Isa. 13 - Yus Papí: Shuarja̱i̱ Yus Yamaram Chicham Najanamu

Papirúnia asutniátin etserkamu

^1-3 Papirúnia urukatta nuna Amusa uchirí̱ Isayas ímiaja̱i̱k wainiak etserkamiayi. Tura tarach naint atsamunam ainia nui̱ awajárum takuitiarum. Núnisrumek aents untsuktarum túrakrumin kakaram áiniana nuna wáitiri̱n waya̱warti. Winia ti shiir awajsamu áinian útsuiniajai. Tura Winia kakaram ainia nunasha untsukarjai. Núnisaṉ Wi nupetmakui warainiana nunasha Wi kajekan akupkámurun umikiarat tusan akupénajai.

^4-8 Untsurí nuṉkanmaya̱ tí untsurí aents iruntramua núnin naintia ántuwawai. Mesetan émtuku Uunt Yus Ni suntari̱n mesetan iwiarnatkarum iyaak túrawai. Tura Uunt Yussha núnisaṉ emeskartin ainia nusha yajaya̱ nayaimp náṉkatkamunmaya̱ áiniawai. Kame Ni kajetáiri̱n uminiak nuṉkan takamtsuk emeskarat tusar untsukarma áiniawai. Uunt Yusa tsawantri̱ jeá asamtai ashamakrum áyawa titiarum. Warí Ashí Tujintkiachu Yusa emeskatniuri̱ áchattuak. Tuma asamtai ashí aents sapijmiakartatui tura nuwa̱ uchin takustaj tusa najaimiana tímiatrus najaimiakartatui. Túmainiak ti sapijmiakar mái̱ iiniai ajartatui.

^9-10 Yamaikia Uunt Yusa tsawantri̱ tsuumai̱ ajasmatai ti itiurchat enentáimiar nuyá̱ ti kajek jú̱ nuṉkanam ashí tunaarintin áiniana nuna emesak aya jú̱nik awajsattsa winiawai. Yaa tsáapnintri̱sha wainniakchattawai tura etsa̱sha mushatmartatui núnisaṉ nantusha etsantrashtatui.

^11-13 Tura ashí nuṉkanmaya̱ aents ní yajauchiri̱ni̱ṉ asutniáttawai. Nuyá̱ Yusa umircha ainia nunasha ní mui̱jmiaintri̱ni̱ṉ asutniáwartatui. Naṉkamantu enentáimtuma ainia nusha péejchach awajnásartatui. Tura tí asutniatniuri̱ji̱a̱i̱ aentska kuriji̱a̱i̱ métek tura áishmaṉsha Upirnumia̱ kuri̱ji̱a̱i̱ métek peṉké ishichik ajasár wáinkiachmin awajnásartatui. Tura Ashí Akupin Uunt Yus tí kajeku asamtai nayaimpisha tura nuṉkasha muchitrar áiniana nuya̱ṉka yajá ekeemprartatui.

^14-16 Kame japa apapéam tura muriksha wainniuri̱ atsakui urukainia núnisaraṉ aentska ní pepruri̱niak íisartatui nuyá̱ ní nuṉke̱ni̱ṉ pisarartatui. Wáinniakka naṉkiji̱a̱i̱ ijiú maamu ártatui. Núnisaraṉ achikiármasha puya̱ja̱i̱ maamu ártatui. Tura nisha iimiainiamunmaṉ uchirí̱sha aji̱a̱rar maamu ártatui nuyá̱ ni je̱e̱sha emestukar ashí kasaramu ártatui. Núnisaṉ ni nua̱ri̱sha kakarmaja̱i̱ yajauch awajtúsma ártatui.

^17-18 Yamaikia Mítianmaya̱ aents kuít jiruncha tura kurincha péṉkera nuní̱ enentáimtichu ainia nuna akupénajai. Nisha tíshimkiuja̱i̱ natsa ainia nuna amukártatui núnisaṉ uchincha waitnentrachartatui.

¹⁹ Kame Papirúnia uunt nuṉka mátsatkamu iwiarmamtai aya kúriji̱a̱i̱ṉ najankamua timia nú shiirmachiti. Tímianu asamtai Kartíu aentska nuja̱i̱ naṉkamantu enentáimiainiawai. Túrasha Sutuman Kumuraja̱i̱ Yus emeskam urukama núnik juákartatui.

²⁰ Tuma atakka peṉké pujushtai ajastatui. Tura ukunam aents matsamártatna nui̱sha atakka peṉké matsamnakchattawai. Núnisaṉ Arapianmaya̱ aentscha jutai je̱e̱ncha je̱a̱mkachartatui. Núnisaraṉ murikiu wainniusha ni murikrí̱nkia matsashchartatui.

²¹ Antsu kampuntin atsamunam matsamin yajasma kajen ainia nu matsamtai ajastatui. Tura ni je̱e̱sha ampush matsamtai ajasártatui. Kame unturusha nui̱ matsatáiniakui kampunniunmaya̱ chipiu nakuruiniak atú tsékeṉki̱ atú tsékeṉki̱ ajartatui.

²² Tura úunt akupin pujutai̱ tura waratái je̱a̱ áiniana nui̱ṉkia yukartin yajasma nuyá̱ kampunniunmaya̱ ya̱wá̱ shiniukártatui. Kame tsawant tesamuka jear temawarai tuma asamtai ni tsawantri̱nkia peṉké eketnákchattawai.