Isa. 19 - Yus Papí: Shuarja̱i̱ Yus Yamaram Chicham Najanamu

Ejiptunam túrunatin etserkamu

^1-17 Uunt Yus Ejiptunam jeayi túrunamtai najankamu yus ainia nuka kurainiawai tura Ejiptunmaya̱ aentssha jakamnia enentáimiainiawai. Núnisaṉ chichaak “Wi Ejiptunmaya̱ aentsnaka aṉkant aṉkant aentsnaka nuamtak aentsnak tura péprunka nuamtak péprunak áitkiasnak akupeamunka nuamtak akupeamunak mámtikiartatjai. Kame Ejiptunka úunt akupin ti yajauch netsen íktusan iniaisattajai. Entsasha ashí ku̱yu̱kartatui túrunamtai árak Nírunam arakma ainia nuka ashí kukakártatui” tímiayi Uunt Yus. Nekamin Parauṉkai̱ pujuinia nuka Uunt Yus awajimtikrarma ásar nampekua núnisar pemperakut ajainiak waurka ajasárai. Ejiptunmaya̱ aentska nuwa̱ núnisar Ashí Akupin Uunt Yusan wáinkiar ashamkartatui. Ejiptunmaya̱ aents íismaka Jutaka tsuumai̱ ashamú ajamai átatui.

^18-22 Nu tsawantinkia Ejiptunmaṉka seṉku pepru ártatui. Túrasha Kanaannumia̱ chichamam chichasártatui núnisaraṉ péṉkera túrin Úunt Yusnasha chicharainiak “Iisha nekas umiktatjai” tiártatui. Ejiptunam ajapén Uunt Yus áestutai̱ átatui núnisaṉ nuṉka tesamu náṉkatkamunam tíjiu̱ch Uunt Yus enentáimtutai̱ pau ukuamu ártatui. Nuja̱i̱ Uunt Yusan Ejiptunam enentáimtiartatui. Ni nemasri̱ wáitkiainiam Uunt Yus seam uwemtikkiartinian akuptúktatui túram nu shuar Uunt Yusan nekaawartatui. Ejiptunka asutiáyat Uunt Yuska ataksha tsuar awajtiatui.

^23-25 Nu tsawantka Ejiptunmaya̱ juárkiṉ jintia waṉkaram Asiria ímianai jeattawai. Israerka Ejiptunmaya̱ tura Asirianmaya̱sha menaint átatui. Tura shiir pujutnum yumiṉkiak Ashí Akupin Uunt Yus chicharainiak “Ejiptú ámeka Wi shuar asam tura Asiria ámeka Winia uwejruja̱i̱ najanamu asam núnismek Israerá ámeka Winia átin asarum ti shiir yumiṉkramuitrume” tiártatui.