Isa. 18 - Yus Papí: Shuarja̱i̱ Yus Yamaram Chicham Najanamu

Itiupíanam túrunatin etserkamu

¹ ¡Maaj!, Itiupíanam entsa írunmanum áwiini̱ pujus nanapen aya̱pá̱r kirit awajna nú nuṉkaka ¡anearti!

² Maaj, pintiuja̱i̱ kanu najankamun entsak akupénak chichaman etserniun akatar nayantsanmaani̱ akupin ainia nusha ¡aneararti! Chichaman etserin tí warik yujawitrumna núrtirmesha aents naya aya̱shí̱sha wincharpátin tura yáma naṉkamtaiknumia̱ṉ tura ukunmasha ti tsuumai̱ núnisaṉ kakaram nuyá̱ utsanawar chikicha nuṉken ataṉkiar nérentin ajáu ainia nu aentsnum wetarum. Kame nu nuṉkaka entsa ti irunmanum awai.

³ Átum ashí nuṉkanam matsatutiram naint írunmanum tarach awajnaimtai, iistarum núnisrumek kachu umpuamusha antúu ajatarum.

⁴ Warí Jiuwá chichartak jú̱nis turutmiai “Winia pujutái̱rui̱ tee ajasa ekemsam yumi yutuk naṉkamasmatai etsa̱ páantin ajas tura árak juutai̱ tsawantin séeji̱k ajamunam yuraṉkim utsanar sanamamtikna núnisan iimiá pujuttajai.”

⁵ Warí, júuktin tsawantka jeachmanumaṉ nereṉka tí peṉker ajasármatai tura kuku̱jruk naṉkamas neré̱ tsamakarmatai kanawe̱ tsupitiai̱ji̱a̱i̱ kanawe̱nka tsupirattawai tura tsupir kanawe̱nka utsankattawai.

⁶ Tura nuka kampunniunmaya̱ nanamtin nuyá̱ nuṉkaya̱ yajasma ikiurkímiu ashí ártatui. Tura esatái̱ṉkia kampunniunmaya̱ nanamtin matsamártatui antsu yumitintkia nuṉkaya̱ yajasma nui̱ṉkia matsamiartatui.

⁷ Nu tsawanti̱nkia entsa ti irunmanum nuṉka ana nú nuṉkanmaya̱ aents naya aya̱shí̱sha wincharpátin tura yáma naṉkamtaiknumia̱ṉ tura ukunmasha ti tsuumai̱ núnisaṉ kakaram nuyá̱ utsanawar chikicha nuṉke̱n akintrukar nérentin ajáu ainia nuyá̱ Nayaimpinmaya̱ Suntara Uuntri̱ Jiuwan yumiṉkiainiak Ni naari̱ shiir awajtai̱ya̱ nui̱ Seun naintnium ántar súsatniun ikiatkartatui.