Apu. 8 - Yus Papí: Shuarja̱i̱ Yus Yamaram Chicham Najanamu

Asakamu siatia nu ja̱a̱kma

¹ Nuyá̱ Murik asakamu siátin já̱a̱kmatai nayaimpiniam chikichik ura jeastatuk ajapén mitia ajasmai.

3. Kachu 7 susamu

² Nuyá̱ siati Yusa suntari̱ Yusai̱ naka wajainia wainkiamjai. Nusha siati kachu susamu armai.

³ Nuyá̱ chíkich Yusa suntari̱ kuṉkuin eṉketain kuriji̱a̱i̱ najanamun itiamai. Tura Yus sútai̱nium ayamas wajasmatai núkap kuṉkuin sunasmai. Nu kuṉkuin ashí Yus shuar áujsamuja̱i̱ métek kuṉkuin ekemátainium ekemáktiniuyi. Nu ekemátai̱ kuriji̱a̱i̱ najanamuyi tura úunt akupin pujutai̱nium naka pujumai.

⁴ Tura Yusa suntari̱ ekemákmatai kuṉkuinia mukuintiuri̱ Yus shuar seamuja̱i̱ métek Yus nekaprámai.

⁵ Nuyá̱ nu kuṉkuin eṉketain Yusa suntari̱ achik ekemátainmaya̱ ji kapa̱a̱n kaí̱ri̱n áimiak ju̱ nuṉkanam ukaamai. Túramtai ipiamtasha untsummasha, peemsha tura u̱u̱sha armai.

Kachu umpuarma

⁶ Nuyá̱ siati Yusa suntari̱ kachun takakainia nu umpuartai tusar iwiarnararmai.

⁷ Emka Yusa suntari̱ kachun umpuarmatai micha kákekamai. Nunasha ji numpaja̱i̱ pachimpramuncha nuṉkanam ajapawarmai. Túmakui̱ menaintiú nakakma jean numincha tura ashí írunna nui̱ ekemákmai. Tura ashí nuṉkanam chírichrin takamtsuk ekemákmai.

⁸ Nuyá̱ Yusa suntari̱ jímiara nu kachun umpuarmatai uunt naintia ánin kean nayantsanam aju̱ṉmai. Túramtai menaintiú nakakma jeá nayants numpa ajasmai.

⁹ Núnisaṉ menaint jeá nayantsanam matsatainia jákarmai. Tura menaint jeá uunt kanua nu emesnararmai.

¹⁰ Nuyá̱ Yusa suntari̱ menaintiua nu kachun umpuarmatai ti uunt yaa nayaimpinmaya̱ kapá̱a̱ iniarmai. Tura entsasha tura púkuninmasha menaintiú nakakam jeanum iniarmai.

¹¹ Nu yaasha Yapá numi náartiniuyi. Tura menaintiú nakakam jeá entsa yapá ajasármai. Túrunamtai ti untsurí shuar nu entsa yapá ajasmája̱i̱ jákarmai.

¹² Nuyá̱ Yusa suntari̱ kuatrua nu kachun umpuarmatai menaintiú nakakam jeá etsa̱sha, kashí nantusha tura yaasha emesnarar ajapén tee ajasármai. Túrunawar tsawai̱sha káshisha menaintiú nakakam jeanum tsáapnircharmai.

¹³ Nuyá̱ chíkich Yusa suntari̱ nayaimpiniam nanamun wainkiamjai. Nusha kakantar untsumuk chichaak “Maa, chíkich menaintiú suntar umpuiniakui nuṉká matsatainia nu ti wáitsartatui” timiai.