Apu. 5 - Yus Papí: Shuarja̱i̱ Yus Yamaram Chicham Najanamu

Nayaimpiniam Murik papí uraamu

¹ Nuyá̱ akupin pujutai̱niam pujuma nuna untsuurí̱ni̱ papí pénuimiu takaku pujan wainkiamjai. Nu papisha initiaani̱sha tura pátatkesha áarmauyi. Tura urakchamnia atí tusa siati asaka péekmauyi.

² Tura nayaimpinmaya̱ suntar ti kakarma nu, ti kakantar inintran wainkiamjai. Nisha chichaak “¿Ya akupniuk ju̱ papin asakamun ja̱a̱k urakminiait?” timiai.

³ Tura nayaimpinmaya̱sha nuṉkanmaya̱sha tura jakamunmaya̱sha chikichkisha nu papin urakmin atsumiayi. Áujtsuk íistinniasha tujintkiarmai. Tímianu akupin atsumai.

⁴ Nu papin uraktincha tura áujsatniusha, kame íistincha atsakui tí utmiajai.

⁵ Nuyá̱ chikichik uunt turutmiai “Tí utip. Israer shuarnumia̱ úunt ya̱wa̱, Naṉ. 49:8-12 Jutá wea awai. Nisha úunt akupin Tawit wéaiti. Nupetmaku asa nu papí siati asakamun ja̱a̱k urakminiaiti.”

⁶ Nuyá̱ uunt pujutái̱ya̱ nui̱ tura kuatru taṉkunam ajapén tura úuntnum ajapén Murik wajan wainkiamjai. Maamua áintsaṉketiat iwiaakuyi. Kachurí̱sha siátiyi. Ni ji̱sha siátiyi. Nusha Yusa Wakaní̱ siati ashí nuṉkanam akuprámua nuuyi.

⁷ Nu Murik we nekas úunt Akupniun untsuurí̱nian nu papin achikmiayi.

⁸ Tura papin achikmatai kuatru taṉkusha tura paintikuátru uunt arma nusha Murikiun tikishmátrarmiayi. Ashí uunt arpa tuntuitiai̱n takaku armai. Tura ashí kuṉkuin eṉketain kuri najanamun takaku armai. Nu kuṉkuin Yus shuar áujsamuiti.Mat. 6:10; YKan. 141:2

⁹ Ju̱ yamaram kantancha kantampriarmai “Amek imiá naṉkaamas akupniuitme. Amek papí achikiam asakamu já̱a̱kminiaitme. Yus sutai namaṉkea áinis mantamna asam túramniaitme. Ashí nuṉkanmaya̱ shuarnumia̱sha Yusna árat tusam ame numpe̱mja̱i̱ iin sumakmiame.

¹⁰ Túram akupin awajkartusuitme tura núnisaṉ ii Yusri̱niun pujurin awajkartusuitme. Tuma asakmin akupin ajasár ju̱ nuṉkanam akupkáttaji.” Tu kantamáiniawai.

¹¹ Tura untsurí nayaimpinmaya̱ suntar uunt pujutaincha taṉkuncha tura úuntnasha éṉkekawarun wainkiamjai. Nusha nekapmarchamnia ti untsurí armia nu

¹² kakantar tiarmai “Murik mantamnamia nu akupin ajas ashí kakarmancha, kuítniasha, nekaatniuncha Niṉki achikminiaiti. Tura nupetmaku asamtai yumiṉsar Nin ti shiir awajsatin áiniawai” tiarmai.

¹³ Núnisaṉ ashí Yus najankamu, nayaimpiniam írunna nusha, nuṉkanam írunna nusha, nuṉká init írunna nusha, nayantsanam írunna nusha, tuinian antukmajai “Muriksha tura akuptáinium pujana nusha ti shiir tura ti kakaram ásar tuke iniaitsuk shiir awajnásarti” tuíniawai.

¹⁴ Tura kuatru taṉkusha “Tuke núnisaṉ atí” tiarmai. Tura paintikuátru uuntka nekas tuke iwiaaku pujá nuna tikishmátar shiir awajsarmai.