Apu. 14 - Yus Papí: Shuarja̱i̱ Yus Yamaram Chicham Najanamu

144.000 shuar Yus kantampruámu

¹ Nuyá̱ Murikiun Seun nainnium wajan wainkiamjai. Níji̱a̱i̱sha siantu kuaraintikuátru mir shuar wajaarmai. Nusha nijiái̱ Murikiu náari̱ncha tura ni Aparí̱ náari̱ncha anujtúkma aarmai.

² Ti untsurí árpan nayaimpiniam túntuiniak te̱e̱r awajénak kanusa uuntri̱ nujaṉkrak téter ajá núnisaṉ antukmajai. Ti kakaram ipiamta núnis amai.

³ Nu tuntuiyamuja̱i̱ siantu kuaraintikuátru mir shuar akupin pujutai̱nium naka wajasar yamaram kantan kantamáwarmai. Nisha kuatru taṉkunmasha tura paintikuátru úuntnumsha naka wajasar kantamáwarmai. Nu kantanka chíkichka nekaachmin armai. Aya nu siantu kuaraintikuátru mir shuarka jú̱ nuṉkanmaya̱ shuarnumia̱ uwempraru ásar nu kantan kantamiarmai.

⁴ Nu shuarsha nuwa̱ja̱i̱ yajauch ajascharu ásar ti shiir áiniawai. Túrawar Murik wéana nui̱ nemarainiawai. Ju̱ nuṉkanmaya̱ shuarnumia̱ uwempraru ásarmatai Yussha tura Muriksha ti shiir enentáimtiarmai. Nisha emka juukma ti shiira núnisaṉ armai.

⁵ Nu shuar peṉké wáitrichu ásar Yusai̱sha ti shiir tunáa máatrachu armai.

Menaintiú suntar chícham étserma

⁶ Nuyá̱ nayaimpiniam suntar nanamun wainkiamjai. Nusha uwempratin chicham tuke amuukashtinia nuna ashí nuṉkanam pujuinia nú shuaran ujakártiniuyi.

⁷ Nusha ti kakantar untsumuk timiai “Yus ashamkatarum. Niṉki shiir awajsatarum. Yamaikia ashí shuaran súmamtikiawartin tsawant jeayi. Nayaimpincha nuṉkancha nayantsancha ashí entsancha najana asamtai shiir awajsatarum.”

⁸ Nuyá̱ chíkich suntar, jímiara nu, taa timiai “Pai, Uunt Papirúniaka peṉké meserai. Nisha tuke tsanirmatia núnisaṉ ashí aentsun aar anamkatniua núnisaṉ utsurmai. Tuma asa nisha nú aentsja̱i̱ nupetnak tuke emesnarai.”

⁹ Nuyá̱ chíkich suntar, menaintiua nu, taa timiai “Shuar Entsaya̱ Yajasmancha tura ni nakumkamuri̱ncha shiir awajeakuiṉkia tura nijia̱i̱niumsha uwejnumsha ni naari̱ anujtúkmaitkiuiṉkia

¹⁰ Yus nin kajerak ti asutiáttawai. Yapá pachimprachman áartinia áintsaṉ ti kajerkattawai. Túramtai asupri ti tsue̱r keá nuja̱i̱ jinium wáitsartatui. Yusa suntari̱ tura Murik íimmianum apenáwar jinium wáitsartatui.

¹¹ Ni wáitsatniuri̱ ji esaak kajintsuk tuke mukuintia núniskete. Entsaya̱ yajasman tura ni nakumkamuri̱n shiir awajénak ni naari̱ anujmamainia nuka tsawai̱sha káshisha ayamtsuk wáitsartatui.

¹² Nu asamtai ni chichame̱n umirainiak Yusna ainia nuka Krístun ti shiir nemarainia ásar nu tsawantai̱ itiurchatnum pujuiniak katsuntratin áiniawai.”

¹³ Nuyá̱ nayaimpinmaya̱ chichaman antukmajai. Nusha turutmiai “Ju̱ áatrata ‘Uunt Jesusan umirainia nu yamái jákarusha tura ukunam jákarusha ti shiir pujusártatui.’ Tu aartá” timiai. Núnisaṉ Yusa Wakaní̱ tawai. “Ee, tí takasaru ásar jákar yawe̱rman ayamprartatui. Tura tí peṉker túrawar akinkiartatui” tawai turutmiai.

Jú̱ nuṉkanam árak juukma

¹⁴ Nuyá̱ yuraṉkim pújun wainkiamjai. Tura yuraṉminiam Aents Ajasua nuna eketun wainkiamjai. Akuptai̱ tawaspan kuriji̱a̱i̱ najanamu etseṉkrakuyi. Tura machitian éren takakuyi.

¹⁵ Tura chíkich suntar Yusa Uunt Je̱e̱nia̱ jiinkí̱ yuraṉminiam eketun kakantar chicharuk timiai “Árak júuktin tsawant jeayi. Machitrumja̱i̱ tsupiram juuktá.”

¹⁶ Tutai yuraṉminiam eketu ni machitri̱ji̱a̱i̱ nuṉká arakman tsupir juukmai.

¹⁷ Nuyá̱ chíkich suntar Yusa Uunt Je̱e̱ nayaimpiniam ana nuyá̱ jiinkimiai. Nisha ni machitri̱ éren takakuyi.

¹⁸ Tura chíkich suntar Yus áestutai̱nmaya̱ jiinkimiai. Nisha jinia wáinniuyi. Tura máchit ti éren takakun kakantar chicharuk timiai “Machitrum ti érea nuja̱i̱ uwa nuṉká arakma nu tsupiram juuktá. Mash tsamakarai.”

¹⁹ Tutai suntar ni machitri̱ji̱a̱i̱ ashí nuṉkanmaya̱ uwa nere̱n tsupir juukmai. Tura neketai̱niam chumpíamai. Nu neketai̱ Yus ti kajerak shuaran ti asutiátta nuna nakumeawai.

²⁰ Tura uunt péprunmaya̱ arantach ijiurarmai. Tura neketai̱nmaya̱ numpa jiinkimiai. Nu numpa traisiantu kirumitrua nui̱ pajamar kawái nuji̱ji̱a̱i̱ métek ajasmai.