Isa. 14 - Yus Papí: Shuarja̱i̱ Yus Yamaram Chicham Najanamu

Papirúnianmaya̱ akupin wishikramu

¹ Uunt Yuska ti nekas Jakupan waitnentrattawai tura Israernaka ataksha awaiṉki̱ achik ní nuṉke̱ni̱ṉ matsasártatui. Tura chíkich aentssha nui̱ káunkar niji̱a̱i̱ tsaniṉkiar Jakupa shuari̱ ajasártatui.

² Nuya̱ṉka chíkich nuṉkanmaya̱ aents Israer shuaran ni nuṉke̱n awaiṉki̱ ikiuwartatui. Túmainiakui Israer shuar Uunt Yusa nuṉke̱n nú aentsun áishmaṉnasha nuwa̱ncha ni iniatairi̱ awajsártatui. Tura nin achirar yaruakarmia nútiksaraṉ nincha achirar yaruakartatui. Túruiniak íksaṉ nin wáitkiasarmia nuna uuntri̱ ajasártatui.

³ Tura takamtikkiur wáitkiatai tura najaimiakrum wáitnenmai ajakrumin Uunt Yus aṉkant awajtámsartatna nu tsawantinkia

⁴ Papirúnianmaya̱ úunt akupin chicharkuram “Itiurchat aents awajkur wáitkiatai̱ri̱sha tura ni kakarmari̱ ashí naṉkamantuya nusha itiur amuutumkachia.

⁵ Tura Yusan enentáimtichu ainia nuna wai̱ri̱ tura akupin ainia nuna akuptai̱ numiri̱ncha Uunt Yuska kupirarai.

⁶ Kame niṉkia ashí nuṉkanmaya̱ aentsun kajerkar asutiarmia nunasha tura kajekmája̱i̱ iniaṉnatsuk akuptáiri̱sha itiur amutumkachiá.

⁷ Túrunamtai ashí nuṉkanmaya̱ aents aṉkant ajasár shiir enentáimiainiak warasar kantamáiniawai.

⁸ Nu arant sepris numisha tura Ríwianunmaya̱ sétrusha ame warí urukámam nui̱ warasar chichainiak ‘Ame amuukamiamna nuya̱ṉ iin ajatma armia nusha ajatmaktai tusar tarutrámcharuitji’ tiáruiti.

⁹ Init jaka matsamtaisha ámin iṉkiunmaktai tusar aya wáurkarmai. Tura jákaru wakaní̱ncha iniantkiarmai. Núnisaṉ ashí nuṉkanmaya̱ uuntri̱ ainia nunasha tura ashí akupniuncha ni pujutái̱ri̱ya̱n awajkiarmai.

¹⁰ Tura ashí nisha chichartamainiak ‘¡Tsej ausha, amesha iiji̱a̱i̱ métekchak kakarmachu ajaschamek! turamiartatui.

¹¹ Ame naṉkamantu ajatáirmeka tura ke̱e̱ran tuntuitiurmarma nusha jaka matsamtai̱niam aju̱a̱muiti. Ame peakrumsha ákaiti tura esekmatai̱rmesha aya ákakete.’

¹² Yáṉkuamia núnis tsáapninia uchiri̱yá nayaimpinmaya̱sha ¡itiur iniarchamea! Ámeka ti kakaram ashí nuṉkanmaya̱ aents yajauch awajainia asam nuṉká aju̱a̱muitme.

¹³ Ame enentáimtumasmekka, ‘nayaimpiniam núna yakí̱ wakan Yusa yaari̱ eketainia ímianai winia pujutái̱run najanattajai. Tura ashí iimiainiamunam arakaani̱ yajá nainnium pujustatjai.

¹⁴ Tura yuraṉmin naṉkaikin nu yakí̱ wakan Yusja̱i̱ métek ajastaj tu enentáimtumasmiame.’

¹⁵ Kame tu enentáimpra asam jakaa matsamtai̱niam tura náṉkatkachu wá̱a̱nam aju̱a̱muitme.

¹⁶ Tura ámin waitmakartatna nuka ‘tsej aushá’ túramar ti enentáimprar chichartamainiak ‘Ju̱ka nuṉka ukureak núnisaṉ akupeamuncha emesak

¹⁷ ashí nuṉkancha atsamunam awajsamai tura aents mátsatkamuncha emesniuya nuyá̱ sepunam pujuiniancha aṉkantcha awajniuya ¿nu áishmaṉchakait?’ turamartatui.

