Awa. 1 - Yus Papí: Shuarja̱i̱ Yus Yamaram Chicham Najanamu

Awakúk Yusan seamu

¹ Yúsnan etserin Awakúk ukunam túrunattana nuna wainkiamia nu.

² Uunt Yusru, wi untsúajmena nusha ¿urutáintsuk antuktam. Tura ti yajauch awajkartuiniawai tusan untsumkuisha urutáintsuk aṉkant awajkartustam?

³ ¿Urukamtaitsuk timiá mui̱jmiai̱sha tura wáitiamusha iniakturam? ¿Warí, kajernáiyamuncha nuyá̱ mániamuncha núnisaṉ emesnaiyamuncha tura tí yajauch awajnáiyamuncha wáintsujak?

⁴ Maa, túmainiak akupkámu umiktin chichamnasha arantuiniachuk uminiatsui. Kame péṉker túrin aents péṉkeran túrawara̱i̱ṉ tusar yajauch túrin aents éṉkekarai. Túrawar nekasa nuja̱i̱ métek sumamtiktsuk yajauchí sumamtikiainiawai.

Uunt Yus Awakúkan ai̱kma

⁵ Nuyá̱ Uunt Yus chichaak “Chíkich nuṉkanmaani̱ iimsarum nekaatarum. Wi atumíin túrattajna nu ujamsha nekasaiti tíchattarme. Túrasha nu wáinkiurmeka ¡waawaa aushaa! tírum jaká imia ajattarme.

⁶ Pai, nekaata. Yamaikia Kartíu aentsun akuptúkartatjai. Kame nu aentska tí kajen waitnenkartutsuk maṉkartin áiniawai. Tuma ásar aents matsatainian ataṉkí̱ níniuchunak nérentin ajastai tusar nuṉkan enetak yujainiawai.

⁷ Kame tí tsuumai̱ tura ashamái̱ átatui. Núnisaṉ ní wakeramunak túrin áiniawai.

⁸ Ni kawairi̱ṉkia yampiṉkia ya̱wa̱ja̱i̱ naṉkaamas kakaram tséken tura kashi yujá rúpu ya̱wa̱ja̱i̱sha naṉkaamas wari áiniawai. Núnisaṉ tí untsurí ásar kawainium ekemniuri̱sha pinchu kuntinian yuattsa nanaki̱ weruiniana tímiatrusar yajaya̱ ti wárik káutkartatui.

⁹ Ashí nu aentska aya yájauchiniak túrawartaj tusar káunkartatui. Tura naka íimkiar weruiniak aents achirmánka náikmin írumeana tímiatrusar irurartatui.

¹⁰ Tura akupniúncha wishikiainiak akupniú uchirí̱ṉkia natsanmai̱ chicharkartatui. Núnisaṉ iwiarkar utúachmin awajsamu pépruncha wishikiainiak nuṉkan irutrar utsantuawar nérentin ajasártatui.

¹¹ Túrasha uunt nase naṉkaamana núnisaṉ naṉkaamastatui. Kame ni kakarmari̱n yusri̱ya tímiatrus enentáimta asa niṉki makumartatui” tímiayi Uunt Yus.

Yúsnan etserin Awakúk Yusan ataksha timia

¹² Uunt Yusru, imiá naṉkaamas Tunaarinchá, yámankamtaikniumia̱ṉka ¿Ámechukaitiam? Maa Uunt Yusru ní yajauchiri̱ji̱a̱i̱ṉ asutniáwarat tusamchak Kartíu aentska Amek apujsamam túrasha kátsuram Kayaru nú tura asakmincha amukchartatji.

¹³ Ámeka nekas tí peṉker asam yajauchisha tura yajauch awajkartincha íistin peṉké nakitniuitme. Túmaitiatmesha ¿urukamtai anaṉkartuinia nusha aya íyam? Tura Yusan enentáimtichu niji̱a̱i̱ naṉkaamas péṉkeran túruinia nuna amuiniakuisha ¿urukamtai páchiatsum?

¹⁴ Nuyá̱ aentssha nayantsanam namak irunainiana tura yajasma nuṉká japinias yujainiana nu úuntri̱nniuk ainia núnis ajasarat tusam tsaṉkamkartukume.

¹⁵ Warí tsauja̱i̱ tura nekaja̱i̱ namak júuktinia nútiksar aentsun achirar íruiniawai. Túruiniak ti warasar wishiniawai.

¹⁶ Warí nekarí̱ji̱a̱i̱ ni warirí̱ncha tura yurumkancha tí nukap ikiauntumainia ásar nekaanka tikishmátainiak kuṉkuinian áestuiniawai. Núnaka wararainiak ti shiir enentáimtusar túruiniawai.

¹⁷ Tuma ásar nekan aju̱ntak juur ataksha aju̱ntkar awajena nútiksar ¿aentsun waitnentsuk amusar pujusártatuak?