Anen. 8 - Yus Papí: Shuarja̱i̱ Yus Yamaram Chicham Najanamu

¹ ¡Maa ame winia umarua núnisam winia nukuru muntsurí̱ muntsúam tsakaruitkiumniṉkia a̱a̱ wekaamin wainkian amincha meje̱a̱smataisha yajauchikia turutcharainti.

² Wikia nukur unuitiu wemia nú je̱a̱nam jukin awayá̱waintjiame. Kranaturun nere̱n yumiri̱n takurkutak áaraintjiame.

³ Winia muukrun ni menaari̱ji̱a̱i̱ awantrus tura untsuuri̱ji̱a̱i̱ṉkia miniakrakka máakeapi aintia.”

Aishri̱ Jerusaréṉnumia̱ nuwa̱ natsachin tiarma

⁴ “Jerusaréṉnumia̱ nuwa̱ch natsatirmin ‘nekas umiktatjai’ tákurminkia ju̱na seajrume. Nekas aneṉkratma tsawantri̱ jeamam wáurmamtikiairap tura aneṉkrattairi̱ ishintiátrairap.”

Áishmaṉ nua̱ri̱n tama

⁵ “¿Yait kampuntin atsunumaani̱ ni aneamuri̱n átutka waakna ausha?” “Mansana numi wakenmari̱n ishintiármajme. Nui̱ ame nuku jatema najaimiak takurmasmiayi.

Nua̱rí̱ ni áishri̱n tama

⁶ Asakatniua áitkiasmek ame enentáimin winia péerkata. Kunturmincha sakarchamnia anujtúkta. Warí aneṉkrattaiṉkia jákatniua áintsaṉ ti kakarmaiti. Tura akasmaktiṉkia jatainium pujustinia áintsaṉ ti najamaiti. Ni jíri̱ṉkia ti kakaram tsué̱raiti.

⁷ Nayantsa entsari̱sha aneṉkratmanka peṉké ikiajniákchamniaiti tura entsasha kiákmamtikiasha emeṉkákchattawai. Tura shuar ashí warirí̱n ni je̱e̱n írunna nuja̱i̱ aneṉkrattai yapaji̱ásha peṉké ántar ainti.”

Nuwá̱ umái̱ kantamáiniamu

⁸ “Ii kai̱ chikichik uchich muntsursachu awai. ¿Ju̱na seatmainiakrincha warí tíintjik?

⁹ Nisha wénukaitkiuiṉkia nui̱ ekenir jiru kuitji̱a̱i̱ uunt je̱a̱ je̱a̱maraintji. Tura wáititkiuiṉkia sétur numiji̱a̱i̱ iwiarkaintji.”

Nua̱rí̱ chíkich ainia nunasha tama

¹⁰ “Wikia wénukaitjiai tura winia muntsurka je̱a̱ tsakatskatniua núnin áiniawai. Tuma asan aneamur íismaka wampu enentáin aṉkant átini̱n wainkia núniniaitjiai.

¹¹ Paaramúnnum Saramúṉ uwa ajan takakuk téntak íinian apujsarmiayi. Nisha péṉker neremtikiar nere̱n júurkar surukar mir jirú kuítian aṉkant aṉkant itiatin ármiayi.

¹² Uwa ajarka winia nuka wíniakete. Maa Saramúṉka mir kuitkia áminiu ártí. Tura tusiantuka ajan wáiniunu ártí.”

Aishri̱ nua̱ri̱n tama

¹³ “Maa ámeka ajanam pujuwitme. Tsaniakmarmeka ame chichammin ántuiniawai. Winiasha antumtikrusta.”

Nua̱rí̱ áishri̱n tama

¹⁴ “Maa, aneamuru, wárik winitiá. Kuṉkuin naintnium ainia nui̱ japa tura japa yamatskam tseke winiana núnisam juiktá.”