Apu. 22 - Yus Papí: Shuarja̱i̱ Yus Yamaram Chicham Najanamu

¹ Nuyá̱ suntar tuke iwiaaku pujutai̱ entsan tí saaran iniaktursamai. Nusha úunt akupin pujutái̱nmaya̱ ti saawi jiinmiai. Nu pujutai̱sha Yusna tura Muriknauyi.

² Pepru jinti̱ncha tura entsá mái̱ paen tuke iwiaaku pujutai̱ numi wajamai. Nusha ashí tuse nantutin neremai. Ni nuke̱sha ashí nuṉkanmaya̱ shuar tsuámatainti.

^3-4 Ashí yajauchia nuka atsuttawai. Uunt akupin pujutai̱ Yúsnasha Murikniasha nui̱ṉ aa asamtai ni shuari̱ ti paant wainiainiak tikishmátrartatui. Tura nijia̱i̱ncha ni naari̱ anujmamkartatui.

⁵ Tura káshisha atsuttawai. Nui̱ pujuinia nuka shiripkincha etsa̱ncha atsumchartatui. Uunt Yusak tuke tsáapin awajtiatui. Tura ni shuari̱ tuke iniaṉnatsuk akupkartatui.

Jesukrístu tátintri̱ peṉké nuntumsai

⁶ Nuyá̱ suntar chichartak “Ju̱ Chicham ti nekas asa nekas enentáimtusminiaiti. Uunt Yus yaunchu níniun etserniun ni chichame̱n enentáimtikramia núnisaṉ yamaikia ni suntari̱n akuptuk wárik túrunatta nuna ashí ni shuari̱n ujakuiti” turutmiai.

⁷ “Tí warik winittiajai” tawai Murikkia. Shuar ju̱ papinium Yusa Chichame̱ áarman umirna nuka shiir warasminiaiti.

⁸ Wi, Juaṉ, ju̱na mash iisan mash antukmajai. Tura mash iisan antukan nayaimpinmaya̱ suntar iniaktursama nuna shiir awajsataj tusan tikishmátramjai.

⁹ Túram chichartak “Íimsakia áinkiaip. Wisha Yusa yáintri̱ntjiai ámiji̱a̱i̱ tura yatsumji̱a̱i̱ méteketjai. Yúsnan etserin ásar tura ju̱ papinium aarma nuna umirainiak nisha Yusa yaintri̱ áiniawai. Yusak shiir awajsatniuiti.”

¹⁰ Nuyá̱ ataksha turutmiai “Ju̱ papinium aarma Yusna asamtai ú̱kam ikiusaip. Ashí túrunatin tsawant ishichik ajatésai.

¹¹ Nu jeatsa̱i̱ṉkia yajauch shuarka tuke yajauch túruki̱ wetí. Núnisaṉ mui̱jmiainian túraka tuke túruki̱ wetí. Antsu péṉkeran túraka péṉkeran túruki̱ wetí. Núnisaṉ esetar enentáimniusha tuke esetar Yusja̱i̱ wekasati” turutmiai.

¹² Muriksha tawai “Ee, tí warik winittiajai. Túran tí shiirmachin ashí péṉker túramuja̱i̱ métek súsatniua nuna takukin winittiajai.

¹³ Witjiai. Yámankamtaikniumia̱ amúanmasha tuke pujuwitjiai. Wisha A rétranmaya̱ Y rétranam ashí retra áintsaṉketjai” tawai.

¹⁴ Ni pushiri̱ péṉker nijiamatniua núnisaṉ péṉker túrinia nú shuar shiir warasminiaiti. Nu shuar nu pepru wáitiri̱ncha waya̱mniaiti. Túrar tuke iwiaaku pujutai̱ numinmaya̱ yuámniaiti.

¹⁵ Tura antsu Yusan enentáimtachuka, wawekratniuka, tsanirmatan pujurainia nuka, maṉkartinkia, najankamu yusan tikishmátniuka tura ashí shuar wáitian wararainiak tuke túrin ainia nuka a̱a̱ matsatainiak peṉké waya̱chmin áiniawai.

¹⁶ “Wi, Jesus, ashí Yus shuaran ujakárat tusan winia suntarun akupkajai. Wikia Tawit Weaitjiai. Túrasha Tawitia úuntri̱ntjiai. Wikia tí tsaapin yaa Yáṉkuamia áintsaṉketjai” tawai.

¹⁷ Yusa Shiir Wakaní̱sha tura Murik anajmarmasha “¡Winitiárum!” tuíniawai. Tura ju̱na ántana nusha “¡Winitiárum!” tití. Tura ashí kitiama nuka winití. Wakerakka tuke iwiaaku pujutai̱ entsan peṉké kuítchaja̱i̱ umarti.

¹⁸ Ashí shuar ju̱ papinium Yus Chicham aarma nuna antukarun ju̱na ujaajai. Shuar ju̱i̱ áarman chikichan pataakka Yus nin tí waitsatin ju̱i̱ aarma nuna patattsattawai.

¹⁹ Núnisaṉ shuar ju̱i̱ áarman emeneakuiṉkia Yus ni náari̱n iwiaaku pujutai̱ papiniumia̱ japirattawai. Tura ti shiir péprunam waya̱tniun suritkiattawai. Nu péprusha tura nu papisha ju̱i̱ paant ujakma áiniawai.

²⁰ Jú̱ papí áantratniun ujakua nu tawai “¡Ee, ti wari winittiajai!” ¡Pai, núnisaṉ atí! ¡Wari winitiá, Uunt Jesusá!

²¹ Ii Uuntri̱ Jesukrístu atumniasha shiir yaintmakarti. Nuke atí.