Isa. 16 - Yus Papí: Shuarja̱i̱ Yus Yamaram Chicham Najanamu

¹ Kampuntin atsú nuṉka Sera tímiania Seunka nawantri̱ náintri̱ya̱ tímianai murik akuptúktarum nuṉká Uuntri̱.

² Warí, Arnun entsa wajá katitiainmaṉka chiṉki awakkam pasuṉke̱n ikiuana Muapa nawantri̱ṉkia núnikiartatui.

³ Ámin chichartamin irurarta túram ayamprumaktin enentai jusata túram tsawai̱sha tura káshisha ame ejetaram awajata. Túrakum ji̱i̱rar akuprarmasha ú̱u̱karta nútiksamek waakar yujainiasha tsaṉkamkaraip.

⁴ Winia ji̱i̱rar akuprarmasha Muapá maa, ámiji̱a̱i̱ pujusárti. Tura emeskartin winiakuisha ámeka ni ú̱mtairi̱ atá. Warí, amukratniuka núnisaṉ itit awajkartincha naṉkaamasartatui tura najakratniusha ju̱ nuṉkanmaṉ amuukattawai.

⁵ Kame akupkur pujutai̱ṉkia waitneṉkratamuja̱i̱ akupnáktin iwiarnarmatai nui̱ tímiatrus Niṉkia ekemsattui. Tura naka tímiatrus sumamtikiatniuka núnisaṉ péṉkerja̱i̱ yajauchin nekaatniun e̱a̱na nuyá̱ naka túrutai̱n wárik umiktinkia Tawit akuptainiam pujustatui.

⁶ Kame Muapa naṉkamantu enentáimtumatairi̱sha anturkaitji, maa túmak wikia yája̱i̱ṉsha jeatsjai tura wikia tímianuitjiai núnisaṉ wikia awakkachminiaitjiai tutairi̱sha ti úuntaiti. Túrasha ni wáitri̱ṉkia tímiatruskeka áchattawai.

⁷ Tuma asa ashí Muapka kuntuts nekapeak úttiartui, maaj ti nekas takamtsuk jakamnia nekapiartatui. Uwa ikiaramu nanerar yutai̱ najankamun Kir-jaresétnumia̱n enentáimtusar pimpirua núnisar jakamnia nekapenak “¡tsej ausháa!” ajartatui.

⁸ Warí Ishpunnum arakmakmaka ja̱ja̱tkarai núnisan Sípmanmaya̱ úwasha ja̱ja̱tkaruiti. Nantaṉkri̱ṉkia tí peṉker ásar Jasera tímianai jeawar kampuntin atsú nuṉkancha naṉkarar nayantsancha katitrarmai túrasha núnaka chíkich nuṉkanmaya̱ uuntri̱ najatrarmai.

⁹ Tuma asan Sípmanmaya̱ úwa ajan enentáimtusan Jaserja̱i̱ métek úttiatjai. Maa Ishpunka tura Iriari atumí enentáimtusan winia nea̱jkirun ukatrattajrume. Warí, atumí arakri̱ júuktinnium tura árak júukmanum meset tarutrámtatrume.

¹⁰ Árak tí peṉker tsapatai̱ nuṉkanmaṉka waratái̱ncha tura kampuntin tí peṉker neremtikin asamtai shiir enentáimtai̱sha jurusma ártatui. Tura uwa ajanam kantanmasha waraamusha ashí meṉkarattawai. Tura uwa neré̱ najatai̱niam najatniusha najarchattui. Uwa nájakur charaatum ajataincha emeṉkátrattajai.

¹¹ Tuma asan Muápan enentáimtusan wakeruiṉkia arpa núnisan ten ten ajattajai tura winia enentái̱rka Kir-jaresétain átatui.

¹² Tura Muapka yusri̱n áujsataj tusar ni ántar yusri̱n enentáimtutai̱ naint írunna nui̱ wainiak pimpiniakush núnaka peṉké ántar túrawartatui.

¹³ Muap urukatta nuna Jiuwá yaunchu timia nuka ju̱i̱ti

¹⁴ tura Jiuwá yamaikia chichaak “Menaintiú uwitin takakmau tsawantri̱ jeamtai takatri̱ amutana núnis ti untsurí aents nui̱ matsatáinia nuí̱miak Muapa naṉkamantu enentáimtumatairi̱ṉkia amutuktatui. Tura iwiaaku juákartatna nuka peṉké ishichik tura kakarmachu ártatui.”