Apu. 10 - Yus Papí: Shuarja̱i̱ Yus Yamaram Chicham Najanamu

Papich pénuimiun suntar takusma

¹ Nuyá̱ chíkich kakaram suntar nayaimpinmaya̱ táarun wainkiamjai. Nusha yuraṉkim amúamu tura muuknum tuntíak téntakmauyi. Yapi̱sha etsa̱ja̱i̱ métek wínchauyi. Tura kujapé̱sha ji keá áintsaṉkeyi.

² Nusha papin urak takakuyi. Tura imiá uunt asamtai ni nawé̱ untsuurnumaani̱ nayantsanam tura menaari̱ni̱ kukar tarimias wajasmai.

³ Tura úunt ya̱wa̱ kaka̱a̱r shiniak chicháa áinis ti kakaram untsumkamai. Nuja̱i̱ siati ipiamtasha chichasarmai.

⁴ Ni chichasarmatai ni chichamen áartiniujai tura nayaimpinmaya̱ chichartak “Aaraip, turutmiai. Ju̱ka nekanashti” turutmiai.

⁵ Tura nuyá̱ suntar nayantsanmasha tura kukarsha tarimias wajama nu ni uwejé̱ untsuurí̱n nayaimpinmaani̱ takuimiai.

^6-7 Tura timiai “Peṉké ishichik ajasái. Suntar siatia nu umpuakuiṉkia Yus ashí yaunchu enentáimpramia nu uminkiattawai.Tan. 12:7 Emka ujatsuk ukunam ni shuari̱n Yúsnan etserniua nuna ujakmiayi” timiai. Nuyá̱ chichaak “Yus tuke iwiaaku pujawai. Tura imiá kakaram asa nayaimpincha, nuṉkancha, nayantsancha tura ashí nui̱ írunna nunasha najankaiti” timiai.Neem. 9:6

⁸ Nayaimpinmaya̱ “aaraip” turutmia nu ataksha chichartak turutmiai “Suntar nayantsanam tura kukar tarimias wajana nu weritia. Túram ni untsuurí̱ni̱ papin urak takakna nu achikta” turutmiai.

⁹ Nuyá̱ túrutkui werin papichin seamjai. Tura surak turutmiai “Papái. Yuátá. Tura yuamka ti yumin átatui. Tura antsu wakemí̱nkia yapamprattame” turutmiai.

¹⁰ Nuyá̱ papichin suntarnumia̱ jukin yuamjai. Tura ni turutmia núnisaṉ wenuruí̱ṉkia ti yumin nekapramjai. Tura antsu yuan wakeruinkia yapampramjai.

¹¹ Tura nuyá̱ turutiarmai “Waketkim ataksha ashí nuṉkanmaya̱ shuaran tura ni úuntri̱ncha Yus tana nu ujakártiniaitme” turutmiai.