Isa. 10 - Yus Papí: Shuarja̱i̱ Yus Yamaram Chicham Najanamu

^1-4 Wi shuar kuítrincha ainia nuna wáitkiastaj tusa akupkámu chichaman tura umiktin chichaman najanainia nu aneararminiaiti. Warí wajé̱ tura mitiaik ainia nuna warirí̱nkisha atantrartaj tusa túruiniatsuk. ¿Túrakrumsha asutniátin tsawant jeamtaisha urukattarmek? ¿Yaki ayamprutkata? titiarum. Tura átum naṉkamantu enentáimtumatairi̱sha ¿urukatiṉ? Áyatik achirar yarumma urukainia núniktatrume túrunarum kajiṉtatrume. Túmakrumnisha Ni kajekmári̱ṉkia naṉkaamaschattawai. Túrasha Ni uwejé̱ṉka takuri̱ aya ajatas araawai.

Asiriaka yaki̱ya̱ asutkiaja̱i̱ asutniáttawai

^5-6 Asiriaka winia asutkiartutai̱ruinia anearti. Kame Wi shuaran kajerkan emesratniun akupeakui ni warirí̱nkia mash atantrar tura jú̱nik awajsarmatai tsakusa nútiksaṉ amuuturarat tusan nu yajauch aents tura umichu ainia nui̱ akuprartatjai.

^7-11 Túrasha niṉkia tuusha enentáimprachartatui antsu ashí nuṉkanam nupetmarar nui̱ pepru irunainiaka emeskatai tu enentáimtumasar jú̱nis tuíniawai “Ii akupniúri̱ uchirí̱sha ¿ashí akupniuchuk ainia? Kárnikia Karkimisa ¿núninchakait? Amatcha Arjata ¿núninchakait? Samariasha Tamaskua ¿núninchakait? Winia kakarmarja̱i̱ṉ ashí najanamu yusa nuṉke̱ncha atantracharukaitiaj tura nu yussha uwejja̱i̱ nakumkar najankamuitiat Jerusaréṉnumia̱ yúsja̱i̱ṉkia tura Samarianmaya̱ yúsja̱i̱ṉkia naṉkaamas áiniatsuk. Kame Jerusaréṉnasha tura nakumka najankamu yus nui̱ irunainia nunasha Samarian yúsri̱ntiuk ¿itiurkamaj wats, nútikiashtajash?” tuíniawai.

^12-14 Túrasha Seun nainnium tura Jerusaréṉnumsha Uunt Yuska ni takatrí̱n amuk Asirianmaya̱ akupin naṉkamantu tura kakaram enentáimtuma asamtai asutiáttawai. Warí winia kakarmarja̱i̱ṉ tura ti enentáimin asan winia nekatairja̱i̱ṉ ashí nuṉkanam nupetmaran tesaknasha emeṉkáran kuítrincha ashí atantraran aents kakaram itiurawa nútiksanak aents nui̱ matsamin áinianka ashí amukárja̱i̱. Nu nuṉkanmaya̱ kuítian pasuṉnumia̱ júkitniua núnis winia uwejur wáinkiachaik tura nujint utsaṉman írumna núnisnak ashí nuṉkancha wiki irurcharjak. Túrasha yaaksha turutchayi tiniu asamtai niincha nútiksaṉ asutiáttawai.

^15-19 Warí jáchaka niji̱a̱i̱ takana nuna chicharuk “Wikia ámiji̱a̱i̱ naṉkamantuitjiai” ¿tíminkiait? Kame Asiriaka naṉkamantu enentáimtuma asamtai Ashí Akupin Uunt Yus kakaram ainia nuna suṉkuran akuptúkartatui tura ashí naṉkamantu enentáimtuma ainia núnaka jinia ikiapátra nútikiattui. Antsu Israera Tsáapnintri̱ṉkia ji átatui tura Israera Péṉker Wainnia nuka ji keak tsuátan tura jaṉkin wárik ekemana nútikiattawai. Túrak wakaní̱ncha tura aya̱shí̱ncha núnisaṉ kampuntin peṉkeri̱ ainia nunasha nuyá̱ árak ti péṉker tsapatai̱ nuṉka ainia nunasha ashí amuktatui. Tú túram aents peṉké jakattsa tepana núniktatui. Túrunamtai kampunniunmasha ishichik numi juákaru asamtai uchisha nekapmarmin ajasártatui.

Israer shuar juákarua nu ní Yusri̱n ataksha waketkiartatui

²⁰ Tura nu tsawantai̱ Israernumia̱ Jakupa shuari̱ ishichik juákaru ainia nuka nin amukármia núnaka yaintmaktatji peṉkesha tu enentáimtuschartatui. Antsu nekaska Israer shuara Uunt Yusri̱ tunaarincha Yúsnak enentáimtusartatui.

²¹ Kame Jakupa shuari̱ ishichik juákaru ainia nuka ti kakaram Yusai̱ ataksha waketkiartatui.

²² Warí Israer shuará átumka nayantsa náikmiri̱ nekapmarchamnia ímianaitiatrum aya ishichik juáktatrumna nuke waketrattarme. Tura asutniátniuka iwiaramu asa nekasa nuja̱i̱ métek uminkiattawai.

²³ Tura Ashí Akupin Uunt Yus ashí ju̱ nuṉkan amuktatjai timia núnaka ímiatrusaṉ amú amú awajsattawai.

²⁴ Tuma asa Tunaarincha Uunt Yusa nu chichaak “Wi shuar Seúnnum pujatirmin Ejiptunam asutiámamiarumna núnisaṉ ni numiri̱ji̱a̱i̱ asutián awattámainiakuisha Asiriaka ashamkairap.

²⁵ Kame Wi atumín suir enentáimturmaj nu wárik amunkattawai antsu íksaṉ Wi nin kajerkaran amukártatjai.”

^26-27 Kame Ashí Akupin Uunt Yus Urep kayanam Matian aentsun máwarmia núnisaṉ tura Ejiptunmasha túramia nútiksaṉ nincha ashí amukártatui. Nu ashí túrunamtai waitsa pujuiniamunmaya̱ṉka aṉkant ajastatrume. Nuya̱ṉka Wíniaitrume tusar Asiria wáitkiarmasmarumna nuya̱ṉka aṉkant ajastatrume.

Utsantuattsa wininiamu

^28-32 Tura Asiria suntar Ajatnum wininiak Mikrunnumaani̱ naṉkamakiar Míkmasnum káunkar suntari̱n íiniawai. Nuyá̱ katia̱rarmatai nú nuṉkanmaya̱ aents sapijmiakar pisainiak charaatum ajakiar ú̱mkatniun e̱a̱iniawai. Nuya̱ṉka Núpnumia̱ wajarar Jerusaréṉkan ashintiuiniawai.

^33-34 Túrasha Ashí Akupin Uunt Yuska kakarmaja̱i̱ kanawenka asantrartatui tura ti yakí̱ ainia nuka ajarma núnis ártatui. Nuyá̱ uunt ainia nusha amukma ártatui. Ríwianunmaya̱ kakarmanka kampuntin jachaja̱i̱ ajartinia núnis nupetkartatui.