Apu. 15 - Yus Papí: Shuarja̱i̱ Yus Yamaram Chicham Najanamu

5. Piniṉ 7 susamu Awakmakaru kantamáwarma

¹ Nuyá̱ ashammain ti enentáimpramnian nayaimpiniam wainkiamjai. Siati suntar amúamunam wáitkiastinia nuna takusarmai. Nuja̱i̱ ju̱ nuṉkanam yajauch shuaran ti wáitkiasar Yus kajeamun umirtatui.

² Nuyá̱ antumiaṉka áintsaṉ ti saar jiji̱a̱i̱ pachimpramun wainkiamjai. Ni kaanmatkari̱ncha Entsaya̱ Yajasman tura ni nakumkamuri̱ncha nupetkarma nu nui̱ wajaarmai. Tura nin arpa tuntuitiai̱n Yus súsarmai.

³ Túramtai kantamáwarmai. Yusa takarniúri̱ Muisaisa kantari̱ncha tura Murikiu kantari̱ncha kantamáiniak tiarmai “Uuntá, Ashí Tujinchaitme. Tí peṉker tura ti enentáimturmin ashí najanaitme. Ashí Úunt Akupin asam ashí nekasa nu túrasha péṉkera nu túriniaitme.Use. 14:9

⁴ Uuntá ¿yaki ashampramkachatⁱ. Tura yaki ti shiir awajtámsachatⁱ? Aya Amek ti shiir tunaarinchaitme. Ashí nuṉkanmaya̱ shuar ame ti shiir túramun wáinkiar Aminiak jeartámar ti shiir awajtámsartatui.” YKan. 86:9 Tu kantamáwarmai.

⁵ Nuyá̱ atak Yusa Uunt Je̱e̱n iisan Ti Shiir Tesamun uranniun wainkiamjai.

⁶ Tura Ti Shiir Tesamunmaya̱ siati suntar siati wáitkiastinji̱a̱i̱ jíinkiarmai. Nisha ti shiir pújun entsaru armai. Netsepnumsha kurin emenmama armai.

⁷ Nuyá̱ kuatru taṉkunmaya̱ chikichik kurí piniṉkian súsarmai. Nu piniṉ tuke iwiaaku Yusa kajetáiri̱ji̱a̱i̱ piaku armai.

⁸ Tura Yusa kakarmari̱ ti ashammai Ti Shiir Tesamunam mukuintiua núnis piakmai. Túramtai nu siati suntar wáitkiastinian ukarar amuiniatsa̱i̱ṉ Yusa Je̱e̱n waya̱chminiuyi.