Isa. 21 - Yus Papí: Shuarja̱i̱ Yus Yamaram Chicham Najanamu

Papirúnia emesramu átatna nu étserma

^1-4 Tí tsuumainian ímiaja̱i̱k iniaktursamai. Tí kuntuts enentáimpran antukchamnia ajasan pujajai. Ti ashamkan íimsachmin ajasjai tura sápij mash amutáyi.

^5-9 Ekentsa yurumtai̱ iwiaratarum pujutai̱sha iwiarkatarum tura yurumá umartarum. Maa, uunt árumna nútirmesha wetarum túrarum tantarsha wínchar awajtiarum uunt núnis túrutui. Weme jintiá iin awajsata. Wainnia nuna etserkat. ¡Papirúnia iniarai! Uwejja̱i̱ najankamu yus ainia nuka nuṉká iniarar kupiniararai. Tan. 5

¹⁰ Maa, Wi shuar árumna nuka asutiámuitrume. Ashí Akupin Uunt Yus Israera Yusri̱ya antukmaj nuna ujakjarme.

Etum túrunatin étserma

^11-12 Sáirnumia̱ juárkin anintruiniak jintiá iinia “Káshisha ¿warí aa? ¿Tsawa̱rtincha urutmá taasa?” tutai jintiá iin chichaak “Tsawa̱a̱wai túrasha tuke káshiti. Tura wakerakmeka ataksha anintrústa” tawai.

^13-17 Tetannumia̱tirmeka Arapia kampunniunam kanartatrume. Tura Temannumia̱tirmeka entsaja̱i̱ paṉ jukirum pisainia iṉkiuṉtarum. Warí puya̱numia̱ núnisaṉ tíshimkiunmaya̱ tura mesetja̱i̱ ti yajauch awajnástinniumia̱ pisainiawai. Uunt Yus núnis túrutui. Uunt Yus Israera Yusri̱ chichaku asamtai Ketara péṉkeri̱nkia chikichik uwinmaṉ ashí amukáttawai.