Apu. 18 - Yus Papí: Shuarja̱i̱ Yus Yamaram Chicham Najanamu

Papirúnia emesramu

¹ Nuyá̱ nayaimpinmaya̱ suntar táarun wainkiamjai. Ti kakaram akupin asa nuṉkancha tsáapin awajsamai.

² Tura ti kakantar chichaak timiai “Pai, Uunt Papirúnia peṉké meserai. Tura yamaikia íwianch matsamtaisha ashí yajauch wakaní̱ pujutái̱ri̱sha ajasái. Mui̱jmiai̱ nanamtincha tura ashí yajauch nanamtin ainia nusha nui̱ pasuṉmainiawai.

³ Nu péprunmaya̱ aents tuke tsanirmaua núnisaṉ ashí nuṉkanmaya̱ shuaran anampratniua núnisaṉ ni ti yajauch túramuja̱i̱ utsurmai. Núnisaṉ ashí jú̱ nuṉkanmaya̱ akupin Yusan iniaisar niji̱a̱i̱ tsanirmawarua áinis áiniawai. Tura súrin ainia nusha ni yajauch wararmaja̱i̱ ti kuítrintin ajasáruiti” timiai.

⁴ Nuyá̱ nayaimpinmaya̱ ti kakantar chichaman antukmajai. “Wí shuaraitrumna nuka nú peprunmaya̱ jíinkitiarum. Túrachkurmeka ni tunaarí̱ jumamkirum ni wáitsatniuri̱ncha pachinkiattarme.

⁵ Ni tunaarí̱sha ti piak nayaimpiniam jeastatuk ajasái. Tuma asamtai Yus ni tunaari̱n kajinmatkichuiti.

⁶ Ni tunáa túramuja̱i̱ métek akikiam ataksha nuna naṉkaamas métek patattsata. Ni yajauch túramu nijiamchin ashí árarma núnisaṉ nuna naṉkaamas tí waitsatin nijiamanch pachimpruram susata.

⁷ Waantu enentáimtumak yajauchin wararsama nuja̱i̱ métek ti wáitkiasta yamaikia. Tunaan ti túriniaitiat ni enentái̱nkia enentáimias ‘Úunt akupniuitjiai. Wáje̱chu asan peṉké wáitsashtiniaitjiai’ Isa. 47:7-8 tu enentáimtumawai.

⁸ Tuma asamtai ti wárik chikichik tsawantai̱ ni wáitsatniuri̱ tarittiawai. Jákatniusha ti wáitsatniusha tura tsukasha tarí ashí jiji̱a̱i̱ ekemánkattawai. Uunt Yus Ashí Tujintkiachua nu kajerkámu asa nuja̱i̱ asutniáttawai” timiai.

⁹ Ashí nuṉkanmaya̱ akupin niji̱a̱i̱ tsanirmawaru ainia nu ashí yajauchin niji̱a̱i̱ wararsaru ásar nu pepru esaak múkuint ajakui e̱a̱rarmai.

¹⁰ Ti esaak wáitiakui nui̱ pachinkiar wáitsatniun ashamainiak arant wajasar tiártatui “Maa, Papirúnia ti uunt pépruitiat nekas wáitnenmai ajawai. Imiá wárik ni wáitsatniuri̱ tarini̱.”

¹¹ Núnisaṉ ashí nuṉkanam súrin ainia nusha nu péprun tí kuntuts enentáimturar e̱a̱rartatui. Ni surutain itiamun ¿yaki sumarkat?

¹² Kame ju̱na itiaru áiniawai, kurincha, kuítniasha, kaya shíirmachincha, ti shiir sháuknasha, tí peṉker tarachniasha, akupin entsatái̱ shíirmachin yamakáincha kapa̱a̱nniuncha, sétancha itiaru áiniawai. Núnisaṉ ashí kuṉkuin numincha, ti shiir awara najanamuncha, tí shiiram numincha yaṉkú jiruncha, peṉké jiruncha, mármur kayancha itiaru áiniawai.

¹³ Núnisaṉ ishpiṉnasha, nusháa kuṉkuinniasha, mira kuṉkuinniasha, umutaincha, asuitincha, trikiu nere̱ncha tura trikiu tí peṉker nekeṉmancha itiaru áiniawai. Núnisaṉ aentstai̱ taṉkuncha, murikniasha, kawaincha ni káruri̱ji̱a̱i̱ tura nú arantka shuarnasha suruktinian itiaru áiniawai.

¹⁴ Tura nu péprun tiarmai “Numí nere̱n ti wakeruk súmauya nu yamaikia nui̱ atsawai. Ashí ni kuítri̱sha tura ashí ni péṉkeri̱sha tuke peṉké amuukayi” tiarmai.

¹⁵ Ashí nuna súrin armia nu, nuna surukar kuítrintin ajasáru ásar ti wáitsamun ashamkar arant wajasar e̱a̱rartatui.

¹⁶ Túrawar tiártatui “Maa, uunt pépruitiat ti wáitnenmai ajakai. Nuwa̱ tí peṉker iwiarmampra áinis nuyá̱ shuar akuptai̱ tarachin yamákáiji̱a̱i̱ kapa̱a̱ku entsarmai. Kuriji̱a̱i̱sha kaya tí shiirmachiji̱a̱i̱sha tura tí peṉker sháukja̱i̱sha ti shiir iwiarmampraruyi.

¹⁷ Ti wárik ashí ju̱ kuit amuukaiti” tiarmai. Ashí uunt kanú kapitiántri̱sha, ashí nayantsanam katinia nusha ashí kanú wianniusha tura ashí kanú nérenniuri̱sha árantak wajasármai.

¹⁸ Tura pepru esaak múkuint ajaan wáinkiar ti kakantar útainiak tiarmai “Timiá shiir pepru atsuwiti.”

¹⁹ Tiar tí kuntuts pujuiniak awatmamar kakantar útainiak tiarmai “Maa, tí uunt pépruitiat ti wáitnenmai ajakai. Ashí uunt kanu nérentin nayantsanam niji̱a̱i̱ takasar kuítrintin ajasármai. Tura tí warik mash emesnarai.

²⁰ Antsu nayaimpiniam pujarumna nu, ashí Yus akatrámutirmesha, ashí Yusna etserniutirmesha tura ashí Yus shuar árumna nu ni wáitsamuja̱i̱ warastarum. Nu wáitsamuja̱i̱ atumín yajauch awajtámsamarmena nuna yapajtiúrmakurme” tiarmai.

²¹ Nuyá̱ ti kakaram nayaimpinmaya̱ suntar ti uunt neketai̱ kayan jukí̱ nayantsanam aju̱ṉ timiai “Jú̱nisaṉ uunt pepru Papirúnia emesnar atakka wainniakchatin tuke meṉkakattawai.

²² Tura atakka jantsemma piṉkiuisha tampursha shakapsha antunkashtatui. Nu arantcha nui̱ṉkia shuar peṉké takakmaschartatui. Túramtai nekeamusha antunkashtatui. Ashí mitia átatui.

²³ Shiripkincha ekemákchartatui. Nuatma nampersha antunkashtatui. Nuikkia ni shuari̱ súrin arma nu ashí nuṉkanam naṉkamantu armai. Tura ashí nuṉkanmaya̱ aentsun waweatniua áintsaṉ niya núnis ajasarat tusa anaṉkawarmai. Túrasha núnisaṉ ti kakarmaitiat ju̱ mash túrunayi.

²⁴ Kame ni akupkámuja̱i̱ péṉker shuar ti mantamnawaru asamtai nu péprunam ashí yaunchu Yusna etserniu numpe̱sha ashí Yus shuara numpe̱sha tura péṉker shuar ashí nuṉkanam maamu ainia nuna numpe̱sha nui̱ paant wainkiamniaiti” timiai.