Apu. 1 - Yus Papí: Shuarja̱i̱ Yus Yamaram Chicham Najanamu

Jesukrístu paant awajsamu

¹ Jú̱ áarman Jesukrístun Yus ujakmiayi. Wárik túrunatta nuna ni shuari̱n ujakárat tusa ujakmiayi. Tuma asamtai Jesukrístu ni suntari̱n akupak ashí winia paant awajtúrsamai. Wisha Jesukrístu takarniúri̱ Juáṉkaitjiai.

² Yus timia nunasha tura Jesukrístu ujatkámia nunasha tura wi íismaj nunasha ti paant aya nekasa nuna tajai. Peṉké wáitratsjai.

³ Jú̱ papin áujea nu shuar tura núnisaṉ ju̱na ántana nusha nekas enentáimtuiniakka shiir ártatui. Ukunam átatna nuna ujaawai tura jeatémayi.

Juaṉ siati péprunam Yus shuar írunun áatramu

⁴ Wi Juaṉ, Ásianam siati péprunam Yus shuar írunun ju̱ papin áateajai. Yus anenma asa aṉkant shiir pujustinian yaintmakarti. Nu Yus tuke yaunchu pujuyayi. Núnisaṉ yamaisha pujawai. Tura nuke winittiawai. Akupin pujutai̱nium Yusa Wakaní̱ siati naka pujurainia nusha shiir yaintmakarti.

⁵ Núnisaṉ Jesukrístu shiir yaintmakarti. Ni tana nu imiá nekasaiti. Nisha emka jakamunmaya̱ yamaram iwiaakmaja̱i̱ nantakniuiti. Tura ju̱ nuṉkanmaya̱ akupniu Úuntri̱nti. Iin anenma asa ni numpe̱ja̱i̱ ii tunaari̱n nijiatramkaitji.

⁶ Túrutma akupin awajtámsaitji. Tura ni Aparí̱ Yúsnan pujursarat tusa anaitiamkaitji. Ni ti kakaram asa tuke shiir awajnásti. Núnisaṉ atí.

⁷ Wats, Krístuka yuraṉmiji̱a̱i̱ winittiawai. Tan. 7:13-14; Mar. 13:26; Ruk. 21:27; 1 Tis. 4:17 Tura íjiuarmia nushaJṉ. 19:34,37 tura ashí shuarsha nuna wáinkiartatui. Túrawar ashí sapijmiainiak úttiartatui.Sak. 12:10-14; Mat. 24:30 Maa, nekas núnis átatui.

⁸ Witjiai Émkanka tura Náṉkatkancha Wíkitjiai tawai ii Uuntri Yus. Kame yáunchusha tuke pujuyajai tura yamaisha tuke pujajai núnisaṉ Ashí Tujintkiachu ukunam winittiana nusha Wíkitjiai.

1. Yus shuar 7 iruntramunam papí akuptúkma Kristu wincha ajasún Juaṉ wainma

⁹ Wi Juaṉ atumji̱a̱i̱ métek waitia asan atumí yachi̱ntjiai. Núnisaṉ nayaimpiniam Yus akupeana nui̱ métek jeattaji. Tura katsuntrar nákastinian Jesukrístu mái̱ metek súramji. Yus Chichamnasha tura Jesukrístu timiancha étsereakun nayantsanam nuṉkach étentkamunam Pátmusnum sepunam apujsamua núnisaṉ pujumjai.

¹⁰ Tumai̱ Uunt Jesusa tsawantri̱ Yusa Wakaní̱ pujurtakui winia úkurui̱ni̱ kakantar untsumman antukmajai. Kachu umpuamua núnis ti kakarmauyi.

¹¹ Tura chichaak “Witjiai Émkanka tura Náṉkatkancha Wíkitjiai. Yáunchusha tuke pujuyajai. Núnisnak yamaisha tuke pujajai. Tuma asamtai wáinmena ju̱, papinium áaram Ásianam siati péprunam Yus shuar írunna nui̱ akuptúkarta. Jú̱ peprunam akupkarta, Ipisiusha, Ismirnasha, Pírkamusha, Tiatirasha, Sártissha, Piratírpiasha tura Rautiséasha” turutmiai.

¹² Túrutkui yaki túruta tusan apajá̱san iikman siati shirikip ikiutai̱n kuriji̱a̱i̱ najanamun wainkiamjai.

¹³ Tura nui̱ ajapén Aents Ajasua núninian wajan wainkiamjai. Tura pushirí̱sha nawe̱a timiai nuntuaru entsaruyi. Emenmamkesha kúriniak netsepnum emenmamauyi.

¹⁴ Tura ni muuke̱ intiashí̱sha murikiu uré̱ nijiamua núnisaṉ tura micha núnisaṉ ti puju chí̱a̱rauyi. Tura ni ji̱sha jiya núniskeyi.

¹⁵ Ni nawe̱sha ti wincha asa jiru yaṉkutaku jiamua áinis néwar ajarmiayi. Ni chichame̱sha ti kakaram asa uunt entsa téter ajá áintsauyi.

¹⁶ Ni untsuurí̱ni̱ siati yaan takakuyi. Tura ni wene̱nia̱sha puyá̱ áinis tsakatskat mái̱ ere awajsamu jiinmiai. Ni yapi̱sha etsa̱ ti etsantuk íischamnia núnisauyi.Isa. 11:4; 49:2; Apu. 2:12,16; 19:15

¹⁷ Nuna wainkian jakaa áintsanak nawe̱e̱n iniaarmajai. Túrasha ni untsuuri̱ uwejé̱n awantrus turutmiayi “Ashamkaip. Witjiai ashí juármari̱ tura amúamuri̱sha.

¹⁸ Wikia tuke iwiaakuitjiai. Jakamiajai tura nantakin jákashtinian tuke iwiaaku pujajai. Jákatniuncha tura jaka pujuinia nuna yawiri̱n takakun nérenniuitjiai.

¹⁹ Tuma asamtai wainkiamna ju̱sha, yamái wáinmena nusha tura ukunam átatna nusha aartá.

²⁰ Wáinmena nu jú̱nisaiti. Siati shirikip ikiutai̱ kúrik wainkiam nu siati péprunam Yus shuar írunun nakumeawai. Tura winia untsuurui̱ni̱ siati yaa wainkiam nu siati péprunmaya̱ Yus shuaran wáinniun nakumenawai” turutmiai.