Apu. 9 - Yus Papí: Shuarja̱i̱ Yus Yamaram Chicham Najanamu

¹ Nuyá̱ Yusa suntari̱ seṉkua nu, kachun umpuarmatai yaan nayaimpinmaya̱ nuṉká inian wainkiamjai. Tura nu yaan tunáa shuar jákaru matsamtai̱ yawiri̱ susamuyi.

² Tura uraimtai nu náṉkatkachu wá̱a̱nmaya̱ ti mukuint jiinmiai uunt jiniumia̱ áintsaṉ. Tura etsa̱ncha tee awajsamai yuraṉmincha tee awajsamai.

³ Nuyá̱ nu mukuintiunmaya̱ manchi jíintrar nuṉká ti yujarmai. Tura ju̱ nuṉkanmaya̱ titiṉkia áinis najamin susamu armai.

⁴ Chírichrincha ashí arakmancha ashí numincha yajauch awajsatin suritkiamuyi. Antsu áyatik shuar nijia̱i̱nium Yusa naari̱ áarar apujtuachmanak yajauch awajsatin armai.

⁵ Túrasha ajaktsuk seṉku nantutin wáitkiastin susamu armai. Kame titiṉ shuaran ijiú najawe̱a núnis najawe̱atin susamu armai.

⁶ Nui̱ shuar wari jakataj tuíniayataṉ jákachartatui. Ti wakeruiniayataṉ jákatniun tujintkiartatui.

⁷ Manchisha iisam mesetnum weena nu kawaiya áinis armai. Kurí tawaspa áinis etseṉkraku armai. Yapi̱sha shuarna áinis armai.

⁸ Intiashí̱sha nuwa̱nua núnis armai. Nai̱sha úunt ya̱wa̱ nai̱ya núnis armai.

⁹ Netsepé̱n namaka saepe̱a áinis jiru péeramu armai. Tura nanamenaksha kawái karu japiniak mesetnum tsékena núnisaṉ téter ajarmai.

¹⁰ Ujuké̱sha titiṉki ujuke̱a áinis asa jaṉki ajakin armai. Nuja̱i̱ tuke seṉku nantu yujarsar shuaran íjiuar wáitkiastin armai.

¹¹ Tura náṉkatkachu wa̱a̱ uraimia nu suntar ni úunt akupniuri̱nti. Israer chichamja̱i̱ ni naari̱ Apatún tutainti. Tura Kriaku chichamja̱i̱ṉkia Apuriún tutainti. Nuka Yajauch Awajkartin tawai.

¹² Ju̱ja̱i̱ emka wáitsatin naṉkaamasai. Túrasha tuke jímiar taasai.

¹³ Nuyá̱ Yusa suntari̱ saisa nu kachun umpuarmatai chichaman antukmajai. Yusai̱ naka kuṉkuin ekemaka Yus sutai kurimpramu amai. Tura ni kuatru yantame̱ kachu jiinmiai.

¹⁴ Tura nuyá̱ suntar saisa nu kachu takakun chichaak “Kuatru suntar Yúpratisa kanusári̱ pujuinia nu atiram akupkarta” timiai.

¹⁵ Túramtai nu kuatru suntar wéar menaintiú nakakam untsurí shuaran maatai tusar weriarmiayi. Kame nuna túrawarat tusar ikiusma armai. Tura nu uwitin, nu nantutin, nu tsawantin tura nu úratin atíatin ikiusma armai.

¹⁶ Tura suntarnasha kawainium eketáinian wainkiamjai. Tura timiá untsurí nekapmarchamnia asamtai aya númiruri̱n antukmajai. Nusha tusiantu miyun armai.

¹⁷ Tura ímiaja̱i̱k suntarnasha kawaincha jú̱nisan wainkiamjai. Eketáiniaka netsepnum jirun entsaru armai. Nusha kapa̱a̱ku wiṉkia tura yaṉkú armai. Tura kawaisha úunt ya̱wa̱a muuke̱ áinin armai. Tura ni wene̱ya̱sha jisha, mukuintiusha, asuprisha ti tsue̱r keá jíiniarmai.

¹⁸ Nu menaintiú ti yajauch wáitsamuja̱i̱ menaintiú nakakam shuar untsurí jákarmai. Jíji̱a̱i̱sha, mukuintiuja̱i̱sha, asupriji̱a̱i̱sha jákarmai.

¹⁹ Nuja̱i̱ nu kawái ni wene̱ja̱i̱ shuaran wáitkiasarmai. Tura ni ujuké̱ napí múuke̱ya áinin armai. Núja̱i̱sha shuaran wáitkiasarmai.

²⁰ Tura nuja̱i̱ jákacharmia nú shuar yajauch túratniun peṉké iniaisacharmai. Tura yajauch wakanniasha tura najankamu yusnasha tikishmátratniun iniaisacharmai. Nu ántar yus kuriji̱a̱i̱, kuitji̱a̱i̱, yaṉkú jiruja̱i̱, kayaja̱i̱, numiji̱a̱i̱ najanamu ásar wainmaktinniasha, antuktinniasha tura wekasatniuncha tujintiainiawai.

²¹ Núnisaṉ maṉkartuatniuncha, wawekratatniuncha, tsanirmatniuncha tura kasamkatniuncha iniaisacharmai.