piruta nútikrama péṉker penunmartatui. Túrutma nuṉka waṉkaram tépakmanum ajapramatui. Nui̱ pujusam jakattame tura ame shíirmach kárurmesha nui̱ juáktatui. Tura ame úuntrumi je̱e̱ya̱ natsanmai̱ juáktatme’ titiá.

¹⁹ Tura pujutái̱rmiya̱ ajapattajme núnisnak ame takatrumiya̱sha jí̱i̱ktiatjame.

²⁰ Nu tsawant Winia takartin Irkíasa uchirí̱ Iriakímian untsuktatjai.

²¹ Ame pushirmin nuntuarun Iriakímian áentsrattajai túran akachumtai̱rmiji̱a̱i̱ akachumtikiattajai. Tura uwejmíya̱ ame naat kakaram pujumiam nui̱ nin susattajai. Túrunam Jerusaréṉnum tura Jutanam tuke pujuinian apá núniktatui.

²² Tawitia shuari̱ yawirí̱ṉkia ni yakai̱n ikiursattajai tura uraimtai epentánash epenchattui tura asaktanash asakáshtatui.

²³ Wikia nin ajintrutiai̱ numichin kakaram wajana ímiatrusan ajiattajai. Ni aparí̱ shuari̱ pujutái̱ri̱ṉkia arantutai ártatui.

²⁴ Ashí tsapa uṉkuship tura uchich ichiṉnachinmaya̱ juarki̱ entsa shikitiai̱ ainia nuyá̱ ni aparí̱ shuari̱nkia ashí uchirí̱sha tura tiraṉki̱sha Iriakímiai̱ni̱ páantin tura shiir enentáimtusma ártatui.”

²⁵ “Nu tsawantinkia” Ashí Akupin Uunt Yus chichaak “Nuṉka kátsurmanam ajíamua nuna ukuinkiattajai. Túran kupiniak iniartatui tura ni takatrí̱ takasmasha núnaka emeṉkáktatui” tawai Uunt Yus.