Apu. 12 - Yus Papí: Shuarja̱i̱ Yus Yamaram Chicham Najanamu

4. Túrunattana nuna nakumma Nuwa̱ tura Ti Kajen Yajasma

¹ Nuyá̱ nakumkamu ti enentáimpramnia nayaimpiniam wantinkiamai. Nuwa̱ etsa̱ja̱i̱ penuarma wantinkiamai. Nawe̱sha nantunam ekeemai. Tura muuknum tuse yaan etseṉkrakuyi.

² Nu nuwa̱ ajamtin asa takustaj tusa wáitiak ti kakantar utmiai.

³ Tumai̱ ataksha ti enentáimpramnia nayaimpiniam wantinkiamai. Ti Kajen Yajasma kapa̱a̱ku wantinkiamai. Muuke̱sha siati asa siati akuptai̱ tawaspan etseṉkraku armai. Tura kachurí̱sha tiásauyi.

⁴ Menaintiú nakakam jean yaan ni ujuké̱ja̱i̱ japiki̱ akakermai. Tura nuṉká utsamai. Nu Ti Kajen Yajasma nu nuwa̱ jatema nui̱ wajasmai. Takusmataik yuruataj tusa wajattsamai.

⁵ Tura nuwa̱sha áishmaṉkan takusmai. Nu uchi uunt ajas ashí nuṉkanam ti kakaram akupkatin asa nu uchi akupin pujutai̱nium Yus pujana nui̱ junakmiai.

⁶ Tura núwa̱ka atsamunam pisarmai. Nui̱ pujustinian Yus iwiarturmai. Tura mir tusiantu sasaintia tsawant ayurnat tusa akupkámai. Nuka menaintiú uwí naṉkaamasaiti.

⁷ Nuyá̱ nayaimpiniam meset amai. Nayaimpinmaya̱ suntara uuntri̱ Mikiair ni suntari̱ji̱a̱i̱ Ti Kajen Yajasmaja̱i̱ mánaikiarmai. Ti Kajen Yajasmasha ni suntari̱ji̱a̱i̱ ti mánaikiarsha

⁸ nupetmakcharmai. Túramtai nayaimpinmaya̱ ji̱i̱ki̱ akupkámuyi.

⁹ Núnisaṉ Ti Kajen Yajasma ashí ni suntari̱ji̱a̱i̱ nuṉká akupnakmai. Nu Yajasmasha iwianchi uuntri̱ Satanás tutainti. Nisha yáunchuya napiti. Ashí nuṉkanmaya̱ shuaran anaṉniuiti.

¹⁰ Nuyá̱ nayaimpinmaya̱ kakaram untsumman antukmajai. Tura chichaak “Iwianchi uuntri̱ ii yachi̱n yajauch áujmatin ji̱i̱ki̱ akupkámu asamtai yamaikia ii Yusri̱ uwemtikratniusha tura ni kakarmari̱n iniakmastincha tura akupkatniusha jeayi. Anaikiamu Krístusha ashí akupin ajastincha jeayi. Tura iwianchi uuntri̱ ii yachi̱n tsawai̱sha káshisha iniaitsuk Yusai̱ yajauch áujmatniua nuna

¹¹ íksaṉ ii yachi̱ nupetmakarai. Yus susamu murikiu numpe̱ya áinis Jesukrístu numpe̱ja̱i̱ nupetmakarai. Nisha jákatniuitkiusha surimiatsuk nekas chichaman páchitsuk etserkarmai. Núja̱i̱sha iwianchi úuntri̱n nupetkarmai.

¹² Tuma asamtai nayaimpiniam pujarmena nusha warastarum. Antsu nuṉká tura entsá pujarmena nusha iwianchi uuntri̱ atumín tarutmarmatai, maa, waitnentajrume. Ni tsawantri̱ ishichik ajatésman nekáa ti kajekuiti” timiai.

¹³ Nuyá̱ Ti Kajen Yajasma nuṉká ajapna nuwa̱ áishmaṉkan takusma nuna áintramai.

¹⁴ Túrakui nuwa̱n uunt nanapen churuwia nanape̱a áinis sunasmai. Nuja̱i̱ nanamuk yáunchuya̱ napiya̱ nuyá̱ pisar atsamunam wemai. Tura ni ayuratniunam menaintiú uwí nuyá̱ sais nantu pujusmai.

¹⁵ Nuyá̱ nu napi ni wene̱ya̱ entsá ji̱i̱ki̱ nujaṉmamaamai nuwa̱n ajekrataj tusa.

¹⁶ Túrasha nuṉka nuwa̱n yaya̱k nakaak nu entsan mash uku̱yámai.

¹⁷ Túramtai nuwa̱n ti kajerak ni wea chíkich írunna nuja̱i̱ mánaiktaj tusa wemai. Nu shuarsha Yus akupkámun umirainiak Jesusan ti shiir áujmatenakui niji̱a̱i̱ mánaiktaj tawai.