Isa. 17 - Yus Papí: Shuarja̱i̱ Yus Yamaram Chicham Najanamu

Tamasku asutniátin étserma

¹ Tamasku túrunatin étserma. Enentáimpratarum, warí, Tamaskuka úunt pepruya núnaka iniais tsai̱ tsai̱ ju̱yu̱ awajsamu juáktatui.

² Aruirnum pepru írunna nuka ajapa ikiukmia ártatui. Nuka waaka matsamtai̱ ajasártatui túrasha nuna awakkatniuka yaaksha atsuttawai.

³ Wenuke iwiartukar utúachmin awajsamu ainia nuka Eprainnumia̱n kamenkarattawai tura Tamaskunmasha núnisan túrunattawai. Tura Sírianmaya̱ juákarua nuka Israera páantniuri̱ urukait núnisan niincha menarkartatui tawai Nayaimpinmaya̱ Suntara Uuntri̱ Jiuwá.

Israer asutniátin étserma

⁴ Nu tsawantinkia Jakupa páantniuri̱ṉkia majatattui tura nuérmarincha iniais watsartatui.

⁵ Kame trikiu juwakur itiurtain núnisan juwana nuka uwejé̱ja̱i̱ neren akachukait nuja̱i̱ métek [Repaimia/Repa] pakari̱ncha tríkiun juwana nútikias túrattawai.

⁶ Tura uriwiu neré juwakur juákuri̱ tsakarí̱nkia jímiarchiksha núja̱i̱ṉchuka menaintiuksha júatsuk. Antsu kanawe̱n núkap nerekuka áintiukesh núja̱i̱ṉchuka séṉkuksha juaku e̱a̱kar júuktinia núnis átatui tawai Jiuwá Israera Yusri̱.

⁷ Nu tsawantinkia ¿ya Nin najanait? nuna aentska enentáimtusartatui. Tura iimia ni jí̱ji̱a̱i̱ṉ Israernumia̱ Tunaarinchantka wáinkiartatui.

⁸ Nuya̱ṉka aestutai̱ ni uwejé̱ja̱i̱ najankamu ainia núnaka íischartatui. Núnisan Asera nakumkarmancha tura etsa̱ nakumkar ni tsara uwejé̱ja̱i̱ najankamu irunainia núnaka peṉké íischartatui.

⁹ Nu tsawantiṉkia atumí pépruri̱ wenuke̱ iwiarkar utúachmin awajsamu ainia nuka Israer shuar wininiakui neré̱ juwamu kanawe̱n juákarua núnis ártatui túrar ashí amú amusma juáktatui.

¹⁰ Warí ámin uwemtikramin Yuska ámeka peṉké kajinmátkiniaitme tura ejamtai̱ram Muchiṉsha ámeka peṉké enentáimtuschaitme. Tuma asam shíirmach araksha araktatrume núnisrumek chíkich nékashtai arakja̱i̱ apatkar jéemtikramusha araktatrume.

¹¹ Araattamna nu tsawantinkia tsapamtikiamsha kuku̱jmamtikiam júuktin tsawant jeamunam aya aneachma emeṉkátkattajme tura wáitsatin tarutrámmatai najaimiakum katsuntrachmin nekaptiatme.

¹² Ti untsurí aents iruntrar nayants téter ajana núnisaṉ uunt nuṉka mátsatkainia nusha charaatum ajainiak nayants téter ajana tímiatmainia nusha ¡aneararti!

¹³ Kanus nase wajatam urukawa tímiatrus aentska téter ajartatui túrasha Yus kakantrartatui túram yajá pisakártatui. Nase wampuishin náintiaani̱ júana nútikiawartatui tura nuṉká ju̱yu̱ri̱n nasé wáinchiri̱ iniantar itiurawa nútikias umpuí aya émeṉkartatui.

¹⁴ Kí̱arai̱ṉkia tí tsuumai̱ átatui túrasha tsawa̱tsa̱i̱ṉ némaska amuukartatui. Tura iin kasartamar aya jú̱nik awajtámainiaj nuka nui̱ jeawartatui núnisaṉ iin itiurchat awajtámainiaj nusha nuní̱ amukartatui.