Isa. 12 - Yus Papí: Shuarja̱i̱ Yus Yamaram Chicham Najanamu

Aṉkant awajkartusmanum Yus yumiṉkiamu

¹ Nu tsawantai̱kia chichaakum “Uunt Yusru, wikia ámin yumiṉsajme. Warí winia kajertukuitiatmek tsaṉkurturuitme tura atsaṉturume.

² Wats iistá, winia uwemtikriṉkia Yúsaiti. Aya Nin tuke enentáimta asan peṉké sapijmiakchattajai. Warí winia ikiakátniuka tura kantarka Uunt Yúschakait. Tura winia uwemtikrinkia Níṉkiti” turuttiatrume.

³ Warasrum uwemtikkiartin púkuninmaya̱ entsa jusattarme.

⁴ Tura nu tsawantinkia chichaakrum “Uunt Yus yumiṉsatarum tura Ni náari̱sha shiir awajsatarum. Núnisrumek ashí pepru ainia nui̱ Ni kakaram túramuri̱ áujmateakrum Ni náari̱ṉkia ashí naṉkamantuiti tusarum enentáimtustarum.

⁵ Uunt Yus kanta kantampruátarum. Warí aents túrachminia nuna túraiti. Nuna ashí nuṉkanmaya̱ aentssha nekaawarti.

⁶ Wats Seúnnum matsatrumna nútiram atumíin Tunaarincha Yus naṉkamantua nu pujá asamtai warakrum kakaram kantampruátarum” títiatrume.