Ipi. 2 - Yus Papí: Shuarja̱i̱ Yus Yamaram Chicham Najanamu

Yus anenma asa uwemtikramji

¹ Átum yajauch túrakrum tunaanum tuke wekaakrum Yusai̱ya̱ kanakin asarum jákauyarme.

² Nu tunaanum jú̱ nuṉkanam pujuinia nuja̱i̱ métek tuke wekainiuyarme. Túrarum iwianchi akupniuri̱ wakeramuri̱ umirniuyarme. Iwianchi uuntri̱ Yusan umirainiatsna nuna ashí akaténawai. Kame ju̱ nuṉkanam yajauch wakan ni akupeamuri̱ji̱a̱i̱ wekainia nuja̱i̱ métek atumsha wekainiuyarme.

³ Ashí iisha núnisrik yaunchu nu shuarja̱i̱ métek ii aya̱shí̱ wakeramu umirniuyaji. Tura ii aya̱shi̱ wakeramusha núnisrik ii enentái̱ wakeramusha umirniuyaji. Tuma asar tunaaja̱i̱ akiinia asar chíkich shuarja̱i̱ métek ti kajernákmiaji.

⁴ Antsu Yus ti waitnenkartin asa iin tí anenmamiaji.

⁵ Tuma asa ii tunaanum tuke jaka pujarni̱ṉ Krístuja̱i̱ métek iwiaaku awajtámsamiaji. Aya ti anenkartin asa uwemtikrampramiaji.

⁶ Tura Krístuja̱i̱ métek Yus iniantamkimiaji. Nuyá̱ Jesukrístuja̱i̱ métek ju̱ nuṉkanam pujuinia áintsar yamaisha nayaimpinmasha apujtamsatniun tsaṉkatramkaitji.

⁷ Nuja̱i̱ Ni ti aneṉkratmari̱ncha tura Kristu túrunamuja̱i̱ waitnentrampramuncha nekapmarchamnia iniaṉnatsuk ukunma ímianaisha tuke Ni ti waitnenkartutairi̱nkia iin iniakturmasuiti.

⁸ Jesukrístu nekas enentáimta asakrumin Yus waitnentramar uwemtikrampraiti. Ju̱ka átumkeka túrunachuitrume. Antsu Yuska Niṉki kuítchaja̱i̱ suramsaitrume.

⁹ Shuar ni takatrí̱ji̱a̱i̱ uwempratniuitkiuṉka naṉkamantu enentáimsainti winia kakarmarja̱i̱ uwemprajai tusa. Nu enentáimsatniuka atsutí tusa Yuska átumka takaatsrumni̱ṉ uwempratniun suramsamiarme.

¹⁰ Yus najanamuitji. Kame Jesukrístuja̱i̱ tsaníakrin yamaram iwiaakman suramas tuke péṉker túratniun najatmamji. Yáunchuk nuna enentáimturmasmiaji.

Krístuja̱i̱ tsaniṉkiar nawamnaikiamu

¹¹ Nuik ámarum nu enentáimpratarum. Ashí Israer shuar ni aya̱shí̱n tsupirnaku ásar ashí Israer shuarchan tsupirnakcha áiniakui peṉké Yúsnachua núnis enentáimtuiniawai. Tura atumsha Israer shuarcha asakrumin “tsupirnakcha” turamniuyarme.

¹² Nuik Krísturtinchauyarme. Israer shuarcha asarum ashí ni túrutairi̱sha tura ashí Yus nin tsaṉkatkarmasha nekaachuyarme. Tura jú̱ nuṉkanmaya̱ asarum nekas Yusa nu enentáimtichuyarme tura shiir pujustin náṉkamsarum enentáimpramarme.

¹³ Antsu yamaikia Krístuja̱i̱ tsaniṉkiu asarum yaunchu Yusai̱ya̱ yajá pujuwitiatrum, yamaikia Kristu numpé̱ puármatai ni jarutramkamuja̱i̱ tántaitrume.

¹⁴ Israer shuarja̱i̱ Israer shuarchaja̱i̱ nemasmanaikiar ajapén péeṉkramu ámiaji. Tura Krístuka nuna sa̱a̱ki nawamnaimtikramkamiaji. Tura chikichik shuar najatmamiaji.

¹⁵ Nuik aya Israer shuar Muisais akupkámu untsurí armia nuna umirkatin áiniak nuja̱i̱ chíkich aentsja̱i̱ nemasmanainiarmiayi. Tura Kristu jaka nu akupkámun ántar awajás chikichik aents yamaram awajtámsamiaji.

¹⁶ Núnisaṉ ámiayi. Kristu krúsnum jaka nemasja̱i̱ mai̱ apattamak chikichik awajtámas Yúsja̱i̱sha nawamnaimtikramkamiaji.

¹⁷ Kristu taa nawamnaikiatniun chichaman Israer shuaran ujakmiayi. Tura nu chichamnak atumín Yus nékachuyarmena nunasha ujaktinian akupkámiayi. Isa. 57:19

¹⁸ Yamaikia Israer shuartisha tura Israer shuarchasha mái̱ metek Kristu túrunamuja̱i̱ tura Yusa Wakaní̱ takaku asar Yusai̱ jeatniuitji.

¹⁹ Tuma asamtai yamaikia chíkich shuarchaitrume antsu ashí Yus shuarja̱i̱ métek ajasuitrume. Nekas Yusa shuari̱ntrume.

²⁰ Átum uunt je̱a̱ je̱a̱mma núnisaitrume. Uunt je̱a̱ je̱a̱mtin emka kaya apujtúktiniaiti je̱a̱ ti wewe atí tusa. Núnisaṉ yaunchu Yúsnan etserniusha tura Kristu akatrámuri̱sha Yus Chichaman etserainiak imiá nekas enentáimtustinia nuna apujtukarmiayi. Tura ashí nuja̱i̱ naṉkaamas Jesukrístu enentáimtustiniaiti.

²¹ Je̱a̱ apujtukmari̱ Kristu asamtai Ni tí peṉker ekeniar je̱a̱ je̱a̱mnaki̱ wéawai. Tura ii Uuntri̱ Krístuja̱i̱ Yusa Je̱e̱ ti shiir átatui.

²² Núnisrumek atumsha Krístuja̱i̱ tsaniṉkiu asarum átum ashí Yus shuarja̱i̱ Yusa Je̱e̱ya áintsaṉ ajasuitrume. Tura Yusa Wakaní̱ ashí Yus shuara enentái̱n pujú asamtai nekas Yusa Je̱e̱nte.