Apu. 3 - Yus Papí: Shuarja̱i̱ Yus Yamaram Chicham Najanamu

Sártisnumia̱ Yus shuaran papí áatramu

¹ Nuyá̱ turutmiai “Sártisnumia̱ Yus shuara uuntri̱ ju̱ áatrata. Siati Yusa Wakaní̱n takakna nu tura núnisaṉ siati yaan takakna nu, tawai ‘Ashí ame túram nuna nékajai. Iwiaakua áintsaṉ wekayatmek Wíji̱a̱i̱ṉkia jákaitme.

² Shintiarta. Kaji̱nia nu umpuim ekemákta. Kame Yusja̱i̱ iisam péṉker túrichuitme.

³ Yus Chicham ti shiir enentáiji̱a̱i̱ emka antukmam nu ataksha enentáimpram emetata. Tura tunaarumsha enentáimpram iniaisata. Tura iniaiyachkumni̱ṉkia kasa núnisnak nékatsmin jeartiatjame.

⁴ Tura Sártisnum shuar ishichik pushiri̱ wapikmákcharu pujuiniawai. Nusha tí peṉker áiniak pushí pújun entsarar Wiji̱a̱i̱ wekasartatui.

⁵ Nupetmakuka pushí pújun entsartatui. Tura iwiaaku átinia nu papiniumia̱ ni naari̱ áarman japirashtatjai. Antsu winia Apar tura ashí nayaimpinmaya̱ suntar íimmianum shiir áujmattsattajai.

⁶ Kuíshtinia nu shuar Yusa Wakaní̱ ashí Yus shuaran timian antukti.’ Tu aartá” turutmiai.

Piratírpianmaya̱ Yus shuaran papí áatramu

⁷ Nuyá̱ turutmiai “Piratírpianmaya̱ Yus shuara uuntri̱ ju̱ áatrata. Ti shiir túrin tuke nekasan tana nu, úunt akupin Tawitia yawiri̱ takaku asa uraimtai chíkich peṉké epenchamniaiti. Tura epenmiatai chíkich peṉké uraichminiaiti. Ju̱na tawai

⁸ ‘Ashí ame túram nuna nékajai. Kakarmachuitiatmek winia chichamur shiir enentáimtakum Winia initiuschaitme. Tuma asakmin wáitin uratjiame. Nuna chíkich peṉké epenchamniaiti.

⁹ Wátsek. Shuar wáitruiniak “Israer shuaraitjiai” tuíniayat iwianchi uuntri̱ Satanás shuar áiniawai. Nu shuaran nekas ámin aneajna nuna nekaawarat tusan amiini̱ tikishmátkiarartatjai.

¹⁰ Katsuntrata tímiaj nu, shiir umirka asakmin Wisha tí wáitsatin ashí nuṉkanam átatna nuyá̱ uwemtikrattajme. Nu wáitsatniuja̱i̱ ashí nuṉkanmaya̱ shuar nekapnasartatui.Rum. 14:10; 2 Kur. 5:10

¹¹ Wárik winittiajai. Takakmena nu emetata. Akinkiatniuitmena nuna chíkich shuar atantramkiara̱i̱ṉ.

¹² Nupetmakunka winia Yusru je̱e̱ pauri̱n awajsattajai. Tura nuyá̱ peṉké jíinkichartatui. Tura nin winia Yusru náari̱n áatrattajai. Tura winia Yusru pépruri̱ náari̱ncha áatrattajai. Nu pépruka nayaimpinmaya̱ yamaram Jerusaréṉka Yusai̱ya̱ tara núiti. Núnisaṉ winia yamaram náarun nin áatrattajai.

¹³ Kuíshtinia nu shuar Yusa Wakaní̱ ashí Yus shuaran timian antukti.’ Tu aartá” turutmiai.

Rautiséanmaya̱ Yus shuaran papí áatramu

¹⁴ Nuyá̱ turutmiai “Rautiséanmaya̱ Yus shuara uuntri̱ ju̱ áatrata. Wáitrutsuk nekasa nunak tiniua nu tura núnisaṉ ashí Yus najanamun úuntri̱ya nu, tawai

¹⁵ ‘Ashí ame túram nuna nékajai. Tura michaash míchachuitme. Núnisaṉ tsue̱rsha tsué̱rchaitme. Míchaitkiumsha tura tsué̱raitkiumsha maak.

¹⁶ Kame míchachu tsue̱rcha antsu aya tsué̱tsue̱tak asakmin imiutkattajme.

¹⁷ Iis “Kuítrinniuitjiai, ti irumpraitjiai, warinkisha atsumatsjai” tame. Túrasha ashí yajauch, wáitnenmai, kuítrincha, kusuru tura misú iyajme.

¹⁸ Tuma asam ju̱na chichareajme. Winí̱ ti shiir kuri sumakam nekas kuítrintin ajasta. Túram puju pushí Winí̱ sumakam misú ajasma shiir entsarta. Péṉker íimprataj tusam ji̱nium eṉketai̱ eṉkeeta.

¹⁹ Aneajna nuna chichareajai. Nu asamtai kakaram ajasam tunaarum enentáimpram iniaisata.

²⁰ Enentáimprata. Shuar wáitiniam wajas untsumna áintsanak Wi ámin untsúajme. Winia anturtukam ame enentáimin awa̱intiakminkia Wi wai̱ntiuattajme. Tura waya̱n ámiji̱a̱i̱ yurumáttajai. Tura amesha Wiji̱a̱i̱ yurumáttame.

²¹ Nupetmakuka akupin pujutai̱nium Wiji̱a̱i̱ pujustatui. Wisha núnisnak nupetmaku asan winia Aparja̱i̱ akupin pujutai̱nium pujusuitjiai.

²² Kuíshtinia nu shuar Yusa Wakaní̱ ashí Yus shuaran timian antukti.’ Tu aartá” turutmiai.