¹⁸ Ashí akupin uunt nuṉka mátsatkamunmaya̱ ainia nuka shiir awajsamu áiniayataṉ jákaru áiniawai tura yamaikia iwiarsamunma̱ṉᵏ pujuiniawai.

¹⁹ Túrasha ámeka muí̱jkiar asa̱a̱rar ajapamua núnisam iwiarsamurminia̱sha ajapamuitme. Kame mesetnum puya̱ja̱i̱ maamu pushiri̱ tsupiramu iwiarsar amutúrar ikiukmia núnisam init ikiusmaitme.

²⁰ Warí, áme nuṉkemek emeska asam tura ame shuarak kajeṉka amuku asam ámeka íwiarmanumsha níji̱a̱i̱ṉkia apatnakchattame. ¡Tura yajauch aents ainia nuka ukunmasha ní shuari̱ṉkia peṉké pachittsachma ártatui!

²¹ ¡Ni aparí̱ yajauchiri̱ni̱ṉ ni uchirí̱ mantamnawartincha iwiarkatarum! Túracharmaka tsakiṉmakar nuṉkan akinkiar uunt péprun najankar ashí nuṉkanam piákara̱i̱ṉ.”

²² Kame nin kajerkartatjai tawai Nayaimpinmaya̱ Suntara Uuntri̱ Jiuwá. Túrawaran Papirúnian tura iwiaaku juákaruncha uchirí̱ncha tiraṉki̱ncha náari̱nkia japí japiru awajsartatjai tawai Jiuwá.

²³ “Tura kuru matsamtai̱ nuyá̱ entsan antumiaṉ awajsaran émeseakun japimkiuja̱i̱ japimiua nútikiawartatjai” tawai Jiuwá Nayaimpinmaya̱ Suntara Uuntri̱.

Asiria asutniátin etserkamu

²⁴ Jiuwá Nayaimpinmaya̱ Suntara Uuntri̱ tí nekas túrattajai tusa chichaak “Nekas Wi enentáimsaitiajna tura Wi itiur túrunattui tíniuitiaj nuka tímiatrusaṉ uminkiattawai.

²⁵ Asirianmaya̱ aentsnaka Winia nuṉkaruí̱ṉkia emeskartatjai antsu Winia náintrui̱ṉkia amuturartatjai. Túrawaram kijin netuamua núnis winia aentsur wáitiamuka juruntsartatui tura kijin entsakmari̱sha yakainiumiaṉka juruntsartatui.

²⁶ Ju̱i̱ti áujmattsamu ju̱ nuṉkanam naṉkamastatna nuka tuma asa ashí nuṉkan uwejé̱n iwiaintiuk iniaktus pujawai.

²⁷ Tuma asa Jiuwá Nayaimpinmaya̱ Suntara Uuntri̱ jú̱nis uminkiati tusa chichakuiti. ¿Nunasha yaki suritkiat. Ni uwejé̱n takuí pujá ¿nunasha yaki awaketkit?”

Jiristíanmaya̱ asutniáwartin étserma

²⁸ Akupin Akaas jakamia nú uwitin ju̱ asutniátniuka etsernakmiayi.

²⁹ «Jiristíanmaya̱ aentsú ámin asutiámia nú numi kupiniaku asamtaisha tiikia warasaipia. Warí ni kaṉkapenianka napi tí najamniua tímianu jiinkittiawai tura nuna uchirí̱sha nanaptin ártatui.

³⁰ Túrunamtai kuítrincha ainia nuna uchirí̱ iwia̱i̱ri̱ waakari̱ṉkia péṉker sá̱a̱knium matsamsartatui. Núnisaṉ aents kuítrincha ainia nuka ititcha awajsachma péṉker kániartatui. Antsu amé shuarnaka tsukái ikiajkáran wárumchik juákaruncha amú amusártatjai.

³¹ Atumsha wá̱i̱ti̱a̱i̱yá najaimiakrum charáa charáa ajatarum. Amesha uunt pepru yáintkiatarum tusam untsumkata. ¡Jiristíayi, emé emesusma juákume! Araki̱a̱ múkuint winitramui túmak iruntramunmaṉka chikichkiksha juákchattui.

³² Tura uunt nuṉka mátsatkamunmaya̱ chichama etserin ainia nusha ¿warí tiártajik? Warí Seunka páuri̱nkia Jiuwá ukuraiti tuma asa ní shuari̱ wáitkiasma pujuinia nuka nui̱ weankartatui».