Apu. 13 - Yus Papí: Shuarja̱i̱ Yus Yamaram Chicham Najanamu

Nuyá̱ jimiará Yajasma

¹ Nuyá̱ nayantsa kaanmatkari̱i̱n wajasan nayantsanmaya̱ Yajasman jíiniun wainkiamjai. Muuke̱sha siátitiat kachuri̱ tias tura akuptai̱ tawaspasha tias armai. Ashí muuke̱n Yusan yajauch chicharin tu áarmauyi.

² Nui̱ wainkiamaj nu Yajasma nekas úunt ya̱wa̱a ániuitiat nawe̱nka chai̱ nawe̱a ániuyi. Wene̱sha nekas kajen ya̱wá̱a ániuyi. Tura Ti Kajen Yajasma Entsaya̱ Yajasman ni kakarmari̱ncha tura ni akupkatniuri̱ncha susamai nuja̱i̱ ti kakaram akupkati tusa.

³ Entsaya̱ Yajasma muuké̱ chikichkin jakamnia awatmian wainkiamjai. Túrasha péṉker awajnásmai. Túramtai ashí nuṉkanmaya̱ aents nuna iisar ti enentáimturar nemarsarmai.

⁴ Túrawar nin tikishmátrar shiir awajsar “¿Yaki jú̱ja̱i̱sha jeá. Imiá kakaram asamtai yaki niji̱a̱i̱ mánaikminiait?” tiarmai. Tura Ti Kajen Yajasma ni kakarmari̱n Entsaya̱ Yajasman susa asamtai ashí aents nincha tikishmátrarmai.

⁵ Núnisaṉ nu Entsaya̱ Yajasma waantu enentáimtumak Yusan yajauch chicharkatniusha tsaṉkatnakmai. Tura kuaraintitús nantutin kakaram akupkatin sunasmai.

⁶ Núnisaṉ túrak Yusan yajauch áujmatuk ni náari̱ncha ni Je̱e̱ncha tura ashí ni shuari̱ nayaimpiniam pujuinia nunasha katsekkarmai.

⁷ Tura Yusna ainia nuja̱i̱ mesetan najana nupetkatniun tsaṉkatnakmai. Tura ashí nuṉkanmaya̱ aents akupkatniun tsaṉkatnakmai.

⁸ Túramtai ashí aents tuke iwiaaku átinia nu papinium ni naari̱ yámankamtaikniumia̱ anujkamu atsúarma nuka nu Yajasman tikishmátrarmai. Nu papincha Murik jaka nantakmia nu takakui.

⁹ Shuar ju̱na ántakka enentáimprati.

¹⁰ “Shuaran emeta juinia nusha emetnattawai. Núnisaṉ shuaran naṉkiji̱a̱i̱ mainia nusha naṉkiji̱a̱i̱ mantamnattawai.” Isa. 33:1 Tuma asamtai Yajasma mesetan najanamtai Yus shuar Yus iistí tusar tuke enentáimtusar katsuntsar pujustin áiniawai.

¹¹ Nuyá̱ chíkich Yajasman kukaria̱ wáakun wainkiamjai. Nusha murikiua ánin jimiará kachurtiniuyi. Tura Ti Kajen Yajasma áinis kakaram chichaakuyi.

¹² Nisha Entsaya̱ Yajasma kakarmari̱n súam akupniuyi. Tura ashí nuṉkanmaya̱ aentsun “Entsaya̱ Yajasma peṉké jaa tsuarma nu, shiir awajnásti” timiai.

¹³ Núnisaṉ aentsti túrachminian tí túrin asa ashí aents iimiainiai̱ṉ nayaimpinmaya̱ jinia nuṉká aju̱a̱rmai.

¹⁴ Tura Entsaya̱ Yajasma súam aents túrachminian tí turak ashí nuṉkanmaya̱ aentsun anaṉkawarmai. Túrak Entsaya̱ Yajasma nakumkamuri̱n najanawarat tusa akupkámai. Túramtai puya̱ja̱i̱ peṉké jakamnia awatmia péṉker ajasma nuna nakumkamuri̱n najanawarmai.

¹⁵ Kukaria̱ Yajasma kakaram sunasmai. Nuja̱i̱ Entsaya̱ Yajasma najanamun iwiaaku awajsatniua áintsaṉ ichachkiamai. Túram ashí níniak shiir awajeacham mátniun susamai.

¹⁶ Nu arantcha ashí aents anujmamprarat tusa akupkámai. Uuntcha uchisha kuítrinniusha kuítrinchasha aṉkantcha aṉkantchasha ashí ni nijia̱i̱ncha tura wakerakka untsuurí̱ni̱sha anujtúktiniuyi.

¹⁷ Entsaya̱ Yajasma náari̱n tura wakerakka ni naari̱ númiruri̱n anujtúktiniuyi. Túrachuka sumatnasha sumakchamniuyi, surutnasha surukchamniuyi.

¹⁸ Wats, wi tájana ju̱ nekaatniuka ti nekas enentáimtustiniaiti. Entsaya̱ Yajasma númiruri̱ áishmaṉka númiruri̱ asa saisiantu sasaintisáisaiti. Ashí ti neka ainia nú aents Entsaya̱ Yajasma númiruri̱n nekapmar nin nekaati.