Apu. 17 - Yus Papí: Shuarja̱i̱ Yus Yamaram Chicham Najanamu

6. Ímiaja̱i̱k sumamtikiatin wainma Tsanirmatai nuwa̱ asutiámu

¹ Nuyá̱ siati suntarnumia̱ chikichik taruti turutmiai “Winitiá. Tsanirmatai nuwa̱ ti asutiátniun iniaktustatjame. Nu nuwa̱ nayantsanam uku eketui.

² Ashí ju̱ nuṉkanmaya̱ akupin niji̱a̱i̱ tsanirmawaru áiniawai. Núnisaṉ ashí ju̱ nuṉkanmaya̱ aents, nu nuwa̱ tsanirmatniun tsaṉkateam, nijiamanch umartinia áintsar niji̱a̱i̱ ti yajauch túrawar nampekarmai.” Nuna taku Yusai̱ya̱ kanaktinian nakumkamai.

³ Nuyá̱ mesekranam kampuntin atsamunam jurukmiai. Tura nui̱ Yajasma kapa̱a̱kunam nuwa̱ eketun wainkiamjai. Nu Yajasmanmasha ashí Yusan yajauch chichareamu áatramuyi. Muuke̱ siátitiat kachuri̱ tiásauyi.

⁴ Nu nuwa̱sha tarach yamákái kapa̱a̱kuja̱i̱ ti shiir iwiarmamar entsaruyi. Kuriji̱a̱i̱sha, shíirmach kayaja̱i̱sha, ti shiir sháukja̱i̱sha iwiarmamprauyi. Kurí piniṉkian mui̱jmiainniasha tura ashí ni tsanirmatairi̱ imiá yajauch armia nunasha piákun ajaamak takakuyi.

⁵ Nijia̱i̱niumsha ni naari̱a áintsaṉ yúpichuch nekaachminia nu jú̱nis áarmauyi, UUNT PAPIRÚNIA, ASHÍ TSANIRMAUNCHA tura ASHÍ JU̱ NUṈKANAM MUI̱JMIAINIAN TÚRINIA NUNASHA NUKURI̱NTI.

⁶ Nu nuwa̱sha Yus shuar Krístunun etserkar máwarma ainia nuna numpe̱n nampekuyi. Nuna wainkian ti enentáimturmajai.

⁷ Túrunamtai nayaimpinmaya̱ suntar turutmiai “¿Urukamtai imiá enentáimtam? Wats, ashí nuwa̱nun paant ujaktatjame. Núnisan yajasma ekenak júana nunasha paant ujaktatjame. Muuke̱sha siátichukait tura kachurí̱sha tiáschak ainia.

⁸ Nu yajasma wainkiam nuka yaunchu pujuwiti tura yamaikia ju̱i̱ pujachiat amúamunam tuke játsuk náṉkatkachu wá̱a̱nmaya̱ jiinkittiawai. Shuar nuna wáinkiar ni naari̱ tuke iwiaaku pujutai̱ papinium yámankamtaikniumia̱ anujtúkchamua nuka nu yajasman ashamkartatui. Nu yajasma yaunchu pujú yamaikia atsayat atak wantinkiattawai turutmiai.

⁹ Nekas neka ainia nu ju̱na enentáimturarti. Siati muuke̱ṉka siati náintian nakumui. Nu nuwa̱ nui̱ eketui.

¹⁰ Núnisaṉ ni siati muuke̱ siati akupniun nakumui. Kame seṉku akupniúka naṉkaamasaru áiniawai. Chikichik tuke akupniuiti tura chíkichka tuke taatsui. Ni taasha núkap tsawant akupkashtatui.

¹¹ Nuyá̱ ashí ukunmaṉka yaunchu amia nú yajasma wantiniak nuja̱i̱ uchu akupin ajastatui. Túmaitiat chíkich siati akupniuja̱i̱ iruram métek enentáimpramniaiti. Tura nu yajasma yamaikia atsayat wantiniak akupak umik tuke emesnartinnium wétatui turutmiai.

¹² Tias kachuri̱ wainkiam nuka tias akupin tuke akupénatsna nuiti. Nisha nu yajasmaja̱i̱ métek peṉké ishichik tsawant akupin ajasártatui.

¹³ Ju̱ tias akupniúsha métekrak enentáimiainiak ni kakarmari̱n núja̱i̱sha akupkat tusar yajasman súsartatui.

¹⁴ Murikji̱a̱i̱sha mesetan najanawartatui. Túrasha Murik nupetkartatui. Nisha uuntja̱i̱ naṉkaamas Uunt asa tura núnisaṉ akupniúja̱i̱ naṉkaamas Akupin asa nupetmaktatui. Tura Niji̱a̱i̱ írutraa nu, Yus Winia atí tusa achikma ásar tura Nin tuke umirin ásar Niji̱a̱i̱ nupetmakartatui.”

¹⁵ Suntar tuke chichartak turutmiai “Tsanirmatai nuwa̱ nayantsanam uku eketu wáinkiachumek. Nu nayantsaka ashí nuṉkanmaya̱ aentsun nakumeawai.

¹⁶ Tura tias káchuka yajasmanum wainkiam nu, tsanirmatai nuwa̱n nakitrar ajapawar misú ikiukiartatui. Ni aya̱shí̱ncha yuáwartatui tura áesawartatui.

¹⁷ Nu akupniu enentái̱n Yuska ni wakeramuri̱n apujsaiti. Ni timia nu umintsa̱i̱ṉ akupniúsha métekrak enentáimprar ni kakarmari̱n takamtsuk yajasman súsatniun enentáimtikramai.

¹⁸ Nuwa̱ wainkiam nuka ashí nuṉkanmaya̱ akupniun akupeana nu pépruiti” tímiayi.