Isa. 11 - Yus Papí: Shuarja̱i̱ Yus Yamaram Chicham Najanamu

Isái shuari̱ya̱ Misías akupkátta nu

¹ Kame numí kampuí̱ jeana núnis Isái shuari̱ya̱ tsapaittiawai. Tura nuna kampui̱ya̱ chikichik jé̱e̱rtatna nuke nerektatui.

² Tura Niinkia Uunt Yusa Wakaní̱ nekatai̱ tura enentáimtai̱ wakan nuyá̱ chicharkartin tura ikiakákratin wakan núnisaṉ Uunt Yus nekaar ashamkar umirkatin wakan pujursattawai.

³ Niṉkia Uunt Yus ashamamuja̱i̱ ti shiir warastatui. Tura aya wainiak nuyá̱ aya antukmaja̱i̱ sumamtikiashtatui.

⁴ Antsu ju̱ nuṉkanam kuítri̱ncha ainia nuna nekasa nuja̱i̱ métek súmamtikiawartatui tura wáitiainiana nunasha métekrak waitnentrartatui. Núnisaṉ aya chíchame̱ja̱i̱ṉ numiji̱a̱i̱ awateana tímiatrus nuṉkanka asutiáttawai. Tura Yusan enentáimtichu ainia nunasha aya máyai̱ji̱a̱i̱ṉ umpuí máwartatui. Apu. 1:16; 2:16; 19:15

⁵ Kame Ni sumamtiktairi̱ṉkia entsarmari̱ya̱ núnis tura Ni umitiairi̱ṉkia kaki emenmamkari̱ya̱ núnis átatui.

⁶ Nuiṉkia rúpu ya̱wa̱sha murikji̱a̱i̱ tsaniṉkiar matsamsartatui. Tura yampiṉkia ya̱wa̱sha chipiu uchichiji̱a̱i̱ tsaniṉkiar tepesartatui. Núnisaṉ waaká uchirí̱sha úunt ya̱wa̱ uchirí̱ji̱a̱i̱ métek matsamsar tsakarartatui. Tura núnaka úchikia úchitiat yaruas wekaittiawai.

⁷ Núnisaṉ waakasha chai̱ji̱a̱i̱ iruntrar yurumáwartatui. Tura nuna uchirí̱sha tsaniṉ tepesartatui. Ántsaṉ úunt ya̱wa̱ úuntri̱sha waaká ánis sa̱a̱kin yútatui.

⁸ Uchi muntsúaku napí wá̱a̱ri̱n nakurústatui tura uchi yama tsurakua nusha napí pasuṉke̱n uyu̱rá wasursattawai.

⁹ Warí nayantsanam entsa piakua ánis ashí nuṉkanam Uunt Yus paant nekanattawai. Tuma asamtai ashí Winia akantúkma náintrui̱ṉkia itiurchat awajnáikiatniusha tura emeskatniusha peṉké atsuttawai.

¹⁰ Tuma asamtai nu tsawantiṉkia untsurí nuṉkanmaya̱ aents Isái shuari̱ya̱ átatna nuna e̱a̱kartatui. Nuka pepru ajapéri̱n tarach awajamua ánis Ni pujamuri̱ṉkia ti shiir páantin átatui.

¹¹ Ántsaṉ nu tsawantinkia Ni shuari̱n Asirianam, Ejiptunam, Pátrusnum, Itiupíanam, Iramnum, Senarnum, nuyá̱ Amat nuṉkanam tura nayants yantamnumsha ishichik juákaru pujuinia nuna Uunt Yus ni kakarmari̱ji̱a̱i̱ awakearartatui.

¹² Tura Uunt Yus tarachi̱n chíkich nuṉkanam matsatainia nuna takuriartatui. Nuna tura Israer shuar chíkich nuṉkanam yaruakma ainia nuna ikiankartatui. Núnisaṉ Jutanmaya̱ arakaani̱ tura nuṉkaani̱ núnisaṉ etsa̱ jintiainmaani̱ nuyá̱ etsa̱ akatainmaani̱ tsakiṉmaka ainia nunasha ashí awakearar irurartatui.

¹³ Kame Eprain suir enentáimmiaka nui̱ amukáttawai tura Jutan itit awajáiniaṉka amú amusartatui. Nui̱ṉkia Eprainkia Jutanka suir enentáimtishtatui. Ántsaṉ Jutasha Eprainniaka itit awajsashtatui.

¹⁴ Nuyá̱ Israer shuarka etsa̱ akatainmaani̱ Jiristíu aents matsatainia nuna pinchu kuntinnian wainiak inianteana nútikias iniantrartatui. Nuyá̱ mash irunturar Etumnasha tura Muápnasha ni warirí̱n atantrar yarurkartatui. Kame Muapka tura Etumsha nupetkamu ártatui. Antsu Amuna uchirí̱ṉkia Israer shuaran umirin ártatui.

¹⁵ Tura Uunt Yus Ejiptunmaya̱ nayantsan kukach awajsattawai. Núnisaṉ Ni Wakaní̱ kakarmari̱ji̱a̱i̱ Ni uwejé̱n takuí Yúpratis entsan siati tseṉkearu awajsattawai. Túramtai sapatnasha awekak katia̱rartatui.

¹⁶ Kame yaunchu Israer shuaran Yus Ejiptunmaya̱ ji̱i̱ki̱ juíniak nayantsan kukach awajsámia nútikias Asirianam Ni shuari̱ ishichik juákaru ainia nu katiṉkiarat tusa jintiaráttawai